1 Samueli 9 - U TIENU MAAMA TILI 2013

Sayuli lingi o ŋunñoe

¹ Benjamen buolu yua n den ye ki yi Kisi. O yaaja Afia den tie Benjamen buolu yua ki mali Bekorati, Bekorati mo den mali Serori, Serori mo n maa Abieli, Kisi yeni yaa baa. Kisi den tie nikpiagili ki go pia.

² O den pia o bijua ke o yi Sayuli. O den ŋani, ki go pia mi jawaama. Isidayeli yua n den cie o ŋamu ki den ye. O go den caadi bikuli li yuli.

³ Sayuli baa Kisi ŋunñoe den yaadi. Kisi den yedi o bijua Sayuli: «Ŋan taa naacenyendo ki fii ki gedi ki ban lingi i ŋunbi.»

⁴ Sayuli den fii ki tagini Efrayimi juana po ki poandi Salisa diema, waa laa i ŋunbi. Wani leni o naacemo den tagi Saalim diema kaa laa ba lanpo mo. Lanwani, bi den poandi Benjamen diema nni, baa didi laa ba.

⁵ Ban den pundi Tisufi diema, Sayuli den yedi o naacemo yua n den yegi leni o: «Tin lebidi ki kuni ke n baa n da ti sundi i ŋunbi po ki yagi o yama ti po.»

⁶ O naacemo den yedi o: «Diidi ki le, U Tienu nilo ye u dogu yu tie na niinni. O tie nikpiagili. Wan yedi ke yaala n baa tieni kuli baa tieni. Lanwani, tin gedi o kani. Daalinba o baa waani ti tin baa tagini naani ki lingi ki le ba.»

⁷ Sayuli den yedi o naacemo: «Ama ti yaa gedi U Tienu nilo yeni kani, ti baa pa o be? Kelima ti naa go pia jiema ti boaga nni, tii pia tin baa pa o yaala. Ti pia be?»

⁸ O naacemo den yedi Sayuli: «Diidi, n kubi ŋanjilifa waamu ke o kpiagu pundi kujapienli boagidima. N baa pa la U Tienu nilo wan waani ti ti sanu.»

⁹ Hali yogu, Isidayeli diema nni bi yaa den bua ki gedi ki mia U Tienu wan doagidi bi po bonla, bi yen yedi: «Tin gedi yua n nua saala bonla po.» Kelima moala ban yi yua o saawalipualo, kpiama bi den yi o yua n nua saala bonla.

¹⁰ Sayuli den yedi o naacemo: «A maadi moamoani, cua tin gedi.» Lane bi den gedi U Tienu nilo n ye yaa dogu nni.

¹¹ Ban den caa u dogu yeni po, bi den tuogi leni bi jafanba ke bi ñani ki baa luuni mi ñima. Bi den buali ba: «Yua n nua saala bonla ye ne bi?»

¹² Bi jafanba den guani ki yedi ba: «Yeni de! Wani n ye yi liiga yeni. O da li pundi u dogu nni moala nne. O cua dinla kelima u dogu nni pia li padili li juali po. Lanwani, yin jaligi tontoni.

¹³ Yi yaa kua u dogu nni yi baa le o hali ke o daa gedi li juali po ki baa n je, kelima bi niba kan je se o cua, wani n baa jaandi ki mia U Tienu n seligi li padili, ban yini yaaba n nan yuandi ki je. Gedi mani ke moala yi da baa le o.»

Sayuli laa Samueli

¹⁴ Lanwani, Sayuli leni o naacemo den kua u dogu nni. Ban den pundi u dogu siiga bi den tuogi leni Samueli ke o caa yaa kaanu n gagidi po.

¹⁵ Li den sua ke Sayuli n den baa faa ki cua yaa daali, o Diedo den tuodi ki yedi Samueli:

¹⁶ «Saala, u naa yogunu, n baa soani a kani Benjamen diema yua. Ŋan wuli o yuli po li bali kpama ki gagidi o wan tua n niba Isidayeli yaaba yudaano. O baa faabi bani n niba yeni Filisiti yaaba nuu nni, kelima n noanli ki laa n niba fala, bi bubula mo pundi hali n kani.»

¹⁷ Samueli n den laa Sayuli yaa yogunu, o Diedo den yedi wani Samueli: «Min den maadi a o joa yua yaa maama yeni nne. Wani n baa diedi n niba.»

¹⁸ Sayuli den nagini Samueli u dogu buliñoabu kani, ki yedi o: «Min le yua n nua saala bonla n ye yaa diegu?»

¹⁹ Samueli den guani ki yedi Sayuli: «Mini n tie yua n nua yaala n baa faa ki tieni saala. Gaa liiga ki yaa cuoni tin gedi yaa kaanu n gagidi po. Mini leni yinba n baa taani ki je dinla. Saala n baa waani a ŋan kpaagi yaala a pali nni kuli, ki yuandi ki pa ŋa u sanu.

²⁰ Ŋan da yagi a yama yaa ŋunbi n den bodi dinla danataa yeni yaa po, kelima bi laa ba. Bi bili Isidayeli diema nni yaala n tie bonmoanla kuli ŋme yaa po yo? Laa tie a yaa po leni a baadiegu yaaba yaa po ka?»

²¹ Sayuli den guani ki yedi o: «Mii tie Benjamen buolu yua ka? Isidayeli buoli kuli siiga, laa buolu ka wa ki cie? N yaa diegu mo ka wa ki cie Benjamen diedi kuli? Lanwani, be yaa po ke a maadi nni mi naa maama?»

²² Lanwani, Samueli den taa Sayuli leni o naacemo ki kuani ba li dieli nni, ki teni ke bi kali yaa kaanu n pia ti kpiagidi ki cie ban yini yaaba mi jiema po kuli n kaa yaa kaani. Ban den yini yaaba den bua ki pundi niba piitaa.

²³ Samueli den yedi yua ŋanbi mi jiema: «Cuani min bi teni a yaa biinu ki yedi ŋan paadi ki bili yeni ne.»

²⁴ Yua ŋanbi mi jiema den taa li taali leni li juoli, ki cuani ki sieni Sayuli nintuali. Samueli den yedi Sayuli: «Ban bi sieni a yaa biinu n yeni. Taa ki nagini a baa ki yaa ŋmani kelima bi bi bili la a yaa po hali min yini bi niba ke ban cua ki je yaa yogunu.» Landaali, Sayuli den dini leni Samueli.

²⁵ Ban den ñani yaa kaanu n gagidi kani ki kua u dogu nni, Samueli leni Sayuli den doni ku doangu yuli po ki boni.

²⁶ Bi den faa ki fii hali ku tiŋaapanpangu. U yienu n pudi yaa yogunu, Samueli den yini Sayuli ku doangu tanpoli ki yedi o: «Fii min piadi a.» Sayuli den fii ke wan leni samueli kuli yegi ki ñani.

²⁷ Ban den pundi u dogu banlu, Samueli den yedi Sayuli: «Waani a naacemo wan kua liiga.» O naacemo den kua liiga. Samueli den yedi: «Moala ŋan sedi, n baa waani a U Tienu n yedi yaala.»