2 Samueli 15 - U TIENU MAAMA TILI 2013

Abisalomi bua ki gaa o baa Davidi kani li bali

¹ Li yaa puoli, Abisalomi den baa toateligu, i taami leni jaba piimuu ke bi tiini o liiga.

² O yen yagidi ki fii ki sedi u sankunu u dogu bilinu buliñoabu kani. Nilo yaa den pia buudi ki tagi ki caa o bado po ki baa n bu, Abisalomi yen yini o ki buali o: «A ñani u laa dogu yo?» O nilo yeni yaa den guani ki yedi: «N tie Isidayeli buoli nni u naa buolu yua,»

³ Abisalomi yen yedi o: «Diidi, a maama yeni niinni a pia i moamoani, a cima tiegi. Die o bado kan baa oba kuli n cengi a.»

⁴ Wani Abisalomi yen pugini ki yedi: «A! N yaa bi tie mi diema ne niinni bujialo, yaaba n pia janjanma bi buudi kuli baa yen cua ki le nni. Nmo bi baa yen jia bi po bi buudi ke li tiegi.»

⁵ Nilo yaa den nagini ki baa labini ki pugi o mo, o yen tandi o nuu ki cuo o ki gobini o leni mi buama.

⁶ Abisalomi den tiendi yene leni Isidayeli yaaba, yaaba n caa o bado po, ki baa n mia wan jia bi po bi buudi kuli. O den tiendi yene ki dia Isidayeli yaaba.

⁷ Binanaa n den pendi, Abisalomi den yedi o bado: «Pa nni u sanu min gedi Hebiron ki ban kuani min den niani o Diedo yaa nianli.

⁸ Min den ye Siiri diema Gesuri dogu nni, n den niani o Diedo li nianli ki yedi ke o yaa guani nni Jerusalemi, n baa padi o po a pada.»

⁹ O bado den yedi o: «Gedi leni mi yanduanma.» Lanwani, Abisalomi den fii ki gedi Hebiron.

¹⁰ O den soani bi niba ŋasiili nni ke ban gedi Isidayeli buoli yaaba kuli siiga, ki ban yedi bi niba: «Yi yaa gbadi ke bi piebi kakaci, yin yedi ke Abisalomi ye Hebiron ki tie bado.»

¹¹ Jerusalemi yaaba jaba kobilie, Abisalomi n den mia yaaba, den ciani o. Bi den ciani o leni tugupiengu, kaa bani Abisalomi n bogindi yaa janbi po.

¹² Abisalomi n den padi yaa yogunu, o den soani Gilo dogu nni ke bi ban yini Ahitofeli, Davidi tundika. Yaaba n den taa Abisalomi po den yabidi ki pugidi, o jajanbidi-yanjagili yeni den baa u paalu ki pugini.

Davidi sani ki ñani Jerusalemi

¹³ O nilo den gedi ki waani Davidi ki yedi o: «Isidayeli yaaba pala jigidi ki ŋua Abisalomi.»

¹⁴ Davidi den yedi o badibaanba yaaba n den ye leni o Jerusalemi nni kuli: «Fii mani tin sani, lani yaa ka Abisalomi kan cedi ti. Tin jaligi mani, yeni yaa ka o baa nandi ti tontoni ki waani ti fala, ki kpa u dogu nni yaaba.»

¹⁵ O bado badibaanba den yedi o: «Ti daano o bado, ti baa tieni ŋan bua yaala kuli.»

¹⁶ Lanwani, o bado den fii ki ñani u dogu nni ke o deni yaaba kuli ŋua o. O den ŋaa o puonanbandi siiga bonba piiga ban yaa guu ku diegu.

¹⁷ O bado den ñani u dogu nni ke bi niba kuli ŋua o. Bi den sedi yaa diegu n ban juodi kani.

¹⁸ Bi naacenba kuli, Keleti yaaba leni Peleti yaaba kuli den tagini ki pendi o bado nintuali. Gati dogu po yaaba, yaaba n den yegi leni o ki ñani Gati den pundi kobiluoba. Bimoko den tagini ki pendi o nintuali.

¹⁹ O bado den yedi Itayi, Gati yua: «Be yaa po ke amo baa ŋoadi ti? Lebidi ki guani ki sedi leni o badipaano, kelima a tie caane, ŋaa ye a diema nni.

²⁰ Li daa waagi leni ŋan cua n kani, ke dinla n baa taa ŋa ŋan yaa kpaagi ki liani leni ti, tinba yaaba n daa bani tin caa naani? Aa-a, lebidi fini leni a deni yaaba ki yaa goa! O Diedo n ŋanbi yi po, ki gbadi yi po mi ninñima.»

²¹ Itayi den guani ki yedi o bado: «Hali o Diedo po, fini n daano n baa yaa ye naani, nmoko baa yaa ye lankane. N yaa baa kpe, n yaa baa yaa ye, n baa yaa yegi leni a.»

²² Davidi den yedi Itayi: «Lanwani, pendi ki yaa ŋua!» Itayi den pendi wani leni o toatieba leni o deni yaaba kuli.

²³ Yaaba n den yegi leni Davidi den tagi ki pendi ke mi diema nni bi niba buudi. O bado den duodi Sediron kpenu. Yaaba n den yegi leni o moko den duodi. Bi den tagini yaa sanu n caa li fuali po.

²⁴ Sadoki den ye likani, wani leni yaa Levi buolu n bugi U Tienu ŋantaadikpaku. Bi den bili U Tienu kpaku yeni. Abiatari den padi a pada hali yaa niba n den ñani u dogu nni kuli n do ki gbeni.

²⁵ Li yaa puoli, o bado den yedi Sadoki: «Go bugi U Tienu kpaku ki guani gu u dogu nni. O Diedo yaa gbadi n po mi ninñima, o go baa guani nni ki teni min goa ki le o kpaku leni ku yekaanu.

²⁶ Ama o Diedo yaa yedi nni: ‹N pali ki mani a po,› mini Davidi n tie ne, wan tieni nni nani wan bua maama.»

²⁷ O bado go den yedi o kopadiciamo Sadoki: «A gbadi, ŋan lebidi ki guani u dogu nni leni mi yanduanma, fini leni a bijua Ahimaatisi leni Abiatari bijua Jonatan.

²⁸ Diidi ki le, n baa yaa ye u tialu nni ki guu hali yin baa soani n po laabaali.»

²⁹ Lani, Sadoki leni Abiatari go den bugi U Tienu kpaku ki guani gu Jerusalemi po, ki guani ki kali likani.

Davidi soani Usayi wan diidi Abisalomi ŋasiili nni

³⁰ Davidi den doni Olivie Tiidi juali po. O den do ki buudi ke o yuli liibi li cabili, ki cuoni taapiena. Yaaba n den yegi leni o kuli moko den libini ki do ki buudi.

³¹ Bi den cua ki yedi Davidi: «Ahitofeli taani leni mi janjanma danba ki ŋua Abisalomi.» Davidi den mia U Tienu ki yedi: «O Diedo, teni ke Ahitofeli tundi kuli n tua fanma.»

³² Davidi n den pundi li juali po ban kpiagidi U Tienu naani, o den laa yaa tinbuoli n yi Ariki yua Usayi ke o cuoni ki togidi o. O liadili den padi, ke o yuli kuli tie tama.

³³ Davidi den yedi o: «A yaa yegi leni nni, a baa tua n po tugili.

³⁴ Ama ŋan guani u dogu nni ki ban yedi Abisalomi: ‹O bado, n baa tua a naacemo. N den tie a baa naacemo, ama moala n ji baa tua a yaa naacemo.› Yeni a baa biani Ahitofeli tundi kuli fanma, ki todi nni.

³⁵ Bi kopadicianba Sadoki leni Abiatari baa yaa ye leni a likani. Ŋan bandi yaala o bado diegu nni kuli, ŋan togidi ba.

³⁶ Bi bijaliediba ye likani, Sadoki bijua Ahimaatisi leni Abiatari bijua Jonatan. Yi yen baa soani bane ban waani nni yin pia yaa laabaali.»

³⁷ Lanwani, Davidi danli Usayi den guani ki kua Jerusalemi nni Abisalomi n den pundi ki kua yaa yogunu.