2 Samueli 18 - U TIENU MAAMA TILI 2013

Davidi niba paadi Abisalomi niba

¹ Davidi den caligi yaa toatieba n den ye leni o ki coadi ba. O den dini yaaba n baa yaa die toatieba tudili tudili leni toatieba kobiga kobiga yudanba.

² O den boagidi o toatieba golataa, ki teni ke Joabi die goyenli, Tiseruya bijua Abisayi, Joabi waalo goyenli, Gati yua Itayi mo goyenli. O bado den yedi o toatieba: «Mini n ba moko baa ña ki yegi leni yi.»

³ Ama bi toatieba kuli den yedi o. «A kan ña, kelima ti yaa sani bi kan yaa faami tinba wani yaa po. Ba bi yaa kpa ti siiga boagidima, li kan yaa tie bi po liba. Ama fini, a tie ti siiga nani niba tuda piiga (10 000) yene. Lanwani, yaala n ŋani ki cie tie ŋan yaa ye u dogu nni ki yaa tuuni ti po mi todima.»

⁴ O bado den guani ki yedi ba: «N baa tieni yin sua ke yaala n dagidi.» Lanwani, o den sedi u dogu bilinciamu buliñoabu kani ke a toagola kuli cuoni ki pendi kobiga kobiga leni tudili tudili.

⁵ O bado den teni Joabi, Abisayi leni Itayi kuli yaa ñoamabonli n tie ne ki yedi: «N mia yi, yin da tieni mani o jawaalo Abisalomi yaala n bia.» Bi toatieba kuli den gbadi o bado n teni bi toatieba yudanba yaa ñoamabonli Abisalomi po.

⁶ Davidi toatieba den ñani ki tuogi leni Abisalomi yaaba li fuali nni. Li toatuogili den tuogi Efrayimi fuali nne.

⁷ Davidi toatieba den paadi Abisalomi yaaba ke bi siiga nni niba tuda piilie (20 000) bodi.

⁸ Bu toabu den yadi laa tinbuoli kuli nni, ke li fuali n den dini yaa niba den yabi ki cie mu jugisiemu n kpa yaaba.

Abisalomi kuuma

⁹ Abisalomi den kadi leni Davidi toatieba siiga bi tianba. O den jagi buomo. O buomo yeni den kua yaa ticianbu n yi telebinti tiipo ke i beni cuo Abisalomi yuli. O den juani tanpoli leni ki tinga siiga. Wan den jagi yaa buomo den pendi.

¹⁰ O nilo den laa lani ki gedi ki waani Joabi ki yedi: «Diidi ki le, n laa Abisalomi ke o juani bu tibu.»

¹¹ Joabi den yedi yua n waani o yeni: «A laa o? Be yaa po ke ŋaa kpa o lankani? N bi baa pa ŋa ŋanjilifa kujapiena piiga leni gbanñagidigu.»

¹² Ama o joa yeni den yedi Joabi: «Ba a yaa bi baa pa nni ŋanjilifa kujapiena tudili, n kan tandi n nuu ki kpa o bado bijua, kelima ti den gbadi o bado n teni a yaa ñoamabonli, fini, Abisayi leni Itayi kuli ki yedi: ‹N mia yi yin da tieni mani o jawaalo Abisalomi yaala n bia.›

¹³ N yaa bi janbi o bado ki kpa o bijua, puu kuli kan bi wuoni wani o bado. Ba fini a ba mo bi baa ña puoli.»

¹⁴ Joabi den yedi: «N kan fidi ki yaa se a kani ki biandi n yogunu.» O den taa kpanbilataa ki muu Abisalomi pali wan den juani bu tibu ki da fo yaa yogunu.

¹⁵ Jawaaba piiga yaaba n den tugi Joabi toatiadi den lindi ki cebini Abisalomi ki pua pua ki dudi o.

¹⁶ Joabi den teni ke bi piebi kakaci. Bi toatieba den guani ki cua o kani ki cedi kaa go deli Isidayeli yaaba, kelima Joabi den sieni bu toabu.

¹⁷ Bi den taa Abisalomi ki luni o ku buociangu nni li fuali nni. Bi den dogini o kuli po a tana boncianla. Isidayeli yaaba kuli den sani ki kuni yuakuli o denpo.

¹⁸ Li den sua ke Abisalomi n den ye yaa yogunu, o den maa li bunbunli o bado joaloangu nni, yaali n baa teni ban yaa tiadi o po, kelima o den yedi: «Mii pia bonjaga yua n baa teni n yeli n da bodi.» O den yini laa bunbunli nani wani o ba yaa yeli. Hali dinla bi yi li Abisalomi bunbunli.

Bi waani Davidi ke o bijua Abisalomi kpe

¹⁹ Sadoki bijua Ahimaatisi den yedi: «Cedi min sani ki ban waani o bado o laabaalimano ke o Diedo pani o po o teginma panpaani ki faabi o o yibalinba nuu nni.»

²⁰ Joabi den yedi o: «Laa pundi ke fine n gedini laabaali dinla. A baa gedini datoali, ama dinla ka, kelima li tie o bado bijua yaa kuume.»

²¹ Joabi den yedi Etiopi yua: «Gedi ki ban togidi o bado ŋan laa yaala.» Etiopi yua yeni den pugi Joabi ki sani ki gedi.

²² Sadoki bijua Ahimaatisi den yedi Joabi: «Lan tie maama kuli, cedi min sani ki ŋoadi Etiopi yua yeni.» Joabi den yedi: «N bijua, be yaa po ke a bua ki sani? Laa laabaalo kan ŋanbi a po liba kuli.»

²³ Ahimaatisi den guani ki yedi: «Lan tie maama kuli, n bua ki gedi.» Lanwani, Joabi den yedi o: «To, gedi!» Ahimaatisi den tagini Jurden tialu po yaa sanu ki kua Etiopi yua yeni liiga.

²⁴ Davidi den kaa u dogu bilinciamu buliñoajabu nni. Yua n den tie o doguudo den doni yaa tanpodieli n ye u bilinciamu buliñoabu yuli po, ki yaadi o yuli ki diidi diidi. O den laa ke o nilo tiini o bebe.

²⁵ Wani o doguudo yeni den tiani ki waani o bado. O bado den yedi. «O yaa ye o bebe, o kpendinni laabaalimane.» Yua n tiini yeni den nagidi.

²⁶ O doguudo yeni den laa ke jatoa go tiini. O den tiani ki yedi o buliñoaguudo: «Jatoa go tiini o bebe!» O bado den yedi: «Omoko kpendinni laabaalimane.»

²⁷ O doguudo yeni den yedi: «O nikpialo n tiini maama tie n po nani Sadoki bijua Ahimaatisi yene.» O bado den yedi: «O tie niŋamo, o kpendinni laabaalimano lige.»

²⁸ Ahimaatisi n den nagini, o den tiani ki yedi o bado: «Laafia yo!» O den labini o bado nintuali ki pugi o ki yedi: «Tin jaandi ki kpiagi o Diedo a Tienu, wani yua n taa yaaba n den fiini mi janjanma ki tuogi leni fini n daano o bado ki teni ti.»

²⁹ O bado den yedi: «O jawaalo Abisalomi ye leni laafia bi?» Ahimaatisi den guani ki yedi o: «Joabi n bi soani mini leni yua n kpendi ne yaa yogunu, n bi laa ke bi niba kubi ŋaŋandi-ŋandi ke ku fuugu ye, ama mii bani yaala n tieni.»

³⁰ O bado den yedi: «Piadi ki guani napo.» Ahimaatisi den piadi.

³¹ Lanyogunu Etiopi yua yeni den nagini ki pundi. O den yedi: «Fini o bado, n daano, cengi o laabaalimano. Dinla o Diedo pani a po a teginma panpaani ki faabi a yaaba n den fiini mi janjanma ki tuogi leni a kuli yaa nuu nni.»

³² O bado den yedi Etiopi yua: «O jawaalo Abisalomi ye leni laafia bi?» Etiopi yua den guani ki yedi o: «Lan tua fini n daano o bado yibalinba kuli po leni yaaba n fiini mi janjanma ki bua ki tieni a mi biadima kuli po, nani lan tua laa jawaalo po maama yeni.»