1 Timote 6 - U TIENU MAAMA TILI 2013

¹ Yaaba n ye ti yonbidi lolima nni n yaa nua ke li pundi ban yaa jigindi bi canbaanba, ke bi niba n da sugi U Tienu yeli leni o bangima.

² Yaa yonbi n tuuni yaa canbaanba n daani po n da fali ba, kelima bi tie bi kpiiba po. Ama ban yaa tuuni bi po bonŋanla ki cie, kelima bi tie yaaba n daani ki go tie bi buakaaba. Lani n tie ŋan baa bangi, ki go bili ban yaa tiendi yaala.

Mi bangifaama leni mi ŋalimanbuama

³ Niloba yaa bangi bangitoama, kaa ŋua ti Diedo Jesu Kilisiti mamoanma, yaama tuugi leni U Tienu tuoma,

⁴ o gbie leni ti japaadi ki naa bani puu. O pia i buali leni mi niama mi maama po, ke li tie o po nani u yianu yeni. Lani kuli cuani li nunponli, li koanli, ku tuotabigu leni mi yanmaalibiadima.

⁵ Li go teni ke yaaba yaa yama n biidi, bani yaaba n kaa go kubi i moamoani, nia leni biyaba yogunu kuli. Bi tama ke U Tienu tuoma tie ñuade.

⁶ Moamoani, U Tienu tuoma pia ti ñuadi boncianla, li yaa tie ke o nilo mangi o pali leni wan pia yaala.

⁷ Tii den cua leni liba kuli ŋanduna nni, ti yaa ña lienni mo, ti kan fidi ki taa liba kuli.

⁸ Lanwani, ti yaa pia mi jiema leni ti tiayiekaadi, li baa dagidi ti po.

⁹ Ama yaaba n bua ki tua piada baa baa mi tulinma nni. Bi yankuabiada, ya n ki pia yanfuoma ki baa biidi ba yeni, cuo ba nani u jogidu yeni, ki teni ke bi feli ki bodi, ke li bolini ba cain.

¹⁰ I ligi buama tie bonbiadila buoli kuli yaa jiinu. Bi nitianba den kuani bi yama mi ligibuama nni, ki yaadi ki ŋaa li dandanli, ki kuani bi yula li pabiidicianli nni.

Poli n tundi Timote yaa tundi

¹¹ Ama fini U Tienu nilo, ŋan sani ki ŋaa laa bonla, ki yaa ŋua mi teginma, U Tienu tuoma, li dandanli, mi buama, li juunli leni mi dingima.

¹² Ŋan yaa moa li dandanli yaa muaŋanli, ki cuo yaa miali n kan gbeni, U Tienu n den yini a ke ŋan baa yaali, ŋan den tieni yaa siediŋamo bi niba boncianla nintuali, kelima yaali yaa po.

¹³ N teni a li ñoamabonli U Tienu yua n puni yaala n fo kuli li miali yaa nintuali leni Jesu Kilisiti nintuali, wani yua n den tieni o siediŋamo Ponsi Pilati nintuali,

¹⁴ ke ŋan yaa ŋua min teni a yaa ñoamabonli na cain, ki da tudi ba waamu, hali ti Diedo Jesu Kilisiti n baa doagidi o yuli yaa yogunu.

¹⁵ Li yogunu yaa pundi, U Tienu baa teni o doagidima yeni n tieni, Wani U Tienu yua bebe n pia ti kpiagidi, Yua yaa bali n cie batoali kuli, Wani bi badiba kuli Badiciamo Leni bi diediba kuli yaa Diedo.

¹⁶ Wani bebe n ki pia kuuma, Ki ye miali kuli n kan nagini yaa yenma nni. Miali kuli n daa laa yua, Ki kan fidi ki le o mo. Wani n pia yaa jigidi leni yaa paalu N ki pia gbenma, hali yaa yogunu kuli. Amina!

¹⁷ Ŋan tundi yaaba n tie a piada ŋanduna na niinni, ke ban da pia ti japaadi, ki da piani bi yula bi piama, yaama n ki pia dugidi. Ama ban piani bi yula U Tienu po, wani yua n puuni ti li bonla kuli ke li kandi, ki bua tin mangi ti pala li po.

¹⁸ Ŋan go tundi ba ke ban yaa tiendi yaala n ŋani, ki tiendi a tuonŋama ke li yabi, ke lane n yaa tie bi piama. Ŋan go tundi ba ke ban yaa pia ti bulicindi, bi nii mo n yaa tiani.

¹⁹ Ban yaa tiendi yeni, ki biliti bi yula po o ŋalimanmoano yaa yogunu n baa ti cua po, ki fidi ki cuo li miamoanli.

²⁰ Fini Timote, ŋan yaa guu U Tienu pianli, ki foagidi leni yaaba ki ŋua U Tienu, n pia yaa mafanma. Ŋan foagidi leni yaa niama n ñani bi niba banma, yaama n tie faama yeni kani.

²¹ Bi nitianba ŋoadi laa bonla, ki yaadi ki ŋaa li dandanli. U Tienu ŋanbili n yaa ye leni yikuli!