1 Samueli 28 - U TIENU MAAMA TILI 2013

Sayuli gedi yua n maadi leni bi tinkpiba po

¹ Lanyogunu Filisiti yaaba den taani bi toagola ki baa tuogi leni Isidayeli yaaba bu toabu. Akisi den yedi Davidi: «Ŋan yaa bani ke a baa yegi leni nni bu toabu po, fini leni bi toatieba.»

² Davidi den guani ki yedi Akisi: «Bonŋanla! A baa le mini a naacemo n baa tieni yaala.» Akisi den yedi Davidi: «N baa teni ŋan yaa guu nni hali n miali banlu.»

³ Li den sua ke Samueli kpe ke Isidayeli yaaba buudi o po ki piini o Rama, o dogu nni. Li go den sua ke Sayuli ñani yaa ñoagidanba n maadi leni bi tinkpiba leni a baabuula kuli mi diema nni.

⁴ Filisiti yaaba den taani ki cua ki kpaa bi toanagili Sulami dogu nni. Sayuli den taani Isidayeli yaaba kuli ke bi mo den kpaa bi yaa toanagili Giliboa juali kani.

⁵ Sayuli n den laa Filisiti yaaba yaa toanagili, o den jie, ke o tugusoama sani boncianla.

⁶ O den mia o Diedo. Waa den guani liba ti dangidi nni, bi Urim bi bi saawalipuaba kani.

⁷ Lani, Sayuli den yedi o badibaanba: «Lingi mani n po yaa pua n maadi leni bi tinkpiba, ke min gedi ki bu o.» O badibaanba den yedi o: «Yaa pua n maadi leni bi tinkpiba ye Eni-Dori.»

⁸ Lanwani, Sayuli den lebidi ki lani tiatoadi ke ban da bandi o. O den fii leni jabilie ki gedi. Bi den pundi o pua yeni deni ku ñiagu. Sayuli den yedi o: «Buali n po tinkpiyendo ki waani nni yaala n baa ti tieni. Ŋan yini min baa waani a yua, wan cua ne.»

⁹ O pua den guani ki yedi o: «A bani Sayuli n den tieni yaala. A bani ke o den deli yaa ñoagidanba n maadi leni bi tinkpiba leni a baabuula, ki ñani ba mi diema nni. Be yaa po ke a dia nni ku diagu ki baa teni ban kpa nni?»

¹⁰ Sayuli den poli ki yedi: «Hali o Diedo po, bi kan tieni a yaala n bia kuli kelima lani yaa po.»

¹¹ Lanwani, o pua den yedi o: «A bua min yini a po ŋme?» O den guani ki yedi o: «Yini n po Samueli.»

¹² O pua n den laa Samueli, o den kuudi, ki tiani ki yedi Sayuli: «Be yaa po ke a boandi nni. A tie Sayuli.»

¹³ O bado den yedi o: «Da jie liba, a laa be?» O pua den yedi o: «N laa kpeeñagu, ke ku ñani ki tinga nni.»

¹⁴ Sayuli den yedi o: «O tie lede?» O den yedi: «Jakpelo n ñani ki cua, ki goli bu kpalibu.» Sayuli den bandi ke li tie Samueli, ki labini tiipo ki kpiagi o.

¹⁵ Samueli den yedi Sayuli: «Be yaa po ke a yagi n yama ki teni ke n ñani?» Sayuli den guani ki yedi o: «N ye yanyagiciandi nne. Filisiti yaaba togidi leni nni bu toabu, U Tienu mo lebidi ki ŋaa nni, waa guani nni liba o saawalipuaba kani, bi ti dangidi nni. Lani yaa po yo ke n yini a, ŋan waani nni min baa tieni yaala.»

¹⁶ Samueli den yedi: «O Diedo yaa ŋaa ŋa ke a tua o yibali, be yaa po ke a go buali nni?

¹⁷ O Diedo tieni a nani wan den teni ke n soagini a maama. O Diedo gaa a kani mi diema bali ki teni nitoa, Davidi.

¹⁸ Li tie ke ŋaa tuo ki ŋua o Diedo n den yedi a yaala, ki tuu Amaleki yaaba o pabienli panpaani. Lani yaa po, ke o Diedo tieni a line dinla.

¹⁹ Yaala n cie lani, o Diedo baa taa Isidayeli yaaba leni fini kuli ki teni Filisiti yaaba. Saala fini leni a bijaba baa yaa ye leni nni. O Diedo baa taa Isidayeli toatieba moko ki teni Filisiti yaaba.»

²⁰ Lanyogunu Sayuli den baa ki tandi, kelima Samueli maama den jieni o hali boncianla. Waa go den pia fidu moko, kelima waa den dini jiemiba kuli landaali yensiinu leni li ñiagu kuli.

²¹ O pua yeni den nagini Sayuli kani. Wan den laa ke li wudi wani Sayuli gbanu, o den yedi o: «Mini a yonbo bi cengi a yedima. N bi luni n miali ki tieni ŋan bi yedi nni yaala kuli.

²² Moala a mo n ji cengi mini a yonbo yedima. Cedi min pa ŋa dupen waamu ŋan je ki baa u fidu ki taa u sanu.»

²³ Die o den yie ke o kan je. Ama o badibaanba leni o pua yeni den tigini o hali ke o den tuo bi maama. O den fii tiipo ki kali u duanu po.

²⁴ O pua yeni den pia li naabiwubidili, o den jaligi ki kodi li ki taa mi yoma, ki buuni ki pua yaa dupen n ki pia dabinli.

²⁵ O den sieni li kuli Sayuli leni o badibaanba nintuali ke bi dini. Li yaa puoli, bi den fii ku ñiagu yeni ki kuni.