1 Samueli 3 - U TIENU MAAMA TILI 2013

U Tienu yini Samueli o tuonli po

¹ Ki biga Samueli den ye o Diedo tuonli nni Eli kani. Lanyogunu o Diedo ki den yabi ki maadi leni bi niba, waa den puuni ba li bonlekaala mo ke li yabi.

² Li den sua ke Eli nuni cili ki dingi ke waa go nua bonŋanla. Ñiayengu o den dua wan yen maani ki dua naani,

³ ke Samueli mo dua o Diedo diegu nni, U Tienu kpaku n den ye naankani. U Tienu diegu fidisanga mo daa den gbindi.

⁴ O Diedo den yini Samueli ke o tuo ki yedi: «Mini nne.»

⁵ O den fii ki sani ki gedi Eli kani ki yedi: «A yini nni, mini nne.» Eli den guani ki yedi o: «Mii yini a. Guani ki ban duani.» Lanwani, o den guani ki ban duani.

⁶ O Diedo go den yini Samueli miliema. Samueli den fii ki gedi Eli kani ki yedi: «A yini nni, mini nne.» Eli den guani ki yedi o: «N bijua, mii yini a. Guani ki ban duani.»

⁷ Samueli daa den bani o Diedo. O Diedo mo daa den maadi leni o.

⁸ O Diedo go den yini Samueli mitaama. Samueli den fii ki gedi Eli kani ki go yedi o: «A yini nni, mini nne.» Eli den bandi ke o Diedo n yi ki biga.

⁹ Lane o den yedi Samueli: «Gedi ki ban duani. Bi yaa go yini a ŋan yedi: ‹O Diedo maadi, mini a naacemo cengi.› » Lanwani, Samueli den guani ki ban duani o kaanu.

¹⁰ O Diedo den cua ki sedi o kani ki go yini nani mi kpiama, ki yedi: «Samueli, Samueli.» Samueli den tuo ki yedi: «Maadi, mini a naacemo cengi.»

¹¹ Lanwani, o Diedo den yedi Samueli: «Diidi ki le, n baa tieni Isidayeli yaaba siiga bonla, yaala n baa womi yaaba n baa gbadi la kuli tuba.

¹² Landaali, n baa tieni min den bili ke n baa tieni Eli leni o diegu yaala kuli. N baa tieni li kuli, n kan sieni liba.

¹³ N den kadi ki waani o ke n baa bu ki cuo o diegu yaa yogu n tuu yaa yogu, kelima o bila sugidi nni ke o bani, ki naa tundi ba.

¹⁴ Li tie lani yaa po ke n poli Eli diegu po ki yedi, ke Eli diegu tuonbiaciandi kan baa sugili abada, baa a pada, bi wan baa pa nni yaa paabu kuli, kan teni ban baa sugili.»

¹⁵ Samueli den guani ki duani hali lan faa. Li yaa puoli, o den luodi o Diedo diegu buliñoana. Samueli den jie kaa bua ki togidi Eli wan den baa yaa bonlekaala.

¹⁶ Lani, Eli den yini o ki yedi: «N bijua Samueli.» Samueli den guani ki yedi o: «Mini nne.»

¹⁷ Eli den yedi o: «O Diedo yedi a be? Ŋan da wuoni nni liba kuli. A yaa wuoni nni ba mayenma, U Tienu n yedi a yaala kuli nni, wani U Tienu n cuo ŋa o cuonbiadu.»

¹⁸ Lanwani, Samueli den togidi o li kuli kaa wuoni liba. Eli den yedi: «O tie o Diedo, wan tieni yaala n dagidi o po.»

¹⁹ Samueli den fandi ki pugidi, ke o Diedo mo den ye leni o. Wani o Diedo ki den tuo ke Samueli n maadi o po yaa maama kuli, ba mayenma n tua fanma.

²⁰ Isidayeli diema nni kuli, ki cili Dan dogu ki yaa caa hali Beri-Seba dogu, bi niba kuli den bandi ke Samueli tie o Diedo saawalipualo.

²¹ O Diedo den baa ki doagidi o yuli Silo dogu nni, kelima o den doagidi o yuli lankane ki maadi leni Samueli.