2 Samueli 12 - U TIENU MAAMA TILI 2013

Natan waani Davidi o tagili

¹ O Diedo den soani Natan Davidi kani. Natan den cua o kani ki yedi o: «Jabilie den ye u dogu nni. Yendo den tie piado, o lielo mo luodo.

² O piado den pia i pe leni i ne boncianla.

³ O luodo naa den pia puu, se pesiayenga wan den daa yaaga. O den wubi ka ke ki yabidi o dieli nni leni wani o bondaano bila. Ki den di o jiema ki ñu o tadiñokaaga nni, ki dua o benli po ke o nua ka nani o bisalo yeni.

⁴ Dayenli o caano den cua ki cani o piado yeni. Waa den bua ki ñani o pe bi o ne siiga ba yendo ki candi o caano. O den fie o luodo pebiga ki kodi ki candi o.»

⁵ Davidi pali den beni hali boncianla laa piado po ke o yedi Natan: «Hali o Diedo po, yua n tieni yeni, li pundi ban kpa o.

⁶ O go baa pa o luodo pesalinaa mo, kelima o tieni yeni kaa gbadi o po ninñima.»

⁷ Natan den yedi Davidi: «Fini n tie laa nilo. O Diedo, Isidayeli Tienu yedi mine: ‹Mini o Diedo den dini a li bali ke a tua Isidayeli bado, n den faabi a Sayuli nuu nni.

⁸ N den puni a a daano Sayuli diegu yaaba, ki puni a o puoba ke a die ba, ki go puni a Isidayeli leni Juda yaaba kuli ke a die. Lani kuli yàá bi dagidi, n go bi baa pugini a.

⁹ Lanwani, be teni ke a fali mini o Diedo maama, ki tieni yaala n joagini n nintuali? A pedi ki kpa Hititi buolu yua Uri leni ki jugisiega. Yeni de! A teni ke Anmoni yaaba kpa o leni mu jugisiemu, ki taa o pua mo ke o tua a yaa pua.

¹⁰ Lani yaa po, kukaama kan ji luo a diegu nni abada, kelima a fali nni ki taa Hititi buolu yua Uri pua ke o tua a pua.

¹¹ Mini o Diedo yedi: Diidi ki le, n baa fiini a po fala a diegu nni. N baa taa a puoba ke a nua, ki teni nitoa wan taani leni ba u yensiinu, asala nni.

¹² Fini a den tieni ŋasiili nni, mini wani n baa tieni la asala nni, Isidayeli yaaba kuli nintuali.› »

¹³ Davidi den yedi Natan: «N tieni ti tuonbiadi ki tudi o Diedo po.» Natan den yedi Davidi: «O Diedo tieni a po sugili a tuonbiadi po, a kan kpe.

¹⁴ Ama yaa biga n mali yeni baa kpe, kelima ŋan tieni yaala yeni teni ke o Diedo yibalinba sugi o.»

¹⁵ Natan den fii ki kuni o denpo. O Diedo den luni Uri kpepuoli n den mali Davidi po yaa biga u yianu.

¹⁶ Lanwani, Davidi den jaandi ki miadi U Tienu ki biga po ki luo o ñoabu. O yaa kua o dieli nni o yen duani tinga nni hali lan ban faa.

¹⁷ O diegu nni nikpela den cua ki se o kani ki moandi ke wan fii, ama waa den tuo, waa den dini leni ba liba mo.

¹⁸ Li daleleeli, ki biga den kpe. Davidi naacenba den jie kaa bua ki waani o ke ki biga kpe, kelima bi den yedi: «Diidi ki le, tin den maadi leni o ke ki biga daa kpe, waa den cengi ti. Ti baa tieni lede ki waani o ke ki biga kpe? Li fidi wan tieni o yuli yaala n bia.»

¹⁹ Ama Davidi n den laa ke o naacenba soabidi leni biyaba, o den bandi ke ki biga kpe. O den buali ba: «Ki biga kpe yo?» Bi den guani ki yedi o: «O kpe!»

²⁰ Lane Davidi den fii ki wali ki sogi tulale, ki lebidi o tiadi. O den gedi o Diedo diegu nni ki labini ki jigini o. Wan den lebidi ki kua o deeni, o den teni ke bi cuani o po mi jiema ke o dini.

²¹ O naacenba den yedi o: «Ŋan tieni yaala ne mo bua ki yedi be? Ki biga n den ye yaa yogunu a den luo bu ñoabu ki buudi. Moala mo wan kpe yeni, a fii ki dini.»

²² O den guani ki yedi ba: «Ki biga n den ye, n den luo bu ñoabu ki buudi kelima n den yedi: ‹Ŋme bani o Diedo yaa kan gbadi n po mi ninñima ki teni ki biga n yaa ye?

²³ Moala ke o kpe, be yaa po ke n go baa yaa luo bu ñoabu? N baa fidi ki teni wan go faadi bi? Mini, n baa gedi o po, ama wani, o kan go fidi ki guani ki cua n kani.› »

Salomon madi

²⁴ Davidi den baagi o pua Bati-Seba, ki taani leni o ke o mali bonjaga. Davidi den yini o Salomon. O Diedo den bua o,

²⁵ ki teni ke o saawalipualo Natan yini o Yedidia, kelima wani o Diedo po.

Davidi baa Raba dogu bu toabu

²⁶ Joabi den lindi ki cebini Anmoni buolu dociamu Raba, ki cuo u.

²⁷ O den soani a tonda Davidi kani ki yedi o: «N tuogi bu toabu leni Raba ki cuo mi ñima n ye yaa ñianli.

²⁸ Ŋan taani yaa toatieba n sieni ki cua ki tuogi leni u dogu ki cuo u, kelima mii bua ki cuo u ki paadi u ti kpiagidi n tua n yaadi.»

²⁹ Lani yaa po, Davidi den taani yaa toatieba n sieni kuli ki gedi hali Raba ki tuogi leni u, ki cuo u ki diedi u.

³⁰ O den cibidi bi bado fogiliga. Ki den tie wula ke ki kpiagu cie kilo piitaa. Ki den jabi ki lindi leni yaa tanbila n ŋani ki pia mi jawaama, ke a dunga pa boncianla. Bi den cibini ka Davidi. O den fie u dogu nni yaa fagidi n yabi hali boncianla.

³¹ O den ñani bi dotieba u dogu nni ki teni ke bi tuuni leni ti sasaadi, a cecela leni a yala, ki go teni ke bi pua i tankonkuomi ki puli yi. O den tieni Anmoni buolu dogi niba kuli yeni. Li yaa puoli, Davidi leni bi toatieba kuli den lebidi ki guani Jerusalemi.