1 Samueli 7 - U TIENU MAAMA TILI 2013

¹ Kiriyati-Yearim yaaba den cua ki taa ku ki ban kuani ku Abinadabi diegu nni, li juali po. Bi den gagidi o bijua Eleasari ke wan yaa guu o Diedo kpaku yeni.

Samueli tua gobidika, ke Isidayeli paadi Filisiti yaaba

² Ban den gedini ku kpaku Kiriyati-Yearim, ku den waagi ki bili lipo, ke li pundi bina piilie. Isidayeli yaaba kuli den buudi ki guani ki nuali o Diedo.

³ Samueli den yedi Isidayeli yaaba kuli: «Yi yaa guani Li Miali Diedo kani leni yi pala kuli, yin ñani yi siiga o bulo Asitate leni bi nilanba n ŋua yaa buli kuli. Yin ŋoadi mani Li Miali Diedo leni yi pala kuli, ki yaa tuuni wani bebe yaa po. Lani, o baa faabi yi Filisiti yaaba nuu nni.»

⁴ Lanwani, Isidayeli yaaba den ñani bi buli, Baali leni Asitate nannana bi siiga, ki ŋoadi Li Miali Diedo bebe.

⁵ Samueli den yedi: «Yin taani mani Isidayeli yaaba kuli Misipa dogu nni, ke n baa mia yi po o Diedo.»

⁶ Bi den taani Misipa ki luuni mi ñima ki wuli o Diedo nintuali. Bi den loli bu ñoabu landaali ki yedi: «Ti tudi o Diedo po.» Samueli den ye Misipa ki gobidi Isidayeli yaaba.

⁷ Filisiti yaaba n den gbadi ke Isidayeli yaaba taani Misipa, bi koanbala den doni ki baa tuogi leni Isidayeli yaaba bu toabu. Isidayeli yaaba n den gbadi laa laabaalo, bi den jie Filisiti yaaba,

⁸ ki yedi Samueli: «Ŋan da cedi ti po bu miabu o Diedo ti Tienu kani, ke wan faabi ti Filisiti yaaba nuu nni.»

⁹ Samueli den taa yaa pebiga n da ŋaani, ki padi ga ki juu ka bonmunga li padijuukaali o Diedo po. O den kpaani ki mia o Diedo Isidayeli yaaba po, ke wani o Diedo gaa o miabu.

¹⁰ Samueli n da den padi li padijuukaali yaa yogunu, Filisiti yaaba den nagidi ki baa baa Isidayeli yaaba. O Diedo den teni ke i tatantani tieni ke Filisiti yaaba jie hali boncianla ki sani. Isidayeli yaaba den paadi ba.

¹¹ Isidayeli yaaba toatieba den ñani Misipa ki deli Filisiti yaaba ki pundi hali yaa kaanu n yi Beti-Kari liiga, ki paadi ba cain.

¹² Samueli den taa li tancianli ki bili li Misipa leni Sena siiga ki yini li Eben-Eseri, lani n tie: “Mi todima Tanli,” ki yedi: «O Diedo n todi ti ke ti pundi hali ne.»

¹³ Bi den paadi Filisiti yaaba yene. Baa go den kpendi Isidayeli yaaba diema nni. O Diedo nuu den miabi Filisiti yaaba hali Samueli miali banlu.

¹⁴ Isidayeli yaaba den guani ki gaa Filisiti yaaba n den fie bi kani yaa dogi, ki cili Ekiron ki yaa caa hali Gati. Bi den guani ki gaa laa tinbuona kuli Filisiti yaaba kani. Mi yanduanma den tieni Isidayeli yaaba leni Amoriti yaaba siiga mo.

¹⁵ Samueli den gobidi Isidayeli yaaba hali o miali banlu.

¹⁶ Binli kuli o yen caa yaa kaani n tie ne, ki gobidi Isidayeli yaaba. Lani n tie: Beteli, Giligali leni Misipa dogi.

¹⁷ Li yaa puoli, o yen guani Rama, o diegu n den ye naani. Lankani moko o den gobidi Isidayeli yaaba. O den maa likani li padibinbinli o Diedo po.