2 Samueli 10 - U TIENU MAAMA TILI 2013

Bi fiagi Davidi koanbala

¹ Lan den waagi waamu, Anmoni bado den guani. O bijua Hanuni den tua bado ki gaa o baa kaanu.

² Davidi den yedi: «N baa ŋanbi Nahasi bijua Hanuni po nani o baa n den ŋanbi n po maama.» Lanwani, Davidi den soani o koanbala ban ban baagi o o baa kuuma po. Davidi koanbala n den pundi Anmoni buolu diema nni,

³ Anmoni buolu koanbala den yedi bi canbaa Hanuni: «A tama ke Davidi bua ki kpiagi a baa yo ki soani o koanbala ban baagi a? Laa tie ke ban gaani u dogu nni ki bandi u, ki yuandi ki bolini u ka ke o soani o koanbala a kani?»

⁴ Lanwani, Hanuni den teni ke bi cuo Davidi koanbala ki kuo bi langbiadi boagidima, ki jia jia bi tiayiekaadi siiga nni ki pundi hali bi pana juodima. Li yaa puoli, o den cabi ba.

⁵ Davidi den gaa laabaali ki soani a tonda ke bi tuogi ba kelima bi den ye leni i fe hali boncianla. Davidi den teni ke bi waani ba ke ban sedi Jeriko hali bi langbiadi n guani ki pudi no, ban nan yuandi ki kpeni.

Davidi tuogi Anmoni leni Siiri yaaba bu toabu

⁶ Anmoni buolu den laa bi yama nni ke bi fiini Davidi pali, ki teni ke o nani ba. Lani yaa po, bi den taa Siiri yaaba, yaaba n ye Beti-Lehobi leni yaaba n ye Tisoba siiga taacenda tuda piilie (20 000), Maaka bado yaa kani toatieba tudili, Tobi yaa niba yaa kani mo piiga n tudalie (12 000), ki baa pa ba i ligi.

⁷ Davidi n den gbadi lani, o den teni ke Joabi, bi toatieba leni a jakoanda kuli, gedi ki ban tuogi ba.

⁸ Anmoni buolu den ñani ki sedi ki caligi bu buliñoabu kani bu toabu po. Siiri yaaba, yaaba n ye Tisoba, Rehobi, Tobi yaa niba leni Maaka yaaba mo den paadi bi baa ki ban ye li fuali nni.

⁹ Joabi den sua ke o baa yaa tiendi bu toabu o nintuali leni o puoli kuli. Lanwani, o den gandi Isidayeli jakoanda siiga yaaba n pa ki cie ki tieni toagoli yaali n baa tuogi leni Siiri yaaba.

¹⁰ O den tuni o naataanu Abisayi yaa toatieba n sieni kuli yuli, ki teni ke bani mo baa tuogi leni Anmoni buolu.

¹¹ O den yedi o naataanu: «Siiri yaaba yaa pa ki cie nni, ŋan cua ki todi nni. Anmoni buolu mo yaa pa ki cie ŋa, n baa cua ki todi a.

¹² Ŋan paagi a pali. Tin koani leni mi jama ti niba po leni ti Tienu dogi po. O Diedo mo n tieni yaala n dagidi o po.»

¹³ Joabi leni o toatieba den nagini ke bi baa tuogi leni Siiri yaaba. Siiri yaaba den lebidi ki sani.

¹⁴ Anmoni buolu n den laa ke Siiri yaaba lebidi ki sani, bani moko den lebidi ki sani Abisayi nintuali, ki kua u dogu nni, Joabi den lebidi ki cedi Anmoni buolu ki guani ki kuni Jerusalemi.

¹⁵ Siiri yaaba n den laa ke Isidayeli yaaba paadi ba, bi den taani bi toagola kuli.

¹⁶ Hadadeseri den soani ke bi ban yini Siiri yaaba, yaaba n den ye u kpenciamu Efrati duoli. Bi den cua Elami. Hadadeseri toatieba yudaano Sobaki den tugi bi yuli.

¹⁷ Bi den waani Davidi. O den taani Isidayeli yaaba toatieba, ki duodi Jurden kpenu ki gedi Elami. Siiri yaaba den bogini ki tuogi leni Davidi.

¹⁸ Ama Siiri yaaba den gbali Isidayeli yaaba ki sani. Davidi den kpa toateliti kobilele gobidikaaba leni tanjagiba tuda piinaa (40 000). O den pua bi yudaano Sobaki ke o kpe lankani.

¹⁹ Hadadeseri n den die yaa badiba kuli n den laa ke Isidayeli yaaba paadi ba, bi den guani ki mangi leni bani Isidayeli yaaba, ki teni ke bi diedi ba. Siiri yaaba ki go den tuo ki todi Anmoni buolu.