2 Samueli 17 - U TIENU MAAMA TILI 2013

Usayi biani Ahitofeli tundi fanma

¹ Ahitofeli den yedi Abisalomi: «Cedi min gandi piiga n jaba tudalie (12 000). N baa fii ki ŋoadi Davidi ku naa ñiagu liga.

² N baa nandi ki ludi o wan coagi ki tadigi yaa yogunu. N baa jieni o, yaa niba n ye leni o kuli baa sani. N baa kpa o bado bebe,

³ ki guani bi niba kuli a kani. A yibali yeni kuuma baa teni bi niba kuli n guani ki ŋoadi fini, ki yaa ye leni mi yanduanma.»

⁴ Laa tundi den mangi Abisalomi leni Isidayeli nikpela kuli pala.

⁵ Ama ba yeni Abisalomi den yedi: «Go yini mani Ariki yua Usayi, tin gbadi wani mo n baa yedi yaala.»

⁶ Usayi den cua Abisalomi kani ke o yedi o: «Diidi ki le Ahitofeli n yedi yaala, li pundi tin tieni wan yedi yaala bi, bi tin da tieni? Amo n waani ŋan laa yaala.»

⁷ Usayi den guani ki yedi Abisalomi: «Mini yaa po wani, sanu ne, Ahitofeli n tundi yi yaa tundi yeni daa ŋani.

⁸ A bani a baa leni o niba jama po. Bi pala fii nani yaa fuayanbiadiga n yi ursi yaa pali n baa fii maama bi yaa cuo o bila li fuali nni yeni. A baa yaa tie yaa joa n maani bu toabu, o kan duani ki guani bi toatieba siiga.

⁹ Ba moala o wuo buoguba niinni, yaa ka kaanto. Li tuogikpiali nni, Davidi yaaba yaa kpa ti yaa niba, li kan waagi bi niba baa gbadi ki yaa tua: ‹Bi paadi ki deli yaaba n ŋua Abisalomi.›

¹⁰ Lanwani, ba a jakoanda yaaba n pia li papaali nani i yangbanli yeni tugusoama baa sani, kelima Isidayeli yaaba kuli bani ke yaaba n ye leni a baa yaa tie jakoanda.

¹¹ Lanwani, mini yaa tundi tie ŋan cili hali jienu, Dan dogu, ki pundi hali ganu, Beri-Seba dogu, ki taani Isidayeli yaaba kuli a kani ban tua yaa goli n yabi nani yaa tanbiima n ye mi ñincianma kunu yeni. Fini a baa mo n gaa bi liiga ki gedi li tuogili.

¹² Ti baa nandi Davidi tin laa o naankani kuli, ki baa o po nani ku mangu n baa ki tinga po maama yeni. Wani o ba leni yaaba n ye leni o siiga nni, ba niyendo kan sani ki cia.

¹³ O yaa kua ki wuoni doguba niinni, Isidayeli yaaba kuli baa taa i baabi ki gedi laa dogu. Ti baa dadi o leni yaaba n ye u niinni kuli ki lu ku joaloangu nni, hali ke bi kan go le ba tanyenli li kaanu.»

¹⁴ Abisalomi leni Isidayeli yaaba kuli den yedi: «Ariki yua Usayi yaa tundi cie Ahitofeli yaa yii.» Ama li tie ke o Diedo den jagi ke o baa bolini Ahitofeli tundiŋami yeni, ki cuani o falaciamo Abisalomi po.

Davidi duodi Jurden kpenu

¹⁵ Usayi den yedi bi kopadicianba Sadoki leni Abiatari: «Ahitofeli tundi Abisalomi leni Isidayeli nikpela nanda leni nanda. Nmo tundi ba nanda leni nanda.

¹⁶ Moala yin soani mani tontoni ban ban waani Davidi ke wan da duani Jurden tiali nni, ke wan duodi u kpenu ke ban da ti bolini wani o bado leni o yegininlieba kuli.»

¹⁷ Jonatan leni Ahimaatisi den se Eni-Rogeli dobiga po kelima bi kan den tuo ki kua Jerusalemi nni ke ban da ti le ba. Jafaano n yen cua bi kani ki caa i tondi, bani mo n ban waani Davidi yaala n tieni.

¹⁸ Ama o jawaalo den laa ba ki waani Abisalomi. Bi den jaligi tontoni bani bonbilie kuli ki pundi Bahurimi dogu nni, ki kua niyendo deni. O den pia li caali o diegu nni. Bi den kua ki wuoni li caali yeni niinni.

¹⁹ Ku diegu yeni daano pua den baa ku pangu ki pii li caali ñoabu, ki deni i difabidike ke niloba n da ti maali liba.

²⁰ Abisalomi naacenba den kua laa diegu nni o pua yeni kani, ki buali o: «Ahimaatisi leni Jonatan ye le?» O den waani ba ke bi duodi ki fuanbiga. Ban den lingi lingi kaa laa ba, bi den guani ki kuni Jerusalemi.

²¹ Ban den lebidi ki kuni, Ahimaatisi leni Jonatan den ñani li caali nni ki gedi ki ban waani Davidi Ahitofeli n yedi yaala, ki yedi o: «Fii mani ki duodi u kpenu kelima Ahitofeli tundi ba, ban tieni yi line leni line.»

²² Davidi leni yaaba n den ye leni o kuli den fii ki duodi Jurden. Lan den yendi yaa yogunu, ba niyendo ki den sieni kaa duodi Jurden.

²³ Ahitofeli n den laa ke baa ŋoadi o tundi, o den paani o ŋunbo li gaali ki fii ki kuni o denpo, o dogu nni. O den teni o niba o ñoamabona ki yuandi ki soadi o yuli. O den kpe yeni ke bi piini o o baa kuli nni.

Davidi n tieni yaala Mahanayimi dogu nni

²⁴ Davidi n den pundi Mahanayimi dogu nni yaa yogunu, Abisalomi den duodi Jurden wani leni Isidayeli toatieba kuli.

²⁵ Li den sua ke Abisalomi teni ke Amasa lebidi Joabi ki tua bi toatieba yudaano. Wani Amasa den tie Isidayeli buolu yua Yeteri bijua. Yeteri yeni den taa Nahasi bisalo Abigayili, Joabi naa Tiseruya naataanu.

²⁶ Abisalomi leni Isidayeli yaaba den kpaa bi toanagili Galaadi diema nni.

²⁷ Davidi n den pundi Mahanayimi, Raba dogu yua Nahasi bijua Sobi leni Anmoni yaaba den cua o kani. Bani n tie ne: Lodebari dogu yua Amiyeli bijua Makiri leni Galaadi dogu Rogelim yua Balisilayi

^28-29 den cuani i duani, ti tadiciandi, a boba, a cuana leni ban taa i pe leni i ne naaŋanma ki ŋanbi yaa jekpaga, ŋalikama, orje, mi yoma, i disagidi, a tuuna leni yaa tubuolu n yi lantiyi, ti siadi, mi naaŋankpama leni i pe. Bi den cuani lankani Davidi leni o yegininlieba po ke ban je, kelima bani yaaba n den cuani yeni den yedi: «Laa pia kuli tama, ban tagini li fuali nni yeni, mi koma, u ñuñuunu leni li coagili gbadi ba.»