1 Samueli 29 - U TIENU MAAMA TILI 2013

Filisiti yaaba yie ke Davidi kan yegi leni ba

¹ Filisiti yaaba den taani bi toagola kuli Afeki dogu nni. Isidayeli yaaba mo den gedi ki kpaa bi toanagili yaa ñinbunli n ye Yisireyeli dogu nni.

² Filisiti yaaba toatieba yudanba den cuoni niba kobiga kobiga caga leni niba tudili tudili caga. Davidi leni o niba mo den cuoni bi puoli po, wani leni Akisi.

³ Filisiti yaaba toatieba yudanba den yedi: «Hebilu yaaba ne tuuni be?» Akisi den guani ki yedi ba: «Isidayeli diema bado Sayuli badibaanlo Davidi kaa. O ye leni nni hali ke li waagi. Hali wan cua ne, li pundi binli bi binalie, mii laa o kani tagiliba kuli.»

⁴ Ama Filisiti yaaba toatieba yudanba pala den fii Akisi po boncianla, ke bi den yedi o: «Guani o joa yeni, wan lebidi ki guani ŋan den puni o ke wan yaa ye naani. Wan da yegi leni ti ki gedi bu toabu po, ke wan da ti tua ti po yibali tin togidi bu toabu yaa yogunu. O baa guani ki baa ki nunmanga o canbaa kani lede, li yàá tie ke o jendi ti niba yula ki teni o yaa ka?

⁵ Baa den yiini laa Davidi ka, ki jeli ki tua: ‹Sayuli den kpa tudili tudili. Davidi den kpa tudipiiga piiga.› »

⁶ Lani, Akisi den yini Davidi ki yedi o: «Hali o Diedo po a tie niteginka, li bi baa yaa mani n po min bi le ke a yegi leni nni tin gedi bu toabu ki go ban guani. Mii laa a kani bonbiadiliba kuli hali ŋan cua n kani, ki pundi hali dinla. Ama yaa toatieba yudanba n sieni pala naa mani a po.

⁷ Lani yaa po, ŋan lebidi ki guani leni mi yanduanma, ki da ti biidi Filisiti yaaba yudanba pala.»

⁸ Davidi den yedi Akisi: «N tieni be? A laa be mini a naacemo kani hali min cua ki tuuni a kani, ki pundi hali dinla, ke li kan tuo min gedi ki tuogi leni fini n daano o bado yibalinba bu toabu?»

⁹ Akisi den guani ki yedi Davidi: «N bani, a dagidi n po nani U Tienu maleki yeni. Ama Filisiti yaaba toatieba yudanba yie ki yedi ke a kan yegi leni ti ki gedi bu toabu.

¹⁰ Lani yaa po, ŋan yagidi ki fii, fini leni a canbaa naacenba yaaba n yegi leni a ki cua. Yin yagidi ki fii mani. Yi yaa laa ke li yendi, yin taa u sanu.»

¹¹ Lane Davidi leni o toatieba den yagidi ki fii. Lan den yendi, bi den taa u sanu ki guani ki gedi Filisiti yaaba diema po. Filisiti yaaba mo den gedi Yisireyeli dogu nni.