2 Pieri 1 - U TIENU MAAMA TILI 2013

U Tienu yiinu 1 I fuondi

¹ Mini Simon Pieli, Jesu Kilisiti naacemo leni o tondo, n diani li tili yi po, yinba yaaba n taa leni ti ki baa yaa dandanli n tie bonmoanla, kelima ti Tienu leni Jesu Kilisiti ti Candaano teginma po.

² Li ŋanbili leni mi yanduanma n yaa pugidi yi po boncianla, kelima U Tienu leni ti Diedo Jesu yaa bandimoanma po.

U Tienu yiinu leni o gandima

³ U Tienu paalu po, o den puni ti li bonla kuli yaala n baa todi ti li miali nni leni U Tienu tuoma nni, ki teni ke ti bandi wani yua n den yini ti, o kpiagidi leni o ŋanbili po.

⁴ Li tie lani yaa po yo, ke o puni ti wan den niani yaa ñoaniani, yii n tie bonmoanla, ki taani ti leni U Tienu, ki faabi ti leni ti gbanandi bonbuakaala n cuani yaa joagindi ŋanduna nni.

⁵ Lani kuli yaa po, yin moandi ki yaa pugidi yi dandanli po u tagiŋamu, ki yaa pugidi u tagiŋamu po mi bandima,

⁶ ki yaa pugidi mi bandima po li yukubili, ki yaa pugidi li yukubili po li juunli, ki yaa pugidi li juunli po U Tienu tuoma,

⁷ ki yaa pugidi U Tienu tuoma po mi buama yi kpiiba po, ki go yaa pugidi mi buama yi kpiiba po mi buamoanma.

⁸ Laa bonŋanla yaa ye yi niinni ki pugidi, li baa teni yin yaa tuuni, ki go teni yin yaa kpedi ti Diedo Jesu Kilisiti yaa bandima nni ki pugidi.

⁹ Ama yua n ki pia la, o tie juamo, ki sundi ke U Tienu ñani o po wan den tieni yaa tuonbiadi hali yogu, ki ŋanbi o.

¹⁰ Lani yaa po, n kpiiba, yin moandi ki cie mi kpiama, ki teni U Tienu n yini yi ki gandi yi maama n yaa se ki pa bonŋanla. Yi yaa tiendi yeni, yi kan tuudi ki baa abada.

¹¹ Yeni, yi baa baa ki kua U Tienu n luodi ki yaani yi po ti Diedo leni ti Candaano Jesu Kilisiti diema, yaama n kan pendi abada yaa niinni.

¹² Li tie lani yaa po ke n baa yaa tiadi yi laa bonla yogunu kuli, ba ke yi bani la, ki go se ke li pa yin baa yaa moamoani nni.

¹³ Hali ke n da ye n gbandieli yaali n tie n gbanandi nni, n sua ke li ŋani min tigini yi leni laa tiadima.

¹⁴ N bani ke li kan go waagi ke n baa ña n gbandieli yeni nni, nani ti Diedo Jesu Kilisiti n den doagidi n po maama.

¹⁵ N go baa tieni ania ki teni ke n yàá ti ye, yin fidi ki yaa tiani laa bonla po yogunu kuli.

Ti den laa Kilisiti kpiagidi

¹⁶ Tin den waani yi ti Diedo Jesu Kilisiti guacuama leni o paalu maama, tii den ŋua bi niba n bungi ki ñani yaa telimi leni bi nunfanbu ka. Ama ti den laa o bali kpiagidi leni ti nunceli.

¹⁷ O den baa ti jigidi leni ti kpiagidi U Tienu yua n tie Baa kani. Li den tie u nialu ñani U Tienu bali kpiagidi nni yaa yogunu, ki yedi: «One n tie n Bibuadiga, n pali n mani yua yaa po hali boncianla.»

¹⁸ Tin den ye leni o yaa juali n gagidi ki ŋani yuli po yaa yogunu yo, ke ti den gbadi ke u nialu yeni maadi tanpoli po.

¹⁹ Lanwani, ti dugi ke bi saawalipuaba maama tie moamoani cain. Li pundi yin fangi laa maama bonŋanla. Mi tie nani yaa fidisanga n yendi yaa kaanu n biigi nni yeni, hali lan baa faa mi yenma n yendi, ki tiŋaaŋmabiga mo n pudi yi pala nni.

²⁰ Yaala n tugi li yuli tie line: Yin bandi ke oba kuli kan fidi ki bundi ba mayenma yaa saawali maama n ye i Diani nni o yuli po,

²¹ kelima saawali maamiba kuli ki den tieni o nisaalo yanbuama po. Ama, U Tienu Fuoma Yua n den tudi ba ke bi maadi U Tienu n yedi yaala.