1 Samueli 5 - U TIENU MAAMA TILI 2013

U Tienu kpaku yienu Filisiti yaaba diema nni

¹ Filisiti yaaba den fie U Tienu kpaku ki ñani ku Ebeni-Eseri dogu, ki gedini ku Asidodi dogu.

² Bi den ban kuani ki sieni ku bi bulo Dagon dieli nni, ki kuli ku leni o bulo yeni nannanli.

³ Lan den fii ki faa, Asidodi yaaba den fii ku tiŋaapanpangu ki sua ke Dagon baa ki laabi o Diedo kpaku nintuali. Bi den fiini Dagon ki guani ki sieni o o kaanu.

⁴ Lan go den fii ki faa ke bi fii ku tiŋaapanpangu, bi go den sua ke Dagon laabi o Diedo kpaku nintuali. Dagon yuli leni o nibualiediti den kua ki bili bili li buliñoakoali kani. Liba kuli ki den sieni, se o siiga bebe.

⁵ Li tie lani yaa po yo, ke hali dinla, Asidodi dogu nni, Dagon kopadicianba leni yaaba n koa Dagon dieli nni, kan ŋmaa laa dieli buliñoakoali.

⁶ O Diedo den mabini Asidodi yaaba. O den luni bani Asidodi yaaba leni u dobila yaaba kuli dankannuama.

⁷ Asidodi yaaba n den sua ke li tie yeni, bi den yedi: «Isidayeli Tienu kpaku kan yaa ye ti kani, kelima o mabini tinba leni ti bulo Dagon kuli.»

⁸ Lane bi den soani ke bi yini Filisiti yaaba koanbala kuli ke bi taani bi kani ke bi yedi ba: «Ti baa tieni mani Isidayeli Tienu kpaku lede?» A koanbala den guani ki yedi ba ke ban gedini ku Gadi dogu nni. Lanwani, bi den gedini ku lipo.

⁹ Ama ban den taa ki gedini ku, o Diedo nuu den mabini laa dogu yaaba ke ti jawaanciandi cuo ba. O den luni bimoko dankannuama, a bila leni a nikpela kuli.

¹⁰ Lane bi den gedini U Tienu kpaku yeni Ekiron dogu nni. Kun den kua laa dogu nni yaa yogunu, u dogu yaaba den buudi ki yedi: «Bi cuani Isidayeli yaaba Tienu kpaku ti kani ki baa kpa ti, tinba leni ti niba kuli.»

¹¹ Lane bi den soani ke bi yini Filisiti yaaba koanbala kuli ke bi taani ke bi yedi ba: «Yin guani mani Isidayeli Tienu kpaku ku denpo, kun da kpa ti, tinba leni ti niba kuli.» Bi den yedi yeni kelima u dogu nni yaaba kuli den ye leni ti jawaandi boncianla, kelima U Tienu nuu den miabi ba hali hali boncianla.

¹² Yaa niba n ki den kpe, dankannuama den cuo ba. U dogu yeni yaaba bubula den pundi hali tanpoli.