1 Timote 5 - U TIENU MAAMA TILI 2013

Timote n baa yaa ye leni Kilisiti Nitaanli maama

¹ Ŋan da tundi o nikpelo leni ku fuugu. Ama ŋan tundi o nani o tie a baa yeni. Ŋan tundi bi jawaaba nani bi tie a waamu,

² a puociana nani bi tie a naanba, bi jafanba mo nani bi tie a naataanpola yeni. Ŋan yaa tiendi la leni ku yantugupiengu cain.

³ Ŋan yaa jigindi yaa kpepuona n kaa go pia kubikaaba.

⁴ Li kpepuoli yaa pia a bila, yaa ka a yaabila, li pundi ban bandi ki yaa tiendi yaala n pundi yua n ŋua U Tienu n baa yaa tiendi yaala o danba po, ki guani ba bi ŋanma. Lani n tie yaala n mani U Tienu po.

⁵ Yaa kpepuoli n ye obebe kaa pia kubika, bili o suginma U Tienu kani, ki miadi o u yensiinu leni ku ñiagu kuli, ke wan yaa todi o.

⁶ Yaa kpepuoli n puni o yuli ŋanduna jeligu po kpe, ba ke o da fo.

⁷ Ŋan yaa wangi ba lani kuli, ki tundi ba ke ban da pia ban baa fidi ki kuli ba leni yaala.

⁸ O nilo yàá kubi o niba, yaala n tugi li yuli tie o dieceli niba, o nia li dandanli. O bia ki cie ba yua n kaa daani.

⁹ Ŋan da diani kpepuoli yeli a kpepuona tili nni, kali o pundi bina piiluoba, ki den pia jayendo,

¹⁰ ki tie bi niba n pagi yua o tuonŋama po, ki go tie yua n den wubi a bila, ki gaani bi canba cangu leni mi buama, ki nigidi bi nigagidiŋanba taana, ki todi yaaba n ye leni fala, ki tieni a tuonŋama buoli kuli.

¹¹ Ŋan da tuo ki diani yaa kpepuoli n da paani, kelima o gbanandi yaa paadi o ke o bua ki kuni o joa, o baa lebidi ki ŋaa Kilisiti,

¹² ki baa i tagili nni, ki ŋaa wan den kpa niani yaa ñoanianu.

¹³ Bi go tua bi kpadijedanba yaaba n goadi ki tuadi ti diedi. Laa tie lani bebe, bi go tua bi lanpaadanba leni a tingbangbaaba, ki maadi lan kaa pundi ban maadi yaa maama.

¹⁴ Lani yaa po, n bua ke yaa kpepuona n da paani n kuni bi jaba, ki maa a bila, ki kubi bi diegu ŋantaadi, ki da pa yibali u sanu ban sugi ba.

¹⁵ Ba moala a kpepuotiama lebidi ki ŋua Sutaani.

¹⁶ Yaa pua bi yaa joa n daani yaa pia o danba ke bi tie kpepuona, wan yaa todi ba, ki da tuni Kilisiti Nitaanli laa tugili, ke bi baa fidi ki todi yaa kpepuona n ki pia kubikaaba.

¹⁷ Li dagidi ke Kilisiti Nitaanli nikpela yaaba n gobidi bonŋanla n baa ti jigidi ki cie. Lan pundi yaaba n ba yeni ki cie, tie yaaba n kuandi bi yama U Tienu maama wangima nni leni U Tienu maama bangima nni.

¹⁸ Li diani i Diani nni ki yedi: «Ŋan da yilini o nua ñoabu taakunkumi, wan ŋmaadi ki suodi ti siandi yaa yogunu.» Li go diani ki yedi: «Li pundi o tuonsoanlo n baa o panpaani.»

¹⁹ Ŋan da gaa makuligiba kuli Kilisiti Nitaanli nikpelo po, li yàá tie siedinbilie, yaa ka siedinbitaa yaa ñoana nni.

²⁰ Ŋan fu leni yaaba n tieni ti tuonbiadi bi niba kuli nintuali, ke yaaba n sieni n jie.

²¹ N teni a yaa ñoamabonli n tie ne U Tienu nintuali, Jesu Kilisiti nintuali leni bi malekinba yaaba n gagidi ki ŋani nintuali, ke ŋan yaa ŋua laa maama kuli ki da gagidi bi niba leni biyaba, ŋan tieni bikuli po yenma.

²² Ŋan da jaligi ki maani a nii niloba po, ki da taani leni nitoa o tuonbiadi nni. Fini a ba mo n kubi a yuli, ki yaa ŋani.

²³ Ŋan da go ñu mi ñima bebe, ŋan yaa ñu duven waamu waamu, yaala n baa todi a a tugukoanu po leni yaa yiani n lindi ki co ŋa po.

²⁴ Bi nitianba tuonbiadi doagidi bi niba kuli po, ba ke bi daa biigi ba. Ama nitianba tuonbiadi kan doagidi, kali bi biigi ba.

²⁵ Li go tie yeni leni a tuonŋama, ya n doagidi bonŋanla bi niba kuli po ye, ya n duagi mo kan yaa wuo hali yaa yogunu kuli.