2 Korenti 3 - U TIENU MAAMA TILI 2013

O Ŋantaadipaano tuonsoanba

¹ Naani ti didi go baa cili ki yaa tiendi ti yula po siedi? Bi ti baa bua yi kani, yaa tila n baa tieni ti po siedi, nani nitianba n tiendi maama? Bi ti baa mia yinba n diani ti po laa tila?

² Yinba yi ba n tie ti po laa tili, yaali n diani ti pala nni, bi niba kuli n bandi ki go cogi yaali.

³ Li doagidi bi niba kuli po, ke yi tie Kilisiti tili, tin soani yaali. Laa tili naa den diani leni tidianñima ka, ama leni U Tienu yua n fo yaa Fuoma. Lii den diani a tana yaa walimu po ka, ama ti gbanandi yaa walimu po, lani n tie yi pala nni.

⁴ Lani n tie tin pia yaa dugidi U Tienu po kelima Kilisiti yaa po.

⁵ Laa tie ke ti tama ke ti fidi ki tieni liba kuli ti yucela po. Ama tin fidi yaala kuli ñani U Tienu kane.

⁶ Wani n teni ke ti dagidi ki tua o Ŋantaadipaano tuonsoanba ke laa ŋua leni ban den diani yaa bali maama, ama ke li ŋua leni U Tienu Fuoma. Ban den diani yaa bali maama kpendinni mi kuuma, ama mi Fuoma puuni li miali.

⁷ Lanwani, li yaa tie ke ban den diani yaa bali maama mu tanpabimu po, mani yaama n kpendinni mi kuuma yaa den pia ti kpiagidi, hali yaala ke Isidayeli yaaba kan den fidi ki diidi Musa nunga, kelima laa kpiagidi yaadi n baa pendi yeni, n ñuliti maama po,

⁸ laa pia kuli tama ke U Tienu Fuoma n soani yaa tuonli baa yaa pia ti kpiagidi ki cie.

⁹ Li yaa tie ke ti buudi cuonu tuona den pia laa kpiagidi, laa pia kuli tama ke li moamoansaali yaa tuonli baa yaa pia ti kpiagidi hali boncianla ki cie.

¹⁰ Lani yaa po, yaala n den kpa pia ti kpiagidi naa tie puu, a yaa biigi ti leni ti naa kpiagidi, yaadi n cie boncianla yeni po.

¹¹ Yaala n den tie bonpendikaala yaa den pia ti kpiagidi yeni, yaala n ye ki kan pendi abada baa yaa pia ti kpiagidi boncianla ki cie.

¹² Li tie ke ti pia laa suginma po yo, ke ti ye leni ti dugidi.

¹³ Tii tiendi nani Musa ka, wani yua n den fingi o nunga li cabili, ke Isidayeli yaaba n da noanli laa kpiagipendikaadi juodima.

¹⁴ Ama bi yama den pii. Hali dinla, bi yaa cogi o Ŋantaadikpelo Diani, laa cabili baa ki ye. Li kan pigidi, li yàá tie Kilisiti nni bebe yaa ka.

¹⁵ Hali dinla, bi yaa cogi Musa tila, li cabili pii bi pala.

¹⁶ Ama, bi yaa lebidi bi pala ki diidi o Diedo yaa yogunu, li cabili yen pigidi.

¹⁷ Nekanba lan yedi o Diedo yeni, li bagi mi Fuome. O Diedo Fuoma n ye naani mo, mi faabima mo ye lankane.

¹⁸ Tinba yaaba yaa nunmu n pigidi, ke bi nua ti niinni o Diedo kpiagidi n ñuliti maama, U Tienu lebidi ti ke ti naani leni wani o Diedo yeni, ki baadi ti kpiagidi ki pugidi pugidi. O Diedo yua n tie mi Fuoma n tiendi lani kuli.