2 Samueli 16 - U TIENU MAAMA TILI 2013

Davidi leni Tisiba

¹ Davidi n den pendi li juali yuli po waamu, Mefiboseti naacemo Tisiba den tuogi o ki pia ŋunbilie, ke bi paani ba i dafieli ke bi tugi dupen kobilie, duven tiidi bonluonkaala bonfiidi kobiga, a kankankuoma bonkona kobiga leni duven dayuayengu.

² O bado den buali Tisiba: «A caani line le?» Tisiba den guani ki yedi o: «N cuani i ŋunbi ke fini o bado niba n jagini, dupen leni li bonluonkaala mo tie bi toatieba jiema. N cuani duven mo yaaba n ban coagi li fuali nni n ño.»

³ O bado den buali o: «A canbaa bijua Mefiboseti nan ye le?» Tisiba den guani ki yedi o: «O sedi Jerusalemi kelima o yedi: ‹Dinla Isidayeli buolu baa guani ki dini nni li bali min diedi n baa diema.› »

⁴ O bado den yedi Tisiba: «Mefiboseti n den die yaala kuli tua a yaala.» Tisiba den yedi: «N pagi a. Ŋan suagi ki yaa ŋanbidi n po.»

Simeyi soli Davidi

⁵ Davidi n den kua Bahurimi dogu nni yaa yogunu, Gera bijua Simeyi, Sayuli buolu nilo, yua n go tie o diegu nni yua, den ñani ki togidi leni ba. O den solini o bado Davidi

⁶ ki lugidi wani leni o badibaanba kuli a tana. A jakoanda leni yaaba n sieni kuli den cuoni ki baali o bado ganu leni o jienu.

⁷ Simeyi den solini Davidi ki tua: «A caa, a caa! O nikpalo leni o nibiado ne!

⁸ O Diedo n teni ke Sayuli diegu nni yaaba soama kuli guani ki baa fini Davidi yuli po. A den gaa o kani li bali ki dini, lani yaa po yo ke o Diedo taa mi diema bali ki teni a bijua Abisalomi ke a mo ji ye leni fala moala, kelima a tie nikpalo.»

⁹ Lanwani, Tiseruya bijua Abisayi den yedi o bado: «Be yaa po ke o naa sangbankpiemo solini fini n daano o bado nanda? N mia ŋa, cedi min gedi ki jia o yuli.»

¹⁰ Ama o bado den guani ki yedi: «Yinba Tiseruya bijaba, yi maama ki ye lienni. O yaa soli nni, li tie ke o Diedo n yedi o: ‹Ŋan soli Davidi.› Lanwani, ŋme n baa fidi ki fu leni o.»

¹¹ Davidi go den yedi Abisayi leni o badibaanba kuli: «N bimadiga yaa bua ki kpa nni daa, yaa joa n tie Benjamen buolu na mo te? Cedi mani wan yaa solini kelima o Diedo n puogi o yeni.

¹² Li fidi ke o Diedo baa le n po n fala ki lebidi ban solini nni yaa solindi dinla ne, lan tua n po seli.»

¹³ Davidi leni o niba den suagi liiga leni bi cenli. Simeyi den cuoni li juali balinma ki baali Davidi ki solini o, ki lugidi o a tana leni mi tama.

¹⁴ O bado leni yaa niba n den yegi leni o kuli den pundi ki coagi, ki sedi lankani ki fuodi.

Usayi gedi Abisalomi po

¹⁵ Abisalomi den kua Jerusalemi leni Isidayeli yaaba nigocianli. Ahitofeli moko den yegi leni o.

¹⁶ Davidi danli Ariki yua Usayi n den pundi Abisalomi kani, o den yedi: «O bado n yaa ye ki fo! O bado n yaa ye ki fo!»

¹⁷ Abisalomi den yedi Usayi: «Ŋan bua a danli maama nne? Be yaa po ke ŋaa yegi leni o?»

¹⁸ Usayi den guani ki yedi Abisalomi: «Li tie ke n bua ki ŋoadi o Diedo, yaa niba n ye ne leni Isidayeli yaaba kuli n gandi yua yo. N bua ki yaa ye leni wane.

¹⁹ N baa yaa tuuni ŋme yaa po yo? Laa tie n danli bijua po ka? N ji baa yaa tuuni a yaa po nani min den tuuni a baa po maama.»

Abisalomi kua Davidi puonanbandi kani

²⁰ Abisalomi den yedi Ahitofeli: «Yin juogi mani yi siiga ki le tin baa tieni yaala.»

²¹ Ahitofeli den yedi Abisalomi: «Gedi ki kua a baa puonanbandi kani, wan ŋaa yaaba ke bi guu ku diegu yeni. Yeni Isidayeli yaaba kuli baa bandi ke a fiini a baa pali ki teni ke o nani a. Lane, yaaba n ye leni a kuli baa paagi bi pala.»

²² Bi den kpaa li gbandieli o bado doangu tanpoli Abisalomi po ke o kua o baa puonanbandi kani ke Isidayeli yaaba kuli nua.

²³ Lanyogunu Ahitofeli n den tundi yaa tundi den pia li bali nani U Tienu wani o ba n tundi yeni. Ahitofeli tundi kuli den tie yene, o yaa tundi Davidi bi o yaa tundi Abisalomi.