1 Tesaloniki 1 - U TIENU MAAMA TILI 2013

Ti pagidi leni i tuondi 1.1—4.12 I fuondi

¹ Mini Poli, Silasi leni Timote n diani li tili yinba Kilisiti Nitaanli, yaali n ye Tesaloniki dogu nni, ki ye U Tienu yua n tie Baa niinni leni o Diedo Jesu Kilisiti niinni po. U Tienu ŋanbili leni o yanduanma n yaa ye lenli yi.

Tesaloniki yaaba n gaa o Laabaaliŋamo maama

² Ti tuondi U Tienu yogunu kuli yikuli po, ki taagi yi yela ti jaandi nni.

³ Ti tiani yogunu kuli ti Baa U Tienu kani yi dandanli leni yi buama ti Diedo Jesu Kilisiti po, n teni ke yi tuuni maama leni yi suginma n se bonŋanla maama.

⁴ Ti kpiiba, U Tienu buakaaba, ti bani ke U Tienu den gandi yi.

⁵ Tii den wangi yi o Laabaaliŋamo leni mi maama bebe ka, ama leni U Tienu Fuoma Yua paalu leni ti dugidi o Laabaaliŋamo yeni po. Yi bani tin den ye yi siiga leni yaa tagu buolu kelima ti den bua yi ŋamu.

⁶ Yi den ŋoadi tinba leni o Diedo fuuli ki gaa U Tienu Maama, ba o falaciamo siiga leni U Tienu Fuoma Yua n puuni yaa pamanli.

⁷ Lani yaa po, yi den tua li bontogidikaala yaaba n daani kuli po, Maseduani leni Akayi diema kuli po.

⁸ O Diedo maama naa den yadi yi kani Maseduani leni Akayi po bebe ka, ama yin pia yaa dandanli U Tienu po den yadi i kaani kuli, hali ke laa go tie tiladi tin maadi li po.

⁹ I kaani kuli, bi togidi yin den gaa ti cangu maama leni yin den ŋaa i buli ŋoadima, ki tuo ki ŋoadi U Tienu yua n fo ki tie i moamoani maama.

¹⁰ Moala, yi guu ke o Bijua Jesu, U Tienu n den fiini yua bi tinkpiba siiga, n ña tanpoli ki guani ki cua, yua n baa faabi ti leni U Tienu pabienli yaali n kpendi.