2 Pieri 2 - U TIENU MAAMA TILI 2013

Bi bangi-faadanba 2

¹ Nani bi saawalipua-faadanba n den ye Isidayeli yaaba siiga maama, bi bangi-faadanba moko baa yaa ye yi siiga yene. Bi baa boandi ki kuani mi bangifaama yaama n bia yi siiga. Laa bangima baa bolini bi niba. Bi baa yie ba o Diedo yua n den daa ki faabi ba, ki jaligi ki cuani bi yula po mi bolinma.

² Bi cancaginyema nni, niba boncianla baa ti ŋoadi ba, ki teni bi niba n yaa sugidi i moamoani sanu.

³ Bi bangi-faadanba yeni ŋaliŋabuama po, baa teni ban yaa boandi yi leni bi bangifaama, ki baadi yi kani li baali. Bi buudi cuonu peli ki bili bi po hali yogunu, bi bolinma mo kan go waagi.

⁴ U Tienu naa den cedi yaa malekinba n den tieni ti tuonbiadi, ama o den luni ba li biigili yaa kuli nni, ban kubi ba naankani hali ti buudi daali.

⁵ Waa den cedi o ŋandunkpialo moko, ama o den faabi Nowe yua n den tie mi teginma mawangika leni nibilele, wani U Tienu n den soani ki tabolinkaaga ŋanduna nni bi niyiekaaba po yaa yogunu.

⁶ Wani U Tienu go den buni ki cuo Sodomi leni Gomori dogi, ki buoni yi ke yi tua fantanpienma. O den teni ke i dogi yeni tua nannanli, U Tienu yiekaaba yaaba n baa yuandi ki cua po.

⁷ Ama o den gaa Loti miali, wani yua n den tie niteginka, ki yagini o yama boncianla kelima laa nibiadiba cancaginyema po.

⁸ Daali kuli laa niteginka den ye bi siiga leni ti yanyagiciandi, kelima wan nua ki go gba ke bi tiendi yaa biadima po.

⁹ Lani kuli yaa po, ti laa ke o Diedo bani ki faabi yaaba n fangi o leni mi biigima, ki go bani ki sieni yaaba n ki tiegi, ki faligi ba ti buudi daali.

¹⁰ O buudi cuonu n baa cuo yaaba ki cie, tie yaaba n ŋua bi gbanandi bonbuakaala yaala n joagini, ki go fali o Diedo bali. Laa bangi-faadanba pia ti japaadi leni yaa tuli n pa, kaa jie, ki sugidi ba malekinba yaaba n pia ti kpiagidi.

¹¹ Ba malekinba yaaba n pia u fidu leni u paalu ki cie bi bangi-faadanba yeni, kan sugi ba, ki buali ban kuli ba o Diedo kani.

¹² Ama laa niba tie nani ti yandi yeni, yaadi n ye ban cuo ki kodi po. Bi sugidi ban ki bani yaala. Bi baa kpa ba nani ti yandi yeni.

¹³ Bi go baa baa ban tieni yaa biadima kuli yaa panpaani. Bi mangidi bi pala ki tiendi bi bonbuaka-biadila, ba u yensiinu, ki biidi, ki go joagini. Bi go mangidi bi pala ban boandi yi, ki di leni yi yaa yogunu.

¹⁴ Bi nua mi conconma nuni, ki kan tieni tuonbiadi ki guo. Bi gbie leni mi ŋaliŋabuama, ki boandi ki dadi ki guliti yaaba n tadi. U Tienu solindi jagi bi yula po.

¹⁵ Bi ŋaa yaa sanu n tiegi, ki yaadi ki ŋoadi Beori bijua Balaam n den tagi yaa sanu, wani yua n den bua ki baa yaa panpaani n ki tiegi.

¹⁶ Ama o ŋunñua, yaa yanga n ki maadi, den funi leni o o tagili po, ki maadi nani o nisaalo n maadi maama, ki teni ke o saawalipualo yeni yanpiima sedi.

¹⁷ Bi bangi-faadanba yeni tie nani yaa ñinbuna n kaa go pia ñima, ki go tie nani ku tafaaciangu n figi ki kaadi yaa tawala yeni. U Tienu n bili bi po yaa kaanu n tie li biigicianli.

¹⁸ Bi pia ti japaadi, ki maadi yaa macianma n ki pia mayuli. Bi boandi ki dia leni ti gbanandi bonbuakaala, yaaba n faabi leni bi niyaadikaaba yeginu, ke li daa waagi.

¹⁹ Bi niani ba ke bi baa baa mi faabima, ama bani bi ba tie ti joagindi yonbi, kelima nilo kuli tie yaala n die o yaa yonbo.

²⁰ Li yaa tie ke yaaba n den faabi leni ŋanduna joagindi kelima ti Diedo, Jesu Kilisiti o Candaano yaa bandima po, bi yaa go kua lienni ke ti paadi ba, bi juodima baa yaa bia ki cie bi cilima.

²¹ Bi yàá den bandi mi teginma sanu, li den baa yaa tu bi po ki cie ban bandi ki lebidi ki ŋaa ban den baa yaa bali maama, yaama n gagidi ki ŋani.

²² Li tie bi po nani yaa kpanjama n tie ne n yedi yaala: «O sangbanlo guani ki dini o siindi.» Li go yedi: «Bi wali o duoñua ke o guani ki labini ti moamoadi nni.»