2 Samueli 11 - U TIENU MAAMA TILI 2013

Davidi diegu yema 11—21 Davidi conbi leni Bati-Seba

¹ Li binli lebidima, bi badiba n yen caa bu toabu yaa yogunu n den pundi, Davidi den soani o toatieba yudaano Joabi, wani leni o naacenba leni Isidayeli toatieba kuli, ke ban ban bolini Anmoni buolu ki lindi ki cebini bi dociamu Raba, ki paadi u. Ama Davidi den sedi Jerusalemi.

² Yenjuayengu Davidi n den fii o duanu po ki goadi wani o bado diegu yuli po, o den laa o pua ke o wuu. O den ŋani hali boncianla.

³ Davidi den soani ki buali o pua yeni n tie yua, ke bi yedi o: «Eliam bisalo Bati-Seba yo, Hititi buolu yua Uri pua.»

⁴ Davidi den soani a tonda ke bi ban yini o. O den cua o kani ke o taani leni o ke o lebidi ki kuni o denpo. Li den sua ke o pua yeni da li wali ki ñani li kuale.

⁵ O pua yeni den punbi, ki soani ke bi waani Davidi ke o punbi.

⁶ Lani, Davidi den soani Joabi po li ñoamabonli ki yedi: «Ŋan teni ke Hititi buolu yua Uri n kpeni ne.» Joabi den teni ke Uri kuni Davidi po.

⁷ Uri den pundi Davidi kani ke o buali o Joabi leni bi toatieba kuli leni bu toabu laabaalo.

⁸ Li yaa puoli, Davidi den yedi Uri: «Kuni a denpo ki ban fuodi.» Uri n den ñani o bado diegu nni, o bado den ŋuani o puoli bu paabu.

⁹ Ama Uri den duani o bado diegu nintuali leni wani Davidi naacenba kuli, waa den kuni o denpo.

¹⁰ Bi den waani Davidi ke Uri ki kuni o denpo. Davidi den yedi Uri: «A ñani banfoagili ki kpeni. Be yaa po ke ŋaa kuni a denpo?»

¹¹ Uri den guani ki yedi Davidi: «U Tienu kpaku, Isidayeli leni Juda yaaba kuli ban ye a gbandiena nni, n canbaa Joabi bi toatieba yudaano leni fini n daano naacenba kuli ban ye li toanagili nni. Mini mo, min kua n diegu nni, ki je ki go ño ki duani leni n pua? Hali U Tienu leni a yaa po, n kan tieni laa bonla.»

¹² Davidi den yedi Uri: «Go sedi dinla, saala n baa cabi a.» Uri go den sedi Jerusalemi landaali leni li dalieli.

¹³ Davidi den yini o wan je ki ño leni o o saajekaanu kani, ki teni ke o ñuni ki gaadi. Ku ñiagu Uri den ñani ki duani leni Davidi naacenba. Waa den kuni o denpo.

¹⁴ Lan den fii ki faa, Davidi den diani Joabi po li tili ki teni Uri n ban teni o.

¹⁵ O den diani laa tili nni ki yedi: «Yin gedini Uri bu toabu n bia naankani ki cie, ki fuadi ki ŋaa o ban pua o wan kpe.»

¹⁶ Li den sua ke Joabi lindi ki cebini u dogu ki bua ki cuo u. O den gedini Uri wan bani ke bi yibalinba jakoanda ye naankani ki guu.

¹⁷ U dogu jaba den ñani ki tuogi leni Joabi bu toabu. Bi den kpa o toatieba ki taani leni Uri Hititi buolu yua.

¹⁸ Joabi den soani Davidi kani o tondo wan wani o yaala n tieni bu toabu po kuli.

¹⁹ O den yedi o tondo yeni: «A yaa togidi o bado yaala n tieni tieni kuli ki gbeni,

²⁰ li fidi o pali n fii wan yedi: ‹Be yaa po ke yi nagini u dogu yeni ki tuogi leni ba? Yii bani ke bi se u dogu bilinciamu yuli po ki toa i piemi yo?

²¹ Ŋme den kpa Jelubeseti bijua Abimeleki, pua ka den se u dogu bilinciamu yuli po ki lugidi o li bindicabili? Laa poagilima ka den kpa o Tebetisi dogu nni? Be yaa po ke yi nagini u bilinciamu?› Lanwani, ŋan yedi o: ‹A naacemo Uri, Hititi buolu yua yeni moko kpe!› »

²² O tondo den fii ki gedi. Wan den pundi Davidi kani, o den togidi o Joabi n den yedi o yaala kuli.

²³ O den yedi Davidi: «Bi niba yeni den pa ki cie ti ki ñani ki tuogi leni ti bu toabu i kuani nni. Ama ti den deli ba hali ki pundi u dogu bilinciamu buliñoabu kani.

²⁴ A dabantuada den sedi u bilinciamu yuli po ki toani ti ke fini o bado naacenba siiga bi nitianba kpe. A naacemo Uri, Hititi buolu yua yeni moko kpe.»

²⁵ Davidi den yedi o tondo: «Goa ki ban paagi Joabi pali ki yedi o: ‹Da yagi a yama laa bonla po, kelima yogunuba ki jugisiega baa kpa napo yaa niba, yogunuba mo napo yaa yaaba. Paagi a pali ki go tuogi leni u dogu yeni ki bolini u.› »

²⁶ Uri pua n den gbadi ke o calo kpe, o den mua o po i kumoe.

²⁷ O calo Uri kuuma pabiidili n pendi, Davidi den soani ke bi taa o ki cuani o o deni. O den tua o pua ki mali o po bonjaga. Davidi n den tieni yaala yeni den biidi o Diedo pali.