2 Samueli 14 - U TIENU MAAMA TILI 2013

Abisalomi guani ki kpeni Jerusalemi

¹ Tiseruya bijua Joabi den laa ke Davidi yama guani ki baa Abisalomi nni.

² Lanwani, o den soani ke bi gedi Tekoa dogu po ki ban yini o puonunfandaano. Wani Joabi den yedi o: «Ŋan kpali ke a ye leni li paboanli ki yie ti paboantiadi. Ŋan da sogi kpama. Ŋan tieni nani yaa pua n mua tinkpilo po hali ke li waagi yeni.

³ Ŋan tieni yeni ki gedi o bado po ki ban yedi o min baa yedi a yaala ne.» Joabi den waani o wan baa n yedi yaala.

⁴ Tekoa dogu pua yeni den gedi ki ban laa o bado. O den labini ki kpiagi o ki yedi: «O bado, faabi nni!»

⁵ O bado den buali o: «Be kubi a?» O den guani ki yedi: «N tie kpepuoli, n calo kpe!

⁶ N den pia bonjalalie. Bi den koani u kuanu po ki sua ke oba kuli ki ye likani ki baa paadi ba. Yendo den pua o lielo ke o kpe.

⁷ Lanwani, ku diegu nni yaaba kuli fii ki sedi n po ki yedi: ‹Ñani yua n kpa o naataanu yeni ne, ti baa kpa o ki tuu wan kpa o naataanu yua yeni po li panli. Ti baa kpa o, wani o faajielo.› Yeni mo, bi bua ki gbindi n mukuanli yaali n bi sieni, ki teni n calo buolu mo n bodi mi tinfanma nni.»

⁸ O bado den yedi o: «Goa ki yaa kuni a denpo. N baa waani ban baa tieni a po yaala.»

⁹ O pua yeni den yedi o bado Davidi: «Lan tie yaala kuli, lan jiidi mini leni n baadiegu yaaba po. Ban da tuni o bado leni o bali kuli tagiliba.»

¹⁰ O bado den yedi: «Yua funi leni a kuli ŋan cuani o ne, o kan go faa ki yagi a yama.»

¹¹ O pua yeni den yedi: «O bado, ŋan poli hali o Diedo a Tienu po, ke a kan tuo ke yua n baa tuu n biga kuuma panli yeni n kpa n biga yua n sieni ki pugini mi soawulima.» O bado den guani ki yedi: «Hali o Diedo po, a biga yudi ba yuyengu kan baa tiipo.»

¹² O pua yeni go den yedi: «O bado, pa nni u sanu min go yedi bonyenla.» O bado den yedi: «Maadi.»

¹³ O pua den yedi: «Li nan gaa lede ke a tudi U Tienu niba po? Nani ŋan yedi maama po, a waani fini a ba ke a pia i tagili ŋan ki guani ŋan deli ki ñani yua yeni.

¹⁴ Li tie moamoani ke ti kuli baa kpe dayenli ki tua nani ban wuli yaa ñima tiipo, ke mi kan go tuo ki wodi yeni. Ama moala po, U Tienu daa bua lan tua yeni Abisalomi po. O pia wan jagi ki bili yaala, ke Abisalomi n da foagi leni o.

¹⁵ Min cua moala ki yedi line kuli yeni, li tie ke bi jieni nne. Lane ke n yedi n yama nni: ‹N baa maadi leni o bado. Daalinba o baa cengi n maama, ki tuo mini o yonbo n yedi yaala.

¹⁶ Yeni de! O bado baa tuo ki gaa mini leni n bijua yaaba n bua ki bolini ti U Tienu niba siiga yaa nuu nni.›

¹⁷ N yedi n yama nni: ‹O bado n baa yedi yaala baa duani n yama. Fini o bado tie nani U Tienu maleki yene, a bani ki paadi yaala n ŋani leni yaala n bia.› O Diedo a Tienu n yaa ye leni a.»

¹⁸ O bado den yedi o pua yeni: «Ŋan da wuoni nni min baa buali a yaala.» O pua den guani ki yedi: «N daano, maadi!»

¹⁹ Lanwani, o bado den yedi: «Joabi ka yedi line kuli te?» O pua den guani ki yedi: «O bado, i moamoani, yeni lige. Joabi n waani waani nni min baa yedi yaala kuli.

²⁰ O den tieni yeni ke lan lebidi ki ŋanbe. Die amo, a bani yaala n tiendi ki tinga kuli nni, kelima a pia mi yanfuoma nani U Tienu maleki yene.»

²¹ O bado den gedi ki yedi Joabi: «N baa tieni nani ŋan mia maama. Gedi ki ban taa o jawaalo Abisalomi ki kpeninni o ne.»

²² Joabi den baa ki labini o bado nintuali ki tuondi o ki yedi: «O bado, dinla mini a naacemo bandi ke a pali mani n po, kelima a tuo ki baa tieni mini a naacemo n yedi yaala.»

²³ Joabi den fii ki gedi Gesuri ki ban taa Abisalomi, ki guani o Jerusalemi.

²⁴ Ama o bado den yedi: «Wan kua o denpo, ki da cua n kani.» Lanwani, Abisalomi den kua o denpo ki naa baa ki laa o bado.

Davidi guani ki mangi leni Abisalomi

²⁵ Isidayeli kuli nni ki den pia yua n ŋani ki pundi Abisalomi, laa den pia ban ñuadi yua nani wani. Ki cili o taafaagu ki yaa caa hali o yuli siiga, waa den pia poadoba kuli.

²⁶ Binli kuli o yen lebi o yudi kelima ti den kpiagi o po boncianla. O yaa lebi, o yudi kpiagu yen cie kilo bonbilie, nani o bado bonbiigikaala po.

²⁷ Wani Abisalomi den pia bonjalataa leni bonpoyenga. Ki bonpuoga den yi Tamari, ki ŋani hali boncianla.

²⁸ Abisalomi den tieni Jerusalemi binalie, waa baa ki kua o bado kani.

²⁹ Dayenli o den soani ban yini Joabi ke o baa soani o o bado kani. Ama Joabi den yie ke o kan cua. Abisalomi go den soani miliema ke ban yini o. O go den yie.

³⁰ Lanwani, Abisalomi den yedi o naacenba: «Diidi, Joabi kuanu kuu leni n yaa kuanu. O cuu tie orje yaa kuanu. Yin gedi mani ki ban juu u.» Bi naacenba den gedi ki ban juu Joabi kuanu yeni.

³¹ Tontoni, Joabi den gedi Abisalomi kani ki buali o: «Be yaa po ke a naacenba juu n kuanu?»

³² Abisalomi den guani ki yedi o: «Li tie ke n den soani ban yini a ke a yie ŋaa cua. N den bua ki soani a ŋan ban buali o bado yaala yaa po ke n ñani Gesuri ki kpeni? N yaa bi baa ki ye lipo cie. To, moala n ji bua ki baa u sanu ki kua o bado kani. N yaa pia tagili, wan teni ban kpa nni.»

³³ Joabi den gedi ki ban togidi o bado Abisalomi n yedi yaala kuli. Lanwani, o bado den teni ke bi yini Abisalomi. O den cua ki labini ki pugi o. O bado den gobini o leni mi buama.