1 Samueli 25 - U TIENU MAAMA TILI 2013

Nabali yie ke o kan todi Davidi

¹ Samueli den kpe. Isidayeli yaaba kuli den buudi o po. Bi den piini o o diegu nni Rama dogu nni. Li yaa puoli, Davidi den fii ki gedi Paran fanpienma nni.

² O joa den ye Mayona dogu nni ki tie piadiciamo. O ŋalimano den ye Karimeli. O den pia pe tudataa (3 000) leni ŋuabi tudili. Lanyogunu o den ye Karimeli ki moagidi o pe kobidi.

³ O den yi Nabali, o pua mo Abigayili. O pua yeni den pia mi yanfuoma, o nunga mo den ŋani, ama o joa wani den pa, o tagu mo den bia. O den tie Kalebi buolu yua yo.

⁴ Davidi den ye mi fanpienma nni ki gaa laabaali ke Nabali moagidi o pe kobidi.

⁵ Lani, o den soani o kani jawaaba piiga ki yedi ba: «Yin gedi mani Karimeli, Nabali po ki ban fuondi o n po,

⁶ ki yedi o: ‹Ŋan yaa ye leni laafia, a deni yaaba mo n yaa ye leni laafia, a piama kuli n yaa ye leni laafia.

⁷ Davidi gbadi ke yaaba n moagidi i pe kobidi ye a kani. To, a yankpaaba den ye leni ti, tii den tieni ba biadimiba kuli. Liba kuli naa den bodi ba ban den ye Karimeli fanpienma nni yaa yogunu.

⁸ Ŋan buali a yankpaaba, bi baa waani a. Lanwani, Davidi yedi ke ŋan ŋanbi ti po, kelima ti cua a kani li pamanli daali. Ŋan pa ti, tinba a naacenba leni a bijua Davidi, ŋan pia yaala.› »

⁹ Davidi jawaaba n den pundi Nabali kani, bi den caa o Davidi tondu, ki se ki guu wan baa lebidi yaala.

¹⁰ Nabali den guani ki yedi: «Ŋme tie Davidi? Ŋme tie Isayi bijua? Moala yaa naacenba n tiini ki ŋaani bi canbaanba yabi.

¹¹ Naani n baa taa n dupen, n ñima leni min kodi yaa yandi yaaba n moagidi n pe po ki pa yaa niba, ke mii bani ban ñani naani?»

¹² Davidi jawaaba den guani ki taa u sanu ki ban pundi ki togidi o laa maama kuli.

¹³ Lani, Davidi den yedi o niba: «Yuakuli n yie o jugisiega.» Bikuli den yie bi jugisiemu. Davidi mo den yie o yaaga. Yaaba n den fii ki ŋua Davidi ki caa den bua ki pundi jaba kobinaa, ke jaba kobilie mo den sedi ki guu ti tiadi.

Abigayili todi Davidi

¹⁴ Nabali naacenba siiga yendo den cua ki waani Nabali pua Abigayili ki yedi: «Diidi ki le, Davidi soani a tonda ke bi ñani mi fanpienma po ki cua ki baa fuondi ti canbaa, ke o funi leni ba.

¹⁵ Moamoani po, bi niba yeni den ŋanbi ti po boncianla. Baa den tieni ti bonbiadiliba kuli. Liba kuli naa den bodi ti kani tin den ye leni ba i kuani nni yaa yogunu.

¹⁶ Bi den tie ti po nani u bilinu u yensiinu leni ku ñiagu kuli, tin den kpaa ti pe ki ye leni ba yaa yogunu.

¹⁷ Moala ŋan kpaagi ki le ŋan baa tieni yaala, kelima laa pia kuli tama, ti canbaa leni o diegu kuli baa bodi. O tagu bia maama, hali ke ti kan tuo ki maadi leni o.»

¹⁸ Lane Abigayili den jaligi ki taa dupen kobilie, duven dayuadilie, ban den ŋanbi yaa pe bonbimuu, i disagidi yiemumuu, duven tiidi bonluonkaala bonfiidi kobiga leni a kankankuoma bonkona kobilie. O den tuni li kuli i ŋunbi

¹⁹ ki yedi o naacenba: «Yin kua mani n liiga, n baa yaa ŋua yi.» Waa den yedi o calo Nabali liba.

²⁰ O den jagini o ŋunbo, ki jiidi ki leli li juali, Davidi leni o niba mo den ji ki togidi o.

²¹ Li sua ke Davidi den yedi o yama nni: «Min den guu o joa yeni piama kuli mi fanpienma nni ke liba kuli ki bodi yeni, li den tie fanma, o jiini nni mi ŋanwaama.

²² N yaa cedi ke li fii ki faa ki sua Nabali diegu nni ba jayendo fo, U Tienu n cuo mini Davidi o cuonbiadu.»

²³ Abigayili n den laa Davidi yaa yogunu, o den jiidi o ŋunbo po tontoni ki labini Davidi nintuali ki pugi o.

²⁴ O den laabi o taana kani ki yedi: «N daano, i tagili yeni n yaa ye n yaa yuli po. Ama n mia ŋa ŋan pa mini a yonbo n maadi. N mia ŋa ŋan cengi n maama.

²⁵ Fini n daano n cedi Nabali, wani o nibiado yeni maama, kelima o tie nani wan yi maama, o yi Nabali, o yanluodaano. Waa pia yama. Mini a yonbo mo, mii den laa fini n daano n den soani yaa jawaaba.

²⁶ Moala, n poli hali o Diedo leni hali fini yaa po kuli, ke o Diedo n yie a po ki cuo a nuu ŋan da wuli mi soama. A yibalinba leni yaaba n bua ki tieni fini n daano yaala n bia kuli, ban tua nani Nabali yeni.

²⁷ Moala ŋan tuo mini a puotuado n cuani a po yaa paabu ne, ki boagidi yaa jawaaba n ŋua fini n daano.

²⁸ N mia ŋa ŋan tieni mini a puotuado tagili po sugili. O Diedo baa ti bili fini n daano buolu wun yaa ye, kelima a kubi o Diedo toabu, ban da le a kani bonbiadiliba kuli mo hali a miali banlu.

²⁹ O nilo yaa fii ki baa deli a ki bua ki ñani a miali, o Diedo a Tienu baa gaa ŋa ki kubi a miali wani o ba kani. Ama o baa taa a yibalinba miana ki lugidi a foagima, nani ban lugidi ku tanbuncaangu maama.

³⁰ O Diedo yaa ti tieni wan maadi a po yaa bonŋanla kuli, ki dini a li bali ke a tua Isidayeli bado,

³¹ pabiidili leni yanyagidi n da ti yaa ye leni a, kelima a wuli mi soama fanma fanma, ki tuu a yibali o biadima panpaani fini a ba. O Diedo yaa ti tieni fini n daano yaala n ŋani kuli, ŋan tiadi mini a puotuado po.»

³² Davidi den yedi Abigayili: «N jaandi ki pagi o Diedo Isidayeli Tienu, wani yua soani a ke a tuogi nni dinla.

³³ N tuondi a leni a yanfuoma, fini yua n yie n po ki go cuo n nuu dinla ke min da wuli mi soama ki tuu mi biadima panpaani mini n ba.

³⁴ Hali o Diedo yua n fo ki tie Isidayeli Tienu po, hali wani yua n yie ke mii tieni a yaala n bia po, a yàá bi jaligi ki cua ki tuogi nni, Nabali niba siiga baa jayendo kan bi sieni ne leni mi faama.»

³⁵ Lanwani, Davidi den gaa Abigayili kani wan den cuani o po yaa paabu, ki yedi o: «Guani ki kuni a denpo leni mi yanduanma. A gbadi? N gbadi ŋan yedi yaala, n tuo a miabu.»

Nabali kpe ke Davidi taa Abigayili

³⁶ Abigayili den pundi Nabali kani ki sua ke o tiendi o diegu nni mi jaanjiema nani o bado yaama yeni. O pali den mani ke mi daama mo kubi o. Lani, Abigayili ki den maadi o liba hali lan ban faa.

³⁷ Ama lan den faa ke Nabali daama kagidi o po, o pua den waani o yaala n den tieni kuli. O pali den cie ki baa ke o kuodi nani li tanli yeni.

³⁸ Lan den pundi nani dana piiga yeni, o Diedo den pua o ke o kpe.

³⁹ Davidi n den gbadi ke Nabali kpe, o den yedi: «N jaandi ki pagi o Diedo yua n den koani ki gaa nni Nabali n den fali nni yaa yogunu. Wani o Diedo n yie ke mini o naacemo n da tieni yaala n bia. O Diedo teni ke Nabali biadima guani ki baa o yuli po.» Li yaa puoli, Davidi den soani ke bi waani Abigayili ke o bua wan tua o pua.

⁴⁰ Davidi naacenba den gedi Abigayili kani Karimeli po, ki yedi o: «Davidi soani ti ke tin taa ŋa ŋan tua o pua.»

⁴¹ Abigayili den fii ki labini tiipo ki yedi: «Diidi, n baa tua n daano naacemo ki yaa ŋuudi o naacenba taana.»

⁴² Lanyogunu Abigayili den jaligi ki fii ki jagini o ŋunbo. Jafanbimuu yaaba n den tie o puotuada den yegi leni o, ke bi ŋoadi Davidi tonda ke wani Abigayili ban tua o pua.

⁴³ Davidi den taa Ahinoami, Yisireyeli dogu yua moko. Wani Ahinoami leni Abigayili kuli den tua o puoba.

⁴⁴ Sayuli den taa o bisalo Mikali, Davidi pua, ki teni Galimi dogu yua Layisi bijua, Paliti.