2 Samueli 19 - U TIENU MAAMA TILI 2013

Davidi paboanli

¹ Lanwani, li paboanli den cuo o bado. O den doni yaa dieli n ye u dogu bilinciamu buliñoabu yuli po, ki buudi. O den cuoni ki yieni: «N bijua Abisalomi, n bijua Abisalomi. N sugini n yaa bi gaa a kaanu ki kpe. Abisalomi, n bijua, n bijua.»

² Bi den waani Joabi ki yedi o: «Diidi ki le, o bado pali biidi ke o buudi kelima Abisalomi po.»

³ Landaali yaa paadima yaa pamanli den lebidi ki tua paboanli bi niba kuli po, kelima bi den gba ke bi tua: «O bado pali boandi hali boncianla, kelima o bijua kuuma po.»

⁴ Landaali bi toatieba den loanbi ki kua u dogu nni nani ban paadi yaaba bu toabu nni, ke i fe kubi ba yeni.

⁵ O bado den pini o nunga ki buudi ki kpaani ki tua: «N bijua Abisalomi, Abisalomi, n bijua, n bijua.»

⁶ Lane Joabi den kua o bado dieli nni ki yedi o: «Dinla a fiagi a naacenba kuli, bani yaaba n gaa a miali dinla leni a bijaba leni a bisiaba, a puoba leni a puonanbandi yaa miana kuli.

⁷ A bua yaaba n nani a yo ki nan nani yaaba n bua ŋa. A doagidi dinla ke bi toatieba yudanba leni a naacenba kuli ki tie a po puu. N laa ke ti kuli yaa bi kpe dinla ke Abisalomi nan fo, li bi baa yaa mani a po.

⁸ Lanwani, fii ki ña ki maadi yaa maama n baa mangi a naacenba pala. Hali o Diedo po a yàá ñani, li kan faa ke ba niyendo ye a kani. Lani mo, n baa yaa bia a po ki cie yaa fala n da cua a po kuli, ki cili a jawaama nni ki pundi hali dinla.»

⁹ Lanwani, o bado den fii ki gedi ki kali u dogu bilinciamu buliñoabu kani. Bi den waani bi niba kuli ki yedi: «O bado kaa u dogu bilinciamu buliñoabu kani.» Lanwani, bi niba kuli den cua o bado kani. Ama Isidayeli yaaba toatieba den sani ki kuni yuakuli o denpo.

Bi mia Davidi n guani Jerusalemi

¹⁰ Isidayeli buoli siiga kuli, bi den fu ki tua: «O bado den gaa ti Filisiti yaaba nuu nni leni ti yibalinba yaaba n sieni kuli yaa nuu nni, ke moala Abisalomi deli o ke o sani ki ñani mi diema nni.

¹¹ To, Abisalomi, tin den dini yua li bali wan yaa die timo kpe li tuogili nni. Be yaa po ke ti ŋmini kaa juogi tin baa tieni maama ki kpeninni o bado.»

¹² O bado Davidi den gbadi Isidayeli yaaba kuli n tua yaala. Lanwani, o den soani u tondu bi kopadicianba Sadoki leni Abiatari kani, ke ban maadi leni Juda yaaba nikpela ki yedi ba: «Be yaa po ke yi baa tua yaaba n juodi ki baa guani mini o bado n diegu nni?

¹³ Yi tie n kpiiba ki taa leni nni buolu cain. Be yaa po ke yi baa tua yaaba n juodi ki baa guani nni?»

¹⁴ O go den yedi Sadoki leni Abiatari: «Yin yedi mani Amasa mo: ‹Ŋaa taa leni mini Davidi buolu ka? Dinla liiga n yàá teni ke a gaa Joabi kaanu ki tua n toatieba yudanciamo hali yaa yogunu kuli, U Tienu n cuo nni u cuonbiadu.› »

¹⁵ Davidi den maadi ki cuo Juda yaaba kuli pala ke bikuli guani ki taani yanyenma ki soani wani o bado kani ki yedi: «Guani ki kpeni, fini leni a naacenba kuli.»

¹⁶ O bado den guani ki kpendi ki ban pundi Jurden. Juda yaaba den fii ki gedi Giligali ki baa tuogi o ki duoni o u kpenu.

Davidi tieni Simeyi po sugili

¹⁷ Bahurimi yua, Benjamen buolu yua, Gera bijua Simeyi den jaligi ki yegi leni Juda yaaba, ki baa tuogi o bado Davidi.

¹⁸ O den yegi leni Benjamen buolu tudili leni Sayuli diegu naacemo Siba, o piiga n bijamuudiba leni o naacenpiiliediba. Bi den duodi Jurden o bado nintuali.

¹⁹ Yaa ñinbiagu n den baa duoni o bado deni yaaba, den gedi ki baa taa ba, nani o bado n bua maama. O bado n den duodi Jurden yaa yogunu, Gera bijua Simeyi den labini ki pugi o.

²⁰ O den yedi o bado: «Fini n daano, n mia ŋa ŋan da tiadi n tudima po, ŋan sundi mini a naacemo n den tudi a po maama, ŋan den ñani Jerusalemi yaa daali. Ŋan da go kubi la a pali nni.

²¹ N bani ke n tudi. Diidi, Josefi buolu siiga kuli mini n kpa cua ki tuogi fini n daano o bado.»

²² Lanwani, Tiseruya bijua Abisayi den yedi: «Simeyi n den soli o Diedo n gandi yua yeni, naani laa pundi wan kpe?»

²³ Ama Davidi den yedi: «Yinba Tiseruya bijaba, yi maama ki ye lienni. Yi baa gaa lede ki fiini n po ti yanyagidi dinla? Naani mii bandi ke n diedi Isidayeli diema dinla?»

²⁴ Lane o bado den poli ki yedi Simeyi: «A kan kpe ba.»

Davidi leni Mefiboseti guani ki mangi leni biyaba

²⁵ Sayuli bijua Mefiboseti moko den gedi ki baa tuogi o bado. Waa den nigidi o taana, waa den koagidi o langbiadi, waa den ŋuudi o tiadi, ki cili o bado n den ñani Jerusalemi yaa daali ki yaa caa hali wan guani ki kpeni leni laafia yaa daali.

²⁶ Wan den cua Jerusalemi o bado kani, o bado den yedi o: «Mefiboseti, be yaa po ke ŋaa den yegi leni nni?»

²⁷ Mefiboseti den guani ki yedi o: «N daano o bado, n naacemo n den janbi nni. Mini a yonbo den yedi: ‹Nani min tie wabo yeni, n baa teni ban paani o ŋunbo u dafielu min jagini ki yegi leni o bado.›

²⁸ N naacemo yeni den kuli nni fini n daano o bado kani. Ama a tie nani U Tienu maleki yeni. Tieni yaala n dagidi a po.

²⁹ Yaala n bi pundi n baadiegu yaaba kuli po a yaa nintuali wani bi tie bikuli n kpe yo. Ama a teni ke mini a yonbo taani leni yaaba n kaa ki di a saajekaanu kani. N go pia u lee sanu ki mia ŋa liba?»

³⁰ O bado den yedi o: «A nan go li maadi be? N kadi ki waani, fini leni Tisiba yi baa boagidi i kuani yeni.»

³¹ Mefiboseti den yedi o bado: «Wan taa ba li kuli moko, kelima yaala n tugi li yuli tie ke a guani ki kpeni a diegu nni leni laafia.»

Davidi guani Balisilayi ŋanma

³² Galaadi yua Balisilayi den ñani Rogelim ki cua Jurden. O den piadi o bado hali Jurden boanduoli.

³³ Balisilayi den podi boncianla, o den pia bina piinii. Wani n den gaa Davidi cangu ki todi o wan den ye Mahanayimi yaa dana banlu, kelima o den tie piadiciamo.

³⁴ O bado den yedi Balisilayi: «Yegi leni nni, n baa kubi a n deni Jerusalemi.»

³⁵ Ama Balisilayi den guani ki yedi o bado: «N go baa yaa ye bina ŋa yo, ke n baa yegi leni a ki gedi Jerusalemi?

³⁶ Dinla n pia bina piinii. N go baa fidi ki gagidi yaala n ŋani leni yaala n ki ŋani bi? A naacemo go baa fidi ki gagidi wan di yaala leni wan ñu yaala paadima? N kan go fidi ki gbadi bi jaba leni bi puoba yanmani. Lanwani, be yaa po ke n baa tua fini n daano o bado po tugili?

³⁷ N yaa li duoni a Jurden kpenu, li dagidi. Laa pundi ŋan ŋanbi n po laa ŋanbili moko.

³⁸ Cedi min lebidi ki guani ki kpe n dogu nni, ban piini nni n baa leni n naa n pii naani. Ama diidi a naacemo Kimami, wani n baa yegi leni a. Tieni o po nan lan mani a po maama.»

³⁹ O bado den yedi o: «Kimami baa yegi leni nni, n baa tieni o po nani ŋan bua maama. Ŋan bua min tieni yaala kuli, n baa tieni la.»

⁴⁰ Bi niba kuli n den duodi Jurden ke o bado mo duodi, wani o bado den gobini Balisilayi ki gaali o. Balisilayi den lebidi ki kuni o denpo.

⁴¹ Lanwani, o bado den cubini Giligali po ke Kimami yegi leni o. Juda yaaba kuli leni Isidayeli yaaba boagidima den duoni o bado Jurden.

Juda yaaba leni Isidayeli yaaba koani

⁴² Ama Isidayeli jaba kuli den cua o bado kani ki yedi o: «Be yaa po yo ke ti kpiiba Juda jaba fie ŋa ki duoni a Jurden, fini leni a deni yaaba leni a naacenba kuli?»

⁴³ Juda jaba kuli den guani ki yedi Isidayeli yaaba: «Li tie ke o bado kpi leni ti boncianle. Be yaa po ke li fiini yi pala? Naani o bado dini ti yo? O puni ti bu paabu yo?»

⁴⁴ Isidayeli jaba den guani ki yedi Juda yaaba: «Ti die o bado taalima piiga ki cie yinba. Be yaa po ke yi fali ti nanda? Tinba ka den kpa maadi ki yedi: ‹Tin kpeninni ti bado?› » Ama Juda yaaba den maadi leni li pabienli ki cie Isidayeli yaaba.