1 Timote 1 - U TIENU MAAMA TILI 2013

I tundi li nitaanli leni li gobidikaaba po 1—3 I fuondi

¹ Mini Poli, yua n tie Jesu Kilisiti tondo, kelima U Tienu ti Candaano yaa ñoamabonli po leni Jesu Kilisiti yua n tie ti suginma yaa po.

² N diani a po li tili, fini Timote, yua n tie n bimoanga li dandanli nni. U Tienu yua n tie Baa leni ti Diedo Jesu Kilisiti yaa ŋanbili, o ninñingbadima leni o yanduanma n yaa ye leni a.

Poli waani Timote n fangi o yuli leni mi bangifaama

³ N bua ki tiadi a min den puogi a yaala, min den baa fii ki gedi Maseduani diema yaa yogunu. N den mia ŋa, ŋan yaa ye Efesi ki tundi bi nitianba, ke ban da bangi bangitoama.

⁴ Ŋan go yie bi po ke ban da pa bi yula i telimi togida leni bi yaajanba togida, ya n ki pia gbenma po, kelima laa bonla kuli fiindi mi niama, ki naa todi ke U Tienu tuonli suagi liiga li dandanli nni.

⁵ Laa tundi n baa cuani yaala tie mi buama, yaama n ña li papienli, yaa pali siedi n ŋani leni li dandanmoanli nni.

⁶ Bi nitianba lebidi ki ŋaa laa bonla, ki yaadi ki ŋua mi mafanma.

⁷ Bi bua ki yaa tie li bali maama bangikacianba, ama baa bani ban maadi yaala leni ban bangi yaala leni li papaali yeni n bua ki yedi yaala.

⁸ Ti bani ke U Tienu bali maama ŋani, li yaa tie ke o nilo ŋua ma nani lan bili maama.

⁹ Ti go bani ke baa bili li bali maama yeni o niteginka po ka. Ama bi bili ma bi nibiadiba leni yaaba n yie li bali maama, U Tienu yiekaaba, ti tuonbiadi danba, yaaba n kaa ŋua U Tienu sanu, kaa fangi o mo, yaaba n kpaani bi baanba leni bi naanba, nikpalo kuli,

¹⁰ mi conconma danba, yaa jaba n taagi leni biyaba, yaaba n kuadi bi niba, bi tuofaadanba, yaaba n tiendi mi siedifaama leni yaala n nia leni mi bangiŋanma po kuli.

¹¹ Laa bangiŋanma ŋua o Laabaaliŋamo, U Tienu yua n pundi ki yaa baadi ti kpiagidi ki go pia mi yemanmoanma n piani nni yua.

Poli tuondi U Tienu o ninñingbadima po

¹² N tuondi ti Diedo Jesu Kilisiti yua n puni nni u paalu, ki sua ke n tie nidugika ke o kuani nni o tuonli nni,

¹³ mini yua n den kpa sugidi o, ki wangi o fala, ki tiendi o yaala n bia. O den gbadi n po mi ninñima, kelima n den tiendi yeni n yanpiima leni n dandanluoma po.

¹⁴ Ti Diedo den ŋanbi n po hali ke li kandi, ki puni nni yaa dandanli leni yaa buama n ñani Jesu Kilisiti kani.

¹⁵ Yaa maama n tie ne tie mi madugikaama, ki pundi bi niba n gaa ma cain, ke Jesu Kilisiti den cua ŋanduna nni ki baa tindi ti tuonbiadi danba. Bi siiga nni mini n cie.

¹⁶ Ama o den gbadi n po mi ninñima line yaa po: Jesu Kilisiti cili ki doagidi o juunli mini yaa kani, ke min tua li bontogidikaala yaaba n baa daani o ki baa yaa miali n kan gbeni kuli yaa po.

¹⁷ U Tienu, yua n tie o Badiciamo hali yaa yogunu kuli kaa pia kuuma, tin ki nua yua, wani yua bebe n tie U Tienu, n yaa baadi ti jigidi leni ti kpiagidi yaa yogu n tuu yaa yogu. Amina!

¹⁸ N biga Timote, n teni a yaa ñoamabonli n tie ne, nani ban den kpa pua a po yaa saawali ki yedi maama: Ŋan yaa koani li dandanli koanŋanli.

¹⁹ Ŋan yaa kubi li dandanli leni yaa pali siedi n ŋani. Bi nitianba den ŋaa laa bonla ke bi dandanli bodi.

²⁰ Imene leni Alekisandri tie laa niba siiga yaaba. N den teni ba Sutaani, ke lan bangi ba ban da go sugidi U Tienu.