1 Samueli 24 - U TIENU MAAMA TILI 2013

Davidi yie ke o kan kpa Sayuli

¹ Davidi den fii lankani ki doni ki gedi ki ban ye Eni-Gedi joamabidi nni.

² Sayuli n den cedi ki naa go deli Filisiti yaaba ki lebidi ki kuni, bi den cua ki waani o ke Davidi ye Eni-Gedi fanpienma nni.

³ Lani, Sayuli den gandi Isidayeli toatieba kuli siiga jakoanda tudataa (3 000), yaaba n cie bi lieba, ki gedi ki lingi Davidi leni o niba hali i joaŋuabi n ye yaa tanciama kani.

⁴ O den pundi yaa yandiena n kuu u sanu kani. Likani den pia ku tanlongu, ke o jadi ki ñanmuaga. Li den sua ke Davidi leni o niba wuo laa tanlongu nni.

⁵ Davidi niba den yedi o: «Dinla n tie o Diedo n yedi a yaa daali: ‹N taa a yibali ki tieni a nuu nni, ŋan tieni o ŋan bua maama.› » Lani, Davidi den fii dindini ki jia Sayuli kpalibu tiipo.

⁶ Lanyogunu o tugusoama den sani kelima o jia Sayuli kpalibu tiipo.

⁷ O den yedi o niba: «O Diedo n luoni n po min tandi n nuu ki sii n daano, kelima o tie o Diedo n gandi yua.»

⁸ Davidi den maadi yeni ki yie o niba po ke baa bibi Sayuli. Li yaa puoli, Sayuli den fii ki ñani ku tanlongu nni, ki ban caa.

⁹ Lanwani, Davidi mo den fii ki ñani ku tanlongu nni ki tiani ki yini Sayuli ki yedi: «O bado, n daano!» Sayuli den gbegi ki diidi o puoli po ke Davidi labini ki pugi o.

¹⁰ O den yedi Sayuli: «Be n teni ke a cengi yaa niba n tua ke mini Davidi moandi ki bua a fala?

¹¹ Dinla a laa leni a nunceli ke o Diedo bi taa ŋa ki tieni n nuu nni ku tanlongu nni. Bi bi tigini nni ke min kpa ŋa, ama n bi cedi a ki yedi ke n kan tandi n nuu ki sii fini n daano, kelima o Diedo n gandi a.

¹² Diidi ki le, n baa, a kpalibu bonjenga n no. N bi jia ŋan le ki bandi ke n bontienkaala kuli nni mii kubi a po janbi, mii yie a bali mo, mii pia a po tagiliba kuli. Ama fini a dia nni ti dadi ki bua ki ñani n miali.

¹³ O Diedo n tua o bujialo mini leni fini siiga. O Diedo n tuu ŋa n panli. Ama mini wani, n kan sii ŋa.

¹⁴ Mi kpanjakpelima yedi: ‹Mi biadima ña bi nibiadiba kane.› Lane ke n kan sii ŋa.

¹⁵ Fini Isidayeli bado, a ñani ki baa tuogi leni ŋme bu toabu? A ŋua ki deli ŋme? Mini o sangbankpiemo, mini li canfundili?

¹⁶ O Diedo n tua o koanpaado ki jia ti buudi mini leni fini siiga. O baa diidi ki bu ki faabi nni, ki saa n po i moamoani ki gaa nni a nuu nni.»

¹⁷ Davidi n den maadi Sayuli laa maama ki gbeni, Sayuli den yedi: «A yaa nialu liga yo, n bijua Davidi?» Lanwani, Sayuli den buudi

¹⁸ ki yedi Davidi: «A tiegi ki cie nni, kelima n tieni a mi biadima, ke a mo guani nni mi ŋanma.

¹⁹ Dinla a doagidi a ŋanbili n po, kelima o Diedo bi taa nni ki tieni a nuu nni, ama ŋaa kpa nni.

²⁰ Naani o nilo yaa ludi o yibali, o baa cedi wan yaa caa leni laafia? O Diedo n guani a ŋan tieni n po yaa ŋanbili dinla ne yaa panpaani.

²¹ Moala n bandi cain ke a baa je li bali, Isidayeli diema bali baa kua a nuu nni ki yaa ye ki pa.

²² Lanwani, ŋan taa o Diedo yeli ki poli ke a kan bolini n buolu n puoli po, ki kan didi bolini n yeli n baadiegu nni mo.»

²³ Davidi den poli nani Sayuli n mia maama. Lanwani, Sayuli den kuni o denpo, ke Davidi leni o niba mo guani bi wuonkaanu po, li juali nni.