2 Samueli 1 - U TIENU MAAMA TILI 2013

Davidi dini li bali Juda buolu po 1—4 Davidi gbadi Sayuli kuuma

¹ Davidi n den paadi Amaleki yaaba ki guani o deni Tisikilagi, li den sua ke Sayuli kpe no. Wan den tieni likani danalie,

² o joa den ñani Sayuli toanagili po ki cua Davidi kani li dataali daali. O paboanli po, o den padi o tiadi ki wuli o yuli po mi tama. Wan den pundi Davidi kani, o den labini ki pugi o.

³ Davidi den buali o: «A ñani le?» O den guani ki yedi o: «N ñani Isidayeli yaaba toanagili nni ki sani ki cia.»

⁴ Davidi den buali o: «Be n tieni lipo? Waani nni.» O den guani ki yedi o: «Isidayeli yaaba ñani bu toabu nni ki sani. Bi niba boncianla kpe. Ba Sayuli o baa leni o bijua Jonatan kuli kpe.»

⁵ Davidi den buali yaa jawaalo n cuani laabaali yeni: «A bandi lede ke Sayuli leni o bijua Jonatan kuli kpe?»

⁶ O jawaalo yeni den guani ki yedi o: «N den li jagi Giliboa juali po, ki laa ke Filisiti yaaba toateliti leni bi tandanba kuli kpaa ki cebini Sayuli, ke o caani o kpaanli ki labini li po.

⁷ O den gbegi ki laa nni ki yini nni. N den yedi: ‹Mini nne.›

⁸ O den yedi nni: ‹A tie ŋme?› N den guani ki yedi o: ‹N tie Amaleki yua.›

⁹ Lanwani, o den yedi: ‹Nagini ki kpa nni kelima n nunga fu ba ke li daa naaninni ke n baa kpe.›

¹⁰ N den nagini o ki kpa o kelima wan den baa ki poagili maama, n den bani ke o kan go yaa ye. N den ñani o yuli po ki badifogiliga ki pidi o biali ki cuani li kuli fini n daano kani.»

¹¹ Davidi den cuo o tiadi ki padi. Yaa niba n den ye o kani kuli moko den cuo bi tiadi ki padi.

¹² Bi den ye leni mi kuuma paboanli ki buudi ki loli bu ñoabu hali ku yenjuagu, kelima Sayuli leni o bijua Jonatan po. Bi go den mua yeni o Diedo niba Isidayeli yaaba po, kelima bi den kpe bu toabu nni.

¹³ Davidi den buali yaa jawaalo n puni o laabaali yeni: «A tie lepo yua yo?» O den guani ki yedi o: «N tie nilamo, Amaleki buolu.»

¹⁴ Davidi den yedi o: «Be n teni ke a tandi a nuu ki kpa o Diedo n gandi yua ki naa jie?»

¹⁵ Davidi den yini o naacenba siiga nni yendo, ki yedi o: «Nagini ki kpa o.» O joa yeni den pua Amaleki yua ke o kpe.

¹⁶ Davidi den yedi: «Ŋan bi yedi ke a kpa o Diedo n gandi yua yeni, a ñoabu n cuo ŋa. Lani yaa po, a soama tagili n guani ki baa a yuli po.»

Davidi wanli Sayuli leni Jonatan kuuma po

¹⁷ Davidi den ñani Sayuli leni o bijua Jonatan po bu kuyanbu.

¹⁸ O den teni ke bi bangi bu Juda yaaba. Bu yeli tie li dabanli yanbu. Bu diani ban den yi yua o Niteginka tili nni. Buni n tie ne:

¹⁹ Isidayeli diema yaaba, bi ku yi jakoanda! Bani yaaba n bi tie yi kpiagidi, yi juana po! A jakoanda yudanba n kpe maama ne te?

²⁰ Da kpaani mani laa laabaalo Gati dogu niinni! Da doagidi mani laa laabaalo Asikalon dogu sani nni, Ke Filisiti yaaba bisiaba n da mangi bi pala lipo, Bani a jifola yeni bisiaba n da gbengi bi yula lipo!

²¹ Yinba Giliboa juana, Mangu bi taaga n da go suodi yi po! Yi kuani n da go luoni bonluonkaala! Kelima bi jagini yi yula po yo, ki fiagi a jakoanda gbankoanditi! Ba Sayuli yaa gbankoandigu moko, bi den fiagi li, Kelima baa go duundi mi kpama ki ŋanbidi li.

²² Mi soama n den wuliti naani, A jakoanda kpama n den ña naani, Jonatan dabanli ki den guani puoli ba yenma. Sayuli jugisiega mo ki den guani ki ŋuuni fanma.

²³ Sayuli leni Jonatan den bua biyaba bi miali dana nni kuli. Ba mi kuuma nni, baa paadi leni biyaba. Bi den jaligi ki cie jiebaninba, Bi fidu den cie i yangbanli yuu.

²⁴ Isidayeli diema bisiaba, yaa mua mani Sayuli po, Wani yua n den yiendi yi ti tiamoanŋandi, Ki joangi yi tiadi wula ti jafandi po.

²⁵ A jakoanda yudanba n kpe bu toabu siiga maama ne te? Jonatan n kpe yi juana po maama ne te?

²⁶ N buado Jonatan, n ye leni li paboanli kelima a po, Fini n den tie n pamanli kuli, A buama n po den tie bonmoanla ki cie bi puoba yaa buama.

²⁷ A jakoanda yudanba n kpe maama ne te? Bi jatiadi n bodi maama ne te?