1 Timote 3 - U TIENU MAAMA TILI 2013

Kilisiti Nitaanli gobidikaaba

¹ Yaa maama n tie ne tie mi madugikaama. O nilo yaa lingi ki bua ki tua gobidika Kilisiti Nitaanli siiga, o bua yaa tuonli n ŋani.

² Li tie tiladi ke yua n tie o gobidika Kilisiti Nitaanli siiga, n da pia ban baa fidi ki kuli o leni yaala. Wan yaa pia puoyendo bebe, ki pia mi yansoangima leni u tagiŋamu, ki kubi o yuli, ki gaani bi niba cangu leni mi buama, ki go tie yua n fidi mi bangima.

³ Wan da tie yua n puni o yuli li dañoli, wan da tie yua n bua janjanma, wan yaa tie yua n dingi kaa bua koanli, kaa bua ligi ke li pendi.

⁴ Ama wan yaa tie yua n gobidi o diegu bonŋanla, o bila mo n tuo o maama bonŋanla, ki yaa fangi o.

⁵ O nilo yàá bani ki gobidi wani o ba yaa diegu, o baa gaa lede ki fidi ki yaa guu U Tienu Nitaanli?

⁶ Wan da tie yua n daani ke li daa waagi, ke ti japaadi n da ti diedi o, wan ti baa Sutaani n den baa yaa cuonu nni.

⁷ Li go tie tiladi yaaba n kaa tie Kilisiti Nitaanli yaaba n yaa tiendi o po yaa siedo n ŋani, ke wan da ti le i fe, ki baa Sutaani jogidu nni.

Kilisiti Nitaanli todikaaba

⁸ Li go tie tiladi Kilisiti Nitaanli todikaaba moko n yaa tie bi niba n jigindi yaaba, ban da pia palalie, ki da kuani bi yama li dañoli nni, ki da kuani bi yama yaa ñuadi n pia i fe moko nni.

⁹ Ban yaa kubi li dandanli moamoani, yii n doagidi leni yaa pali siedi n ŋani.

¹⁰ Ban kpa biigi ba, bi yaa sua ke baa pia ban baa fidi ki kuli ba leni yaala, lanwani ban kua bi tuonli nni.

¹¹ Bi puoba moko n yaa tie bi niba n jigindi yaaba, ki da tie tingbangbaaba, ki yaa kubi bi yula, ki tie bi niba n fidi ki dugi yaaba yaa po li bonla kuli nni.

¹² Kilisiti Nitaanli todika n yaa pia puoyendo bebe, ki gobidi o bila leni o diegu bonŋanla.

¹³ Yaaba n tie Kilisiti Nitaanli todikaaba, ki tuuni laa tuonli bonŋanla baa baa ti jigidi leni ti dugiciandi, li dandanli Jesu Kilisiti nni.

Li bondoaginkaala

¹⁴ N diani a po line ki sugini ki cua a kani, ke li kan waagi.

¹⁵ Ama n yàá fidi ki cua tonma, n bua ŋan bandi ŋan baa yaa tiendi maama U Tienu diegu nni. Lani n tie U Tienu yua n fo Nitaanli, lini yaali n tie i moamoani benjielu leni i dasaali.

¹⁶ Oba kan nia ke U Tienu sanŋoadima bondoaginkaala ñua boncianla. Laa bondoaginkaala tie: O den doagidi o yuli ti gbanandi nni. U Tienu Fuoma den saa o po i moamoani, Malekinba den laa o, Bi den wangi o maama i nilanbuoli nni, Bi den daani o ŋanduna nni, O den guani ki doni ti kpiagidi kaanu kani.