1 Samueli 26 - U TIENU MAAMA TILI 2013

Davidi didi yie ke o kan kpa Sayuli

¹ Sifi dogu yaaba den cua Sayuli kani Gibeya po ki yedi: «Ŋaa bani ke Davidi wuo Akila dogu juali yaali n tiegi leni mi fanpienma?»

² Lanwani, Sayuli den fii ki gedi Sifi fanpienma po leni Isidayeli toatieba siiga jakoanda tudataa (3 000), ki baa lingi Davidi likani.

³ Sayuli den kpaa o toanagili Akila juali po, yaali n ye u sankunu, ki tiegi leni mi fanpienma. Davidi den ye mi fanpienma nni. Wan den sua ke Sayuli cua mi fanpienma nni ki lingi o,

⁴ o den soani bi niba ke bi ban bandi cain ŋasiili nni ke Sayuli cua, ki guani ki waani o.

⁵ Lanwani, Davidi den fii ki cua Sayuli n den kpaa o toanagili naani, ki laa Sayuli n dua naani wani leni o toatieba yudaano Neri bijua Abineri. Sayuli den dua li toanagili siiga, ke bi toatieba kuli mo yen duani ki lindi o.

⁶ Davidi den yedi Hititi yua Ahimeleki leni Tiseruya bijua Joabi waalo Abisayi: «Ŋme n baa yegi leni nni tin gedi Sayuli toanagili po?» Abisayi den guani ki yedi: «N baa yegi leni a.»

⁷ Lanwani, Davidi leni Abisayi den gedi Sayuli toagoli po ku ñiagu. Sayuli den dua ki goa li toanagili siiga, ke o kpaanli caa o yuli kani. Abineri leni bi toatieba kuli den dua ki lindi o ki goa.

⁸ Abisayi den yedi Davidi: «U Tienu taa a yibali ki tieni a nuu nni dinla. N mia ŋa, ŋan cedi min muu o li kpaanli ki lundi o ki caani tiipo. Yenma bebe baa dagidi, n kan pugini miliema.»

⁹ Ama Davidi den yedi Abisayi: «Da kpa o, kelima ŋme n baa fidi ki tandi o nuu ki pua o Diedo n gandi yua, ke wani U Tienu kan cuo o?»

¹⁰ Davidi go den yedi: «Hali o Diedo po, wani o Diedo n baa kpa o, o daali yaa pundi, yaa ka o yaa gedi toabu.

¹¹ O Diedo n luoni n po min tandi n nuu ki sii o Diedo n gandi yua. Ama ŋan taa o kpaanli yaali n caa o yuli kani leni o ñinbagili tin gedi.»

¹² Lanwani, Davidi den taa Sayuli yuli kani li kpaanli leni li ñinbagili, ke bi ban caa. Oba kuli naa den laa ba, oba ki den bandi mo. Oba kuli ki den fundi kelima o Diedo n den teni ke bi guani laa guacianma.

¹³ Davidi den gedi napo yaa joakunu, naani n foagi leni Sayuli toanagili ki sedi li juali yuli po.

¹⁴ O den tiani ki maadi leni bi toatieba leni Neri bijua Abineri, ki yedi: «Abineri, a kan tuo yo?» Abineri den guani ki yedi o: «A tie ŋme ki tangi o bado po nanda?»

¹⁵ Davidi den yedi Abineri: «Ŋaa tie joa ka? Ŋme ye ki da leni a Isidayeli yaaba siiga? Lanwani, be n teni ke ŋaa guudi a daano o bado? Diidi, o nilo bi cua yi kani ki baa kpa a daano o bado.

¹⁶ Ŋan tieni yaala yeni, laa ŋani. Hali o Diedo po, li pundi yin kpe kelima yii guudi yi daano, o Diedo n gandi yua. Diidi ki le o bado kpaanli leni o ñinbagili yaali n bi ye o yuli kani n ye naani.»

¹⁷ Sayuli den bandi Davidi nialu ki yedi: «A yaa nialu liga yo, n bijua Davidi?» Davidi den guani ki yedi: «N yaa nialu lige n daano o bado.»

¹⁸ Davidi go den yedi: «Be n teni ke fini n daano ñani ki ŋua ki deli min a naacemo? N tieni be? N pia be yaa tagili yo?

¹⁹ Fini n daano o bado n tuo ki cengi mini a naacemo maama. Li yaa tie ke o Diedo n fiindi a pali ke ŋan yaa ŋua ki deli nni, wan gaa li padili ki jiini o pali. Ama li yaa tie nibe, o Diedo n soli ba, kelima dinla bi deli nni, ke min da go pia tinbiinuba Li Miali Diedo n puni o niba yaa diema nni. Bi yedi nni: ‹Gedi ki ban yaa ŋua tientoe!›

²⁰ N soama n da wuli yaa kaanu n foagi ki piadi leni o Diedo yekaanu. Fini Isidayeli bado ñani ki ŋua ki lingi mini li canfundili nani ban ŋua ki deli ki ñuñuuga a juana nni maama yeni.»

²¹ Lanwani, Sayuli den yedi: «N tudi! Guani ki cua ne, n bijua Davidi. N kan go tieni a yaala n bia, kelima dinla a noanli ke n miali tie bonmoanla. N tieni nani o yanluodaano yene. N tudi boncianla.»

²² Davidi den guani ki yedi: «Diidi ki le, fini o bado kpaanli nne! Cedi a niba siiga yendo n cua ki gaa li!

²³ O Diedo n guani yuakuli nani o teginma leni o moamoani n da maama. O Diedo bi taa ŋa ki tieni n nuu nni dinla, ama mii bi tuo ki tandi n nuu ki sii o Diedo n gagidi ki dini yua li bali.

²⁴ Nani a miali n bi tie n po bonmoanla maama dinla, nmoko yaa miali n yaa tie bonmoanla yeni o Diedo po, wan gaa nni falabiado kuli nni.»

²⁵ Sayuli den yedi Davidi: «N bijua Davidi, U Tienu n seligi a. A bontienkaala kuli baa cuoni a po.» Li yaa puoli, Davidi den ban caa, Sayuli mo den lebidi ki kuni o denpo.