1 Tesaloniki 3 - U TIENU MAAMA TILI 2013

¹ Tin kaa go den fidi ki juuni kelima tin waagi leni yi maama yaa po, ti den jagi ke tinba nibilie baa yaa ye Ateni tibebe,

² ki soani ti kpiilo Timote yi kani. O taa ki tuuni leni U Tienu, ki tie ti tuonsoanlielo Kilisiti Laabaaliŋamo wangima nni. Ti soani o wan paagi yi pala, ki tundi yi yin yaa se bonŋanla yi dandanli nni,

³ ke yi siiga oba kuli n da lengidi ki guani puoli, kelima ban wangi yi yaa fala po. Yi bani ke U Tienu jagi ti po lani.

⁴ Tin den ye leni yi, ti den tuodi ki waani yi ke bi baa yaa wangi ti fala yeni. Li den tua yi po yeni, nani yin bani maama.

⁵ Nani min kan go den fidi ki juuni kaa laa yi maama po, n den soani Timote yi kani ke wan bandi yin se li dandanli nni maama. N den jie ke mi tulinma daano n da ti tulini yi, ki teni ti tuonli yi siiga n tua fanma.

⁶ Moala Timote n ñani yi kani ki kpeni, ki puni ti yaa laabaalo n mani. O waani yi dandanli leni yi buama n tie maama. O waani ti ke yi tiani ti po yogunu kuli leni li pamanli, ki go bua ki le ti, nani timo n bua ki le yi maama.

⁷ Lani yaa po, ti kpiiba, ba ke ti ye leni mi yebiadima ki laadi fala, wan waani ti ke yi se li dandanli nni ke li pa yeni, li baagi ti.

⁸ Moala ti naani guani, kelima yi se ke li pa o Diedo sanŋoadima nni.

⁹ Moala tii pia ñoabu ki baa tuondi U Tienu lan dagidi, kelima yi po. Ti tuondi o ti jaandi nni leni tin pia yaa pamancianli o kani, kelima yi po.

¹⁰ U yensiinu leni ku ñiagu kuli, ti miadi o leni ti pala kuli, wan tuo tin go le yi nunmu, ki yaa todi yi ke yin baa ki biini yaala n poadi yi dandanli nni.

¹¹ Ti Baa U Tienu leni ti Diedo Jesu n ŋanbi ti po u sanu, tin go cua ki le yi.

¹² O Diedo n teni ke yi buama yiyaba po leni bi niba kuli po n yaa yabidi ki pugidi, nani timo yaa buama n pugidi yi po maama.

¹³ O Diedo n yaa paagidi yi pala, ke ti Baa U Tienu n yaa nua ke yi gagidi ki ŋani cain wani U Tienu po, kaa pia ban baa fidi ki kuli yi leni yaala, ti Diedo Jesu n go baa cua leni o nigagidiŋanba kuli yaa yogunu.