1 Samueli 23 - U TIENU MAAMA TILI 2013

Davidi faabi Keyila dogu ke Sayuli mo ŋoadi ki deli o

¹ Bi den cua ki yedi Davidi: «Diidi ki le, Filisiti yaaba baa Keyila ki fenli ti kpaandi bi jali nni.»

² Davidi den buali o Diedo: «Min gedi ki baa Filisiti yaaba yeni bi?» O Diedo den guani ki yedi o: «Gedi ki baa ba ki gaa Keyila yaaba.»

³ Ama Davidi niba den yedi o: «Diidi ki le, baa nekanba Juda nni ti ye leni i jeje. Li baa yaa tie lede ti yaa ji gedi Keyila ki baa tuogi leni Filisiti yaaba toagola mo?»

⁴ Lani, Davidi go den buali o Diedo. O Diedo den guani ki yedi o: «Ŋan fii ki gedi Keyila kelima n baa taa Filisiti yaaba ki teni a.»

⁵ Lane Davidi leni o niba den fii ki gedi Keyila dogu ki tuogi leni Filisiti yaaba bu toabu. Davidi den paadi ba cain, ki fagi bi yandi. Yeni Davidi den faabi Keyila yaaba.

⁶ Li den sua ke Ahimeleki bijua Abiatari n den sani ki gedi Davidi kani Keyila po yeni, o den kubi ki kopadician-liadibiga yaaga n tie bencabili yeni.

⁷ Bi den waani Sayuli ke Davidi cua Keyila. O den yedi: «U Tienu taa o ki teni nni, kelima o cua ki luoni o yuli yaa dogu n pia a buliñoana leni ti bonluoditi nni.»

⁸ Lanwani, Sayuli den yini bi niba kuli bu toabu po ke ban gedi Keyila ki lindi ki cebini Davidi leni o niba.

⁹ Davidi n den bandi Sayuli n jagi o po yaa jagibiadili, o den teni ke o kopadiciamo Abiatari cuani li cabilakaali yeni,

¹⁰ ke o yedi: «O Diedo, fini Isidayeli Tienu, mini a naacemo gbadi ke Sayuli bua ki cua Keyila ki bolini u, kelima mini yaa po.

¹¹ Keyila yaaba baa taa nni ki teni o bi? Sayuli baa cua nani min gbadi maama bi? O Diedo, Isidayeli Tienu, n mia ŋa, ŋan doagidi ki waani mini a naacemo.» O Diedo den guani ki yedi o: «O baa cua.»

¹² Lanwani, Davidi go den yedi: «Keyila yaaba baa taa mini leni n niba ki teni Sayuli bi?» O Diedo den guani ki yedi: «Bi baa taa yi ki teni o.»

¹³ Lane Davidi den fii leni o niba yaaba n den pundi nani niba kobiluoba, ki ñani Keyila ki gedi ban den baa fidi ki gedi naankani. Sayuli n den gbadi ke Davidi ñani Keyila ki sani, o den kpadi o sancenli.

¹⁴ Davidi den ye mi fanpienma nni, ki wuo ti joamabidi nni. O den waagi ki ye a juana kani, Sifi dogu yaa fanpienma nni. Sayuli den lingi o yogu kuli, ama U Tienu naa den tuo ke o baa o nuu nni.

U Tienu go faabi Davidi Sayuli nuu nni

¹⁵ Davidi n den laa ke Sayuli kpendi ki bua ki kpa o, o den sedi Sifi fanpienma nni, Orsa kani.

¹⁶ Lanyogunu Sayuli bijua Jonatan den fii ki gedi Davidi po li fuali nni. O den paagi Davidi pali ki yedi ke wan yaa dugi U Tienu po.

¹⁷ O go den yedi o: «Da jie liba kelima n baa Sayuli nuu kan pundi a. A baa tua Isidayeli bado, nmo baa tua a duogili. N baa Sayuli wani o ba bani lipo bonŋanla.»

¹⁸ Bi go den kuani o ŋantaado leni biyaba o Diedo nintuali. Davidi go den ye Orsa nni, Jonatan mo den guani ki kuni o denpo.

¹⁹ Li yaa puoli, Sifi yaaba den gedi Sayuli kani Gibeya dogu po ki yedi o: «Ŋaa bani ke Davidi wuo ti siiga? O ye Orsa joamabidi nni, Akila juali po, u tialu ganu po.

²⁰ Lanwani, o bado, a yaa sua ke a bua, ŋan cua ne. Ti baa moandi ki cuo o ki teni a.»

²¹ Sayuli den yedi: «O Diedo n seligi yi kelima yi gbadi n po mi ninñima.

²² Gedi mani ki go yaa buali ki pugidi, ki bandi bonŋanla wan tagini ki gedi naani leni yua n laa o likani, kelima bi waani nni ke o fani hali boncianla.

²³ Yin lingi mani ki bandi bonŋanla wan wuondi naankani kuli. Yi yaa bandi cain, yin guani ne, lanwani n baa yegi leni yi. O yaa ye mi diema nni kuli, n baa lingi o Juda niba kuli siiga.»

²⁴ Lanwani, bi den fii ki kpa kua Sayuli liiga ki kuni Sifi. Li den sua ke Davidi leni o niba ye Mayona dogu yaa fuali nni, yaa tialiciamu n ye mi fanpienma ganu po.

²⁵ Sayuli den fii leni o niba ki gedi ki baa n lingi Davidi. Bi den waani Davidi laa bonla. Lani, o den jiidi ku tanciangu po ki kua Mayona fanpienma nni. Sayuli n den gbadi lani, o den ŋoadi Davidi Mayona fanpienma yeni niinni.

²⁶ Sayuli den cuoni li juali yeni kaliyendu ke Davidi leni o niba mo cuoni u kaliyuu. Davidi den jaligi ki bua ki ciadi Sayuli nuu nni. Sayuli leni o niba n den lindi ki cebini Davidi leni o niba ki bua ki cuo ba yaa yogunu,

²⁷ o tondo den cua Sayuli kani ki yedi o: «Lebidi tontoni ki guani ne, kelima Filisiti yaaba baa ti dogu.»

²⁸ Lane Sayuli den cedi Davidi ŋoadima ki lebidi ki kuni ki baa n tuogi leni Filisiti yaaba bu toabu. Li tie lani yaa po ke bi yini laa kaanu mi Lengima joatangu.