1 Samueli 31 - U TIENU MAAMA TILI 2013

Sayuli diegu bodima 31 Sayuli leni o bijaba kuuma

¹ Filisiti yaaba go den tuogi leni Isidayeli yaaba bu toabu Giliboa juali po. Bani Filisiti yaaba den paadi ba, ke bi lebidi ki sani, ke boncianla mo kpe.

² Filisiti yaaba den ŋoadi Sayuli leni o bijaba. Bi den kpa Jonatan, Abinadabi leni Malikisua, bani Sayuli bijaba yeni.

³ Bu toabu kuli den jigidi ki sedi Sayuli yaa kani. A dabantuada den laa o, ke o jie ki digibi hali boncianla bi nintuali.

⁴ Lane Sayuli den yedi yua n tugi o toatiadi: «Noadi a jugisiega ki muu ki kpa nni, ke a jifola ne n da cua ki muu nni, ki yuali nni.» Ama yua n den tugi o toatiadi naa den bua ki kpa o, kelima omoko den jie hali boncianla. Lanwani, Sayuli den noadi o yaa jugisiega ki sieni ka, ki baa ki po.

⁵ Yua n den tugi o toatiadi n den laa ke o kpe, omoko den sieni o yaa jugisiega ki baa ki po ki taani ki kpe leni o.

⁶ Li tie yeni ke Sayuli leni o bijataadiba, yua n den tugi o toatiadi leni o toatieba kuli den taani ki bodi yenma landaali.

⁷ Isidayeli yaaba, yaaba n den ye ku joaloangu duoli leni yaaba n den ye Jurden kpenu yaa duoli n den laa ke Isidayeli toatieba sani, ke Sayuli leni o bijaba mo kpe, bi den fii ki ŋaa bi dogi ki sani, ke Filisiti yaaba den gedi ki kua ki kali lienni.

⁸ Lan den fii ki faa, Filisiti yaaba den cua ki baa fagi yaaba n kpe, bi den laa ke Sayuli leni o bijataadiba bili ki kpe Giliboa juali po.

⁹ Bi den jia Sayuli yuli, ki landi o toatiadi. Lanwani, bi den soani i kaani kuli bani Filisiti yaaba diema nni, ki waani laa laabaaliŋamo bi buli diena nni leni bi diema yaaba kuli siiga.

¹⁰ Li yaa puoli, bi den kuani Sayuli toatiadi ban den kpiedi ki sieni o bulo Asitate nannana yaa dieli nni, ki joani Sayuli o kpiemo bi dogu Beti-Sani bilinciamu po.

¹¹ Ama Galaadi diema nni, Yabesi dogu yaaba den gbadi Filisiti yaaba n tieni Sayuli maama.

¹² Lani, bi jakoanda kuli den fii ki taa u sanu, ki cuoni ñiamungu ki ban joandi Sayuli o kpiemo leni o bijatinkpila Beti-Sani bilinciamu po, ki tugi ki guani ba Yabesi po. Bi den juu bi gbanandi lankani.

¹³ Bi den taa bi kpaba ki piini a Yabesi, tamarisi tibu tinga. Lanwani, bi den loli bu ñoabu danalele.