1 Samueli 6 - U TIENU MAAMA TILI 2013

Filisiti yaaba guani U Tienu kpaku

¹ O Diedo kpaku den tieni ŋmaalilele Filisiti yaaba diema nni.

² Filisiti yaaba den yini bi kopadicianba leni a lingida ki yedi ba: «Ti baa tieni o Diedo kpaku lede? Waani ti mani tin baa tieni maama ki guani gu ku kaanu.»

³ Bi kopadicianba leni a lingida yeni den guani ki yedi ba: «Yi yaa baa guani Isidayeli Tienu kpaku, yin da guani gu bonkuongu. Ama yin padi i candanbaani padili. Yeni yi baa faabi, yi go baa bandi yaala yaa po ke o nuu miabi yi ki naa cedi.»

⁴ Filisiti yaaba den guani ki yedi: «Ti baa pa be yo ki baa U Tienu ti candandi?» Bi den guani ki yedi ba: «Yin duadi a sinakpina nannana bonamuu, ŋan yaa tie wula leni a dapola yaa nannana bonamuu, ŋani moko n yaa tie wula, nani Filisiti yaaba koanbala n da maama. Li tie ke falabuoliyendu cuo yinba leni yi yudanba kuli.

⁵ Yin duadi mani a sinakpina nannana leni yaa dapola n bolindi yi diema yaa nannana. Yin go kpiagi Isidayeli Tienu. Daalinba o baa faabi yi leni o nuu n miabi yi maama, yinba, yi tieni leni yi diema kuli.

⁶ Be yaa po ke yi baa juagi yi pala nani Ejipiti yaaba leni Faraon n den juagi bi pala maama yeni? U Tienu n den soani o buudi bi kani yeni daa, baa den cabi Isidayeli yaaba ke bi ñani te?

⁷ Moala yin tagi mani telipangu ki taa ki maani naamadilie po. Yaaba ke teligu daagu daa maani bi po, yin taa ku teligu yeni ki doali ba, ki cuo bi bila yaaba n ŋua ba yeni, ki kuani ba u naapagu nni.

⁸ Lani, yin taa U Tienu kpaku ki maani ku teligu po, ki taa yin duadi yaa nannana ke a tie wula, yi candanbaani padili po yeni, ki kpieni ki kpagibiga nni ki bili ki balini U Tienu kpaku. Li yaa puoli, yin cedi ku kun gedi.

⁹ Yin yaa se ki diidi. Ku yaa cubini ku denpo sanu, ki cuubi Isidayeli yaaba dogu Beti-Semesi po, li tie U Tienu n luni ti laa falaciamo. Li yàá tua yeni mo, ti baa bandi ke wani yaa nuu ka mabini ti, ke li cua ti kani fanma fanme.»

¹⁰ Bi den tieni yeni. Bi den taa naamadilie ki taa teligu ki doali ba. Bi den luoni bi bila u naapagu nni.

¹¹ Bi den taa o Diedo kpaku leni yaa kpagibiga n pia a dapola leni bi sinakpina nannana, ki maani ku teligu po.

¹² A naañuana den taa Isidayeli yaaba dogu Beti-Semesi sanu. Bi den kubi laa sanu ki mua. Baa den jadi ganu bi jienu. Filisiti yaaba koanbala den ŋua bi puoli po hali ki ban pundi Beti-Semesi tinbianu kani.

¹³ Li den sua ke Beti-Semesi yaaba ce ŋalikama ku joaloangu nni. Bi den yaadi ki diidi ki laa ku kpaku ki mangi bi pala leni ban laa ku.

¹⁴ Ku teligu den pundi Beti-Semesi yua Josue kuanu nni, ki sedi. Likani den pia ku tanciangu. Bi den yagidi yagidi ku teligu daadi ki taa a naañuana ki padi ba li padijuukaali o Diedo po.

¹⁵ Levi buolu den jiini o Diedo kpaku leni yaa kpagibiga n baali ku ki pia yaa nannana n tie wula, ki maani li kuli ku tanciangu yeni po. Landaali Beti-Semesi yaaba den padi a padijuukaana leni a padifana o Diedo po.

¹⁶ Filisiti yaaba koanbamuuda n den laa lani kuli, bi den lebidi ki guani Ekiron landaali.

¹⁷ Diidi Filisiti yaaba n den puni o Diedo yaa wula sinakpin-nannana bi candanbaani po: sinakpin-nannanyenli den tie Asidodi dogu yaaba po, yenli Gasa dogu yaaba po, yenli Asikalon dogu yaaba po, yenli Gati dogu yaaba po, yenli mo Ekiron yaaba yaa po.

¹⁸ Wula daponannana moko den ye, ke a coali da leni Filisiti koanbamuuda n die yaa dogi n da maama, i bilinciami n lindi ki cebini yaa dogi leni yaa dogi n ki pia bilini kuli. Ban den maani o Diedo kpaku yaa tanciangu po yeni baa ki ye hali dinla Beti-Semesi yua Josue kuanu nni, ki tie siedi laa bonla kuli po.

¹⁹ Beti-Semesi dogu den pia niba tuda piimuu, ke o Diedo den pua ki kpa bi siiga niba piilele, kelima bi den noanli o Diedo kpaku nni. Bi niba den ye leni li paboanli kelima o Diedo den luni ba yaa fala n bia.

²⁰ Lane Beti-Semesi yaaba den yedi: «Ŋme n baa fidi ki yaa ye ki fo o Diedo U Tienu Yua n Gagidi ki ŋani nintuali? Ku kpaku baa gedi le ki foagidi ti kani?»

²¹ Bi den soani a tonda ban ban yedi Kiriyati-Yearim dogu yaaba: «Filisiti yaaba guani o Diedo kpaku. Yin cua mani ne ki taa ku ki gedini ku yi po.»