2 Pieri 3 - U TIENU MAAMA TILI 2013

Jesu guacuama 3 O Diedo guacuama ñoanianu

¹ N buakaaba, line n tie min diani yi po yaa tilieli. A tilieda yeni nni kuli, n moandi ki tiadi yi yaala n baa tigini yi yantiana, yin yaa tia yaala n tiegi bonŋanla.

² Yin yaa tiadi bi saawalipuaba yaaba n gagidi ki ŋani n den soagindi yaa maama hali yogu po, ki go yaa tiadi o Diedo ti Candaano bali maama, yi tondiba n den wangi yaama.

³ Yin tuodi ki bandi ke mi juodima yogunu, li ñuali danba baa cua leni bi ñuali, bani yaaba n ŋua bi gbanandi bonbuakaala.

⁴ Bi baa yaa tua yi: «Waa den niani u ñoanianu ke o baa guani ki cua te? O nan ye le? Hali ti yaajanba n kpe, ki taa ki pundi hali moala, li bonla kuli tie nani lan den tie maama, mi tagima cilima yogunu yeni.»

⁵ Ba ke bi bani, bi yen sundi bi yama po, ke hali yogu U Tienu den maadi o maama ke tanpoli tagi, ke ki tinga mo ñani mi ñima nni, ke mi lindi ki cebini ga.

⁶ Li tie laa bonla po yo, ke o ŋandunkpialo den bodi, kelima mi ñima den milini o cain.

⁷ U Tienu maama yeni baa yaa kubi tanpoli leni yaa tinga n ye moala, ki sieni la u mu po, hali ti buudi daali leni U Tienu yiekaaba bolinma daali.

⁸ N buakaaba, bonyenla n ye, ke laa ŋani yin sundi la. Lani n tie: O Diedo po dayenli tie nani bina tudili, ke bina tudili mo tie nani dayenli yeni.

⁹ O Diedo baa kuani o ñoanianu moala, ba ke bi nitianba nua ke o waagidi. Li tie ke o pia yi po li juunle, kaa bua ba niyendo n bodi, ama ke bi niba kuli n lebidi bi pala.

¹⁰ O Diedo daali baa cua ki ludi bi niba, nani o suudo yeni. Landaali, tanpoli baa bodi leni ku fuciangu. Yaala n ye lienni kuli baa cuo u mu, ki nandi. Ki tinga leni yaala n ye lienni kuli mo baa cuo, ki buodi.

¹¹ Lanwani, nani laa bonla kuli n baa nandi ki bodi yeni, li pundi yi tagu n gagidi ki yaa ŋani, ki go tuo U Tienu n yaa die yi cain.

¹² Yin yaa guu wani U Tienu daali cuama, ki yaa tiendi yaala n baa teni li daali yeni n jaligi ki cua. Landaali, tanpoli kuli baa cuo ki buodi, yaala n ye kuli baa nandi.

¹³ Ama ti guudi o tanpopaano leni ki tinpanga, mi teginma n baa yaa ye naankani, nani o ñoanianu n yedi maama.

¹⁴ Lanwani, n buakaaba, nani yin guu laa bonla kuli yeni, yin moandi o yaa cua, wan sua ke yii pia joagindiba leni tagiliba kuli, ama ke yi pia mi yanduanma leni o.

¹⁵ Yin yaa nua ke ti Diedo n pia yaa juunli tie yi tindima po, nani ti kpibuado Poli moko n den diani yi po maama, ki ŋua U Tienu n den puni o yaa yanfuoma.

¹⁶ O dangi yeni o tila kuli nni, wan maadi laa bonla maama yaa yogunu. Ama lienni pia yaa maama yaa gbadima n pa. Bi nitianba, yaaba n tie yanboandanba ki naa go se ke li pa, ŋmiagidi ki golindi li bundima, nani ban tiendi maama leni yaa Diani n sieni bi bodima po.

¹⁷ Lanwani n buakaaba, kelima yi tuodi ki bani laa bonla kuli, yin yaa fangi yi yula, ke U Tienu yiekaaba n da dadi yi bi yaadima nni, ke yi kan go yaa se ke li pa.

¹⁸ Ama yin yaa suagi liiga ti Diedo leni ti Candaano Jesu Kilisiti yaa ŋanbili nni leni o yaa bandima nni, ki pugidi. Wani n yaa baadi ti kpiagidi moala leni yaa yogunu kuli. Amina!