Biblia Todo Logo
Bìoball air-loidhne

- Sanasan -

1 Tesaloniki 2 - U TIENU MAAMA TILI 2013


Poli tuonli Tesaloniki yaaba siiga

1 Ti kpiiba, yi bani ke ti cuama yi siiga ki den tie fanma.

2 Nani yin bani maama, bi den waani ti fala ki go sugidi ti Filipi dogu nni. Ama ba yeni, ti den dugi ti Tienu po, ki wangi U Tienu Laabaaliŋamo, ba ke bi niba den fii ki se ti po.

3 Tin den tundi yi yaa tundi naa den ŋua leni boandi, bi leni yantiajoagindi ba, bi leni janbi mo.

4 Yeni ka, ti den maadi nani U Tienu n bua tin maadi maama, kelima o biigi ti ki sua ke ti dagidi wan piani ti o Laabaaliŋamo. Lanwani, tii maadi ki bua ki yaa mangidi bi niba pala ka. Ti maadi ki bua ki yaa mangidi wani U Tienu yaa pale, wani yua n bigidi a pala.

5 Yi bani bonŋanla ke tin den ye yi siiga tii den maadi yi po ti ñoamamandi ka. Tii den pia ŋalimani buama yantiali mo, U Tienu tie ti siedo lani kuli po.

6 Tii den lingi kpiagidiba bi nisaaliba kani mo, li yaa tie yinba yaa kani leni nitoaba kani kuli, ki sua ke ti den pia li bali ki tieni yeni kelima ti tie Kilisiti tondiba.

7 Ama ti den ye yi siiga leni mi dingima nani o pomado n kubi o bila maama yeni.

8 Tin den pia yi po yaa buama, li den mani ti po ke ti waani yi U Tienu Laabaaliŋamo. Laa tie lani bebe ka, ti den bua ki pa yi baa ti yula moko, kelima ti buama yi po den pundi hali laa bianu.

9 N kpiiba, yi tiani ti tuonli leni ti coagingu po. Tin den wangi yi o Laabaaliŋamo, ti go den tuuni li tuonli u yensiinu leni ku ñiagu kuli ki baadi ti jiema, ke ti yema n da tie yi siiga oba kuli po fala.

10 Yinba leni U Tienu kuli tie ti po siedi, ke ti den pia yaa tagi n gagidi ki go tiegi ki naa pia ban baa fidi ki kuli ti leni yaala yinba yaaba n daani siiga.

11 Yi go bani ke ti den ye yi siiga ki tie yuakuli po nani o jamado n tie o bila po maama.

12 Ti den tundi yi, ki paagidi yi pala, ki go tigini yi ke yin yaa cuoni maama n dagidi U Tienu po, wani yua n yini yi ke yin yaa taa leni o o diema nni leni o kpiagidi nni kuli.

13 Li tie lani yaa po ke yogunu kuli ti go tuondi U Tienu kelima yin den gaa tin den wangi yi U Tienu maama yaama. Yii den gaa ma nani mi tie bi nisaaliba maama ka. Ama yi den gaa ma nani man tie maama i moamoani. Lani n tie U Tienu maama yaama n tuuni yinba yaaba n tuo ki daani siiga.

14 N kpiiba, yi den ŋoadi U Tienu n yini yaaba nitaana ya n ye Jude po ki ye Jesu Kilisiti nni yaa fuuli. Yi dogu yaaba den waani yi fala nani bi yaa dogu yaaba Jufinba n den waani ba fala maama.

15 Bani n go den kpa o Diedo Jesu leni bi saawalipuaba. Bi waani timoko falabiado. Baa tiendi yaala n mangidi U Tienu pali. Bi go tie bi niba kuli yibalinba.

16 Bi yiedi ti po ke tin da waani bi nilanba U Tienu Laabaaliŋamo ke wan faabi ba. Bi tieni yeni ke bi tuonbiadi n pundi ti bianu. Moala, U Tienu pabienli juodi ki cuo ba.


Poli bua ki go gedi ki le Tesaloniki yaaba

17 N kpiiba, ti den paadi leni yi u yogunu waamu po ti gbanandi nni, laa tie ti yantiana nni ka. Ti go den bua hali bonŋanla ki le yi nunmu, ki moandi lipo moko.

18 Ti go den bua ki guani yi kani. Laa luo taalimilie ke mini Poli den moandi, ama Sutaani den yie ti po.

19 Ŋmenba n go tie ti suginma leni ti pamanli leni ti kpiagidi badifogiliga? Naani laa tie yinba kaa, ti Diedo Jesu nintuali o yaa guani ki cua yaa yogunu?

20 Yeni de! Yinba n tie ti kpiagidi leni ti pamanli.

Gulmancema Protestant Bible © Bible Society of Burkina Faso, 2013.

Bible Society of Burkina Faso
Lean sinn:



Sanasan