2 Korenti 11 - U TIENU MAAMA TILI 2013

Poli maadi bi tondifaadanba maama

¹ N bi bua yin juuni leni nni min maadi yi po mi yanluomaama waamu. Lanwani, juuni mani leni nni!

² N pia yi po U Tienu nunponli buolu, kelima n den bua ki caa yi jayendo, ki teni yi Kilisiti, nani yaa puowandiali n ŋani cain yeni.

³ Ama n jie, nani o wa n den boandi Awa leni o nunfanbiadibu maama, ke ban da ti biidi yi yantiana, yin yaadi ki ŋaa Kilisiti, yin bua yua leni payenli yeni.

⁴ Niloba yaa cua yi kani ki wangi yi Jesutoa, tin kaa waani yi yua, bi yantiatoali, yin ki den kpa baa U Tienu Fuoma kani yaali, bi ki ŋua yaa laabaaliŋamo n ki taa leni yin den kpa ŋua yua, yi yen juuni ki tuo ki gaa lani kuli bonŋanla.

⁵ Mii tama ke yaaba n nua bi yula ke bi tie bi tondicianba yeni, cie nni ba waamu.

⁶ N yàá tie mabanlo, n pia mi bandima wani. Yogunu kuli, ti den doagidi yi po lane, li bonla kuli nni.

⁷ Naani n den tudi leni min jiini n yuli, ki fiini yi, min den wangi yi U Tienu Laabaaliŋamo fanma kaa gaa panpaani yeni?

⁸ N den kpabidi Kilisiti Nitaana kaanto, ki tuo ki gaa bi paabu kelima yi todima po.

⁹ Ama min den ye yi siiga leni mi luoma, mii den tie oba kuli po tugili. Ti kpiiba, yaaba n den ñani Maseduani ki cua Korenti, den puni nni yaala n poadi n po kuli. N den kubi n yuli kaa tua yi po tugili bonliba kuli nni. N go yaa baa tiendi yene.

¹⁰ Kilisiti moamoani yii n ye n niinni yaa po, oba kuli kan fidi ki yie n po ke n kan kpiagi n yuli li po Akayi diema nni.

¹¹ Be yaa po ke n yedi yeni? Li tie ke mii bua yi bi? U Tienu bani ke n bua yi.

¹² N go baa tiendi nani min tiendi maama moala, ke yaaba n bua ki kpiagi bi yula, ki go bua bi niba n yedi ke bi da leni tinba n da pia magbaali.

¹³ Laa niba tie bi tondifaadanba, yaaba n tuuni ki boandi bi niba, ki moandi ki naani leni Kilisiti tondiba.

¹⁴ Ban tiendi yaala yeni naa pia pakili, kelima Sutaani oba moandi ki naani leni mi yenma maleki.

¹⁵ Lanwani, laa pia pakili o tuonsoanba moko yaa moandi ki naani leni mi teginma tuonsoanba. Bi juodima baa tua nani bi tuona n tie maama.

Poli n tie Jesu tondo ki laadi yaa falabiado

¹⁶ N go yedi ke niloba n da nua ke n tie yanluodaano. Ba yeni mo, tuo mani ke n tie yanluodaano, ke min baa ki kpiagi n yuli waamu.

¹⁷ Min maadi maama ki pagi n yuli leni li papaali yeni, mii maadi nani o Diedo n baa maadi maama ka, n maadi nani o yanluodaano yene.

¹⁸ Bi niba boncianla kpiagidi bi yula nani bi nisaaliba n nua maama, lani yaa po nmoko baa yaa kpiagidi n yuli.

¹⁹ Yinba yaaba n tie bi yanfuodanba, yi tuo ki juuni leni bi yanluodanba.

²⁰ Yi tuo ban kuani yi ti yonbidi nni, ki je yi, ki fagi yi, ki fali yi, ki pabi yi.

²¹ Li pia n po i fe min yedi yeni: Tin den ye yi siiga, ti den dingi ki kan fidi laa bonla. Ama o nilo n baa tuo ki kpiagi o yuli yaala yaa po kuli, n maadi nani o yanluodaano yeni, nmoko baa fidi ki kpiagi n yuli lani yaa po.

²² Bani, bi tie Hebilunba ka? Nmoko tie yene. Bi tie Isidayeli yaaba ka? Nmoko tie yeni. Bi tie Abalahama puoliŋuani ka? Nmoko tie yene.

²³ Bi tie Kilisiti naacenba ka? N maadi nani o gaado yeni, nmoko tie yene, ki cie ba. Li tuonli po, N cie ba boncianla, A kpaadidiena kuama po, N cie ba boncianla, Ti puadi po, N cie ba boncianla. I yogini boncianla Mini leni mi kuuma ki den foagi.

²⁴ Jufinba den pua nni piitaa n puadiyia yia taalimimuu.

²⁵ Taalima taa bi den pua nni leni i baliji. Yenma bi den lugidi nni a tana ki bua ki kpa nni. Taalimitaa n den ye yaa ñinbiaciangu n mia mi ñincianma nni. Yenma n den ye mi ñincianma nni yentunmunli leni li ñiagu.

²⁶ N den cuoni a sancena boncianla, ki nagini mi kuuma i kpenciami nni, ki go nagini mi kuuma kelima bi sanjiaba po, ki go nagini mi kuuma kelima n buolu Jufinba po leni bi nilanba po kuli, ki go nagini mi kuuma u dociamu nni, mi fanpienma nni leni mi ñincianma nni kuli, ki go nagini mi kuuma yaa tuofaadanba n yedi ke bi tie ti kpiiba ki naa tie yaa po.

²⁷ N den tuuni li tuonli leni li tuonpaali kuli. N den ye leni mi duanoalima, mi koma leni u ñuñuunu. Yaa yogini n yabi, n den ye leni ti jepoadi, ki ye leni ti wadi, ki yen luo ba ti tiayiekaadi.

²⁸ Lani kuli daa taa lienni, yaala n tugi n po yuli n tie Kilisiti Nitaana kuli yanyagidi n mabini nni maama daali kuli.

²⁹ Bi siiga, ŋme n tadi ke mini mo naa tadi? Ŋme n baa ti tuonbiadi nni ke laa juni n pali?

³⁰ Li yaa tie tiladi min kpiagi n yuli, n baa kpiagi li kelima n tadingu po.

³¹ U Tienu yua n tie o Diedo Jesu Baa, wani yua n pia ti pagidi hali yaa yogunu kuli, bani ke mii pua faama.

³² Min den ye Damasi dogu nni, o bado Areta n den dini yua laa dogu bali, den teni ke bi guudi u dogu buliñoajala kuli ki baa cuo nni.

³³ Ama n lieba den teni ke n kua ku baabuogu nni, ke bi ñani nni li dieli bonli u dogu bilinciamu puoli po, ki jiini nni, ke n sani ki cia o nuu nni.