2 Korenti 2 - U TIENU MAAMA TILI 2013

¹ Lanwani, n den jagi ki bili ke n kan guani yi kani, ke min da go biidi yi pala.

² N yaa biidi yi pala, ŋme n baa mangi n pali, li yàá tie yinba, min biidi yaaba yaa pala yaa ka?

³ N den diani yi po yeni, kelima mii den bua ki baa li pabiidili yinba yaaba n mangidi n pali yaa kani. N dugi yi po ke n pamanli tie yikuli yaa pamanli.

⁴ N den diani yi po leni li pabiidili, li paboanli leni ti nunsiidi boncianla, laa den tie ke n bua ki biidi yi pala ka, n den bua ke yin bandi min pia yi po yaa buacianme.

Sugili yua n tudi po

⁵ Niloba yaa den tieni yaala n cuani li pabiidili, laa tie ke o biidi mini bebe yaa pali ka, o biidi yikuli yaa pala yo, yaa ka min yedi yi siiga nitianba yaa pala, ke min da ti maadi ki pendi.

⁶ Boncianla yi siiga n den funi leni laa nilo, ki paadi leni o yeni dagidi,

⁷ ke li ji pundi moala yin tieni o po sugili ki baagi o, ke li pabiidicianli n da ti je o.

⁸ Lanwani, n mia yi ke yin doagidi o po yi buama.

⁹ Min den diani yi po yeni, li tie ke n den bua ki biigi yi, ki bandi yi yaa baa tuo ki yaa tiendi min yedi yaala kuli.

¹⁰ Yin tieni yua yaa po sugili, nmoko tieni o po sugili. Min tieni yaala yaa po sugili, li yaa tie ke n pia min baa tieni yaala yaa po sugili, n tieni la Kilisiti nintuali, kelima yi yaa po,

¹¹ ke Sutaani n da ti fidi ti, kelima ti bani o jagibiada po.

Poli yanyagidi Troasi dogu nni

¹² Min den pundi Troasi dogu nni Kilisiti Laabaaliŋamo po, ba ke o Diedo den luodi n po u sanu likani po,

¹³ mii den pia yanduanma, kelima mii laa n kpiilo Titi. Lani yaa po, n den cabi Troasi yaaba, ki gedi Maseduani diema po.

Ti baa koani ki paadi kelima Kilisiti po

¹⁴ Tin yaa tuondi mani U Tienu, wani yua n teni ke ti paadi yogunu kuli Kilisiti nni. O teni ke ti yadi i kaani kuli, o bandima nuulumanu.

¹⁵ Ti tie U Tienu po nani Kilisiti nuulumanu yeni, ki go tie yeni yaaba n ye mi tindima sanu nni leni yaaba n ye mi bodima sanu nni po.

¹⁶ Yaaba n ye mi bodima sanu nni yaa po, laa nuulu tie mi kuuma nuulu, ki caani mi kuuma po. Yaaba n ye mi faabima sanu nni yaa po, laa nuulu tie li miali yaa nuulu, ki caani li miali po. Ŋme n dagidi laa tuonli po?

¹⁷ Tii tie nani bi niba boncianla, yaaba n lebidi U Tienu maama, ke man tua baali bi po. Ama tinba, ti maadi U Tienu po leni li payenli, wani U Tienu nintuali, Kilisiti nni.