1 Samueli 4 - U TIENU MAAMA TILI 2013

¹ Samueli mo den soagindi laa maama Isidayeli yaaba kuli po. Isidayeli yaaba den ñani ki baa tuogi bu toabu leni Filisiti yaaba. Bi den kpaa bi toanagili ki kuu leni Eben-Eseri dogu, Filisiti yaaba mo den kpaa bi yaa toanagili Afeki dogu nni.

Filisiti yaaba fie U Tienu kpaku

² Filisiti yaaba den caligi ki baa tuogi leni Isidayeli yaaba bu toabu. Bu toabu den cili. Filisiti yaaba den paadi Isidayeli yaaba ki kpa yaa jaba n bua ki pundi tudanaa (4 000) laa toabu nni.

³ Isidayeli toatieba n den guani bi toanagili nni, a nikpela den yedi: «Be n teni ke o Diedo cedi ke Filisiti yaaba paadi ti dinla? Tin gedi Silo ki ban taa o Diedo ŋantaadikpaku ki cuani gu ti siiga kun gaa ti ti yibalinba nuu nni.»

⁴ Isidayeli yaaba den soani Silo ke bi ban taa Li Miali Diedo, U Paaciamu Kuli Daano yua n kaa o bali kalikaanu selubanba tanpoli yaa ŋantaadikpaku. Eli bijaliediba Ofini leni Finea moko den yegi leni U Tienu ŋantaadikpaku.

⁵ Ban den kuani o Diedo kpaku li toanagili nni, Isidayeli yaaba kuli den kpaani leni li pamanli, hali ke ki tinga ban digibi.

⁶ Filisiti yaaba den gbadi bi kpaani yeni ki yedi: «Yaa kpaani n kpaani Hebilu yaaba toanagili po ne bua ki yedi be?» Ban den bandi ke U Tienu kpaku n pundi Isidayeli yaaba toanagili nni,

⁷ ti jawaandi den cuo bani Filisiti yaaba, kelima bi den yieni ke U Tienu cua Isidayeli yaaba toanagili nni. Bi den tua: «Ti bia n yeni, kelima hali moala laa bonbuolu daa bi tieni.

⁸ Ti bia n yeni. Ŋme n baa gaa ti laa Tienu nuu nni? Laa Tienu n den luni Ejipiti yaaba i falacianbuoli kuli mi fanpienma nni.

⁹ Tin paagi mani ti pala, Filisiti yaaba, tin koani mani mi jama, ke tin da ti tua Hebilu yaaba yonbi nani ban den tua ti yaa yonbi maama. Tin paagi mani ti pala ki koani mi jama.»

¹⁰ Lanwani, Filisiti yaaba den fiini bu toabu. Isidayeli yaaba den gbali. Yuakuli den sani ki kuni ki ban kua o gbandieli nni. Bi den paadi Isidayeli yaaba cain hali ke bi toatieba siiga taacenda tuda piitaa (30 000) den kpe.

¹¹ Filisiti yaaba den fie U Tienu kpaku ki kpa Eli bijaliediba Ofini leni Finea.

Eli kuuma

¹² Landaali Benjamen buolu jayendo den ñani bu toabu po ki sani ki pundi hali Silo. O pabiidili po, o den padi o tiadi ki wuli o yuli po mi tama.

¹³ Eli den kaa li bonkalikaala po ki kuu leni u sanu, ki guu kelima o yama den yagini U Tienu kpaku po. O joa yeni n pundi ki kua u dogu nni ki puni bu toabu po laabaali, u dogu yaaba kuli den buudi.

¹⁴ Eli n gbadi laa bubula, o den yedi: «Ku naa fuugu bua ki yedi be?» Lanyogunu o joa yeni den cua ki puni Eli laabaali.

¹⁵ Li den sua ke Eli kpeligi ki pundi piiyia n binanii. O nuni den nuuli yo, waa ji den nua.

¹⁶ O joa yeni den yedi Eli: «N da li ña bu toabu po nne. Dinle ke n da li sani ki ñani lipo.» Eli den yedi o: «N bijua, be n tieni?»

¹⁷ Yua n den cua ki puni laabaali yeni den guani ki yedi o: «Isidayeli yaaba gbali Filisiti yaaba ki sani. Bi paadi ti cain. Bi kpa ba a bijaliediba Ofini leni Finea. Bi fie U Tienu kpaku mo.»

¹⁸ Wan li taa U Tienu kpaku yeli, Eli n ña o bonkalikaala po ki baa yanyanli o buliñoabu kani. O bunkpanli den mudi ke o kpe, kelima o den podi ki go kpiagi mo. O den gobidi Isidayeli yaaba hali bina piinaa.

¹⁹ Li den sua ke o biyuaga, Finea pua, punbi ke o maayogunu pundi. Wan den gaa laabaali ke bi fie U Tienu kpaku, ke o calo baa leni o calo kuli kpe, u maditugukoanu den cuo o ke o gbaani ki mali lanyogunu.

²⁰ O pua yeni ji den baa kpe yo, ama yaa puoba n den ye leni o den yedi o: «Da jie, a mali bonjaga.» Ama waa den guani liba, waa faami ba ban yedi yaala mo.

²¹ O den yini ki biga Ikabodi, ki yedi: «Ti kpiagidi ñani Isidayeli yaaba siiga.» Li tie ke bi den fie U Tienu kpaku ke o calo baa leni o calo mo kpe.

²² O den yedi: «Bi fie U Tienu kpaku, lani yaa po ti kpiagidi ñani Isidayeli siiga.»