1 Samueli 22 - U TIENU MAAMA TILI 2013

¹ Davidi den ñani likani ki sani ki ban wuoni Adulami dogu yaa tanlongu nni. O kpeliba leni o baadiegu yaaba kuli den gbadi ki ŋoadi o lipo.

² Yaaba n den ye leni fala, yaaba n den pia pana leni yaaba n den ye leni li pabiidili kuli den fii ki gedi Davidi kani. O den tua bi yudaano. Yaaba n den taani ki ye leni o yeni den bua ki pundi jaba kobinaa.

³ Davidi den fii lankani ki gedi Moabi diema nni, Misipa dogu. O den yedi Moabi bado: «N mia ŋa ŋan cedi n baa leni n naa n cua ki yaa ye a kani hali min bandi U Tienu n baa tieni n po yaala.»

⁴ O den gedini ba Moabi bado kani ke bi den ye lankani wani Davidi n den ye u kaanpaalu nni yaa yogunu kuli.

⁵ Dayenli o saawalipualo Gadi den yedi Davidi: «Da go wuo ne, guani ki kua Juda diema nni.» Lani, Davidi den ñani likani ki gedi ki ban kua Hereti fuali nni.

Sayuli kpa Nobi kopadicianba

⁶ Sayuli den gbadi ke bi pia Davidi leni o niba laabaalo. Wani Sayuli den kaa Gibeya dogu, tamarisi tibu soangu nni li juali po. O den kubi o kpaanli ke o naacenba kuli kpaa ki lindi o.

⁷ Sayuli den yedi o naacenba yeni: «Yinba Benjamen yaaba, yin cengi mani. Naani Isayi bijua baa pa yi kuli i kuani leni duventiidi bi? Naani o baa teni yi kuli n tua toatieba tudili leni toatieba kobiga yudanba bi?

⁸ Be yaa po yo ke yi kuli taani ki fii ki sedi n po, ki bua ki janbi nni? Li gaa lede ke yi siiga oba kuli naa waani nni ke n bijua leni Isayi bijua kuani o ŋantaado bi siiga? Be yaa po ke yi siiga oba kuli ki gbadi n po ninñima, ki waani nni ke n bijua fiini n naacemo ke o sedi n po, ki dia nni ti dadi, ki bua ki cuo nni nani wan ko tiendi maama dinla ne?»

⁹ Lanwani, Edomi diema yua Doyegi, yua n den ye Sayuli naacenba siiga den yedi: «N den laa Isayi bijua ke o cua Nobi dogu nni, Ahitubi bijua Ahimeleki kani.

¹⁰ Ahimeleki den mia o po o Diedo ki buali o o po. O den puni o li bonjekaala, ki go teni o Filisiti yua Goliati jugisiega.»

¹¹ Lani, o bado den soani ke bi ban yini Ahitubi bijua o kopadiciamo Ahimeleki leni o baadiegu yaaba, bani Nobi dogu kopadicianba. Bikuli den fii ki cua o bado kani.

¹² Wani Sayuli den yedi: «Ahitubi bijua, ŋan cengi.» O den guani ki yedi: «N daano, n cengi.»

¹³ Sayuli den yedi o: «Be yaa po ke yi janbi nni, fini leni Isayi bijua? A puni o li bonjekaala leni ki jugisiega, ki go mia o po U Tienu ki buali o o po, ke o se n po ki dia nni nani wan ko tiendi maama dinla ne.»

¹⁴ Ahimeleki den guani ki yedi o bado: «A naacenba kuli siiga ŋme naani leni Davidi ke a fidi ki dugi o po? Wani yua n tie fini o bado cuado leni a guudikaaba yudaano, a diegu yaaba kuli n jigini yua.

¹⁵ Dinla bebe yo ke n da mia o po U Tienu ki buali o o po? U Tienu n luoni n po min janbi a. Fini o bado n da tuni mini a naacemo bi n baadiegu niloba kuli tagiliba, kelima mii den pia min bani yaala kuli laa maama nni.»

¹⁶ O bado den yedi: «Ahimeleki, a baa kpe fini leni a baadiegu yaaba kuli.»

¹⁷ Lanwani, o bado den yedi o guudikaaba yaaba n ye o kani: «Yin nagini ki kpa o Diedo kopadicianba, kelima bimoko todi Davidi. Bi den bani ke o tiini ki bua ki ciadi ki naa waani nni.» Ama o bado guudikaaba den yie baa tandi bi nii ki kpa o Diedo kopadicianba.

¹⁸ Lani, o bado den yedi Doyegi: «Fini n nagini ki kpa U Tienu kopadicianba.» Wani Edomi yua Doyegi den nagini ki kpa bi kopadicianba. Landaali o den kpa piinii n nibimuu, yaaba n den laa yaa kopadician-liadibila n luni leni len gaali.

¹⁹ Sayuli go den soani ke bi kpa yaaba n sieni bi kopadicianba dogu Nobi kuli nni leni mu jugisiemu, bi jaba, bi puoba, a bila, a biŋaanda, i ne, i ŋunbi leni i pe. O den teni ke bi kpa bikuli leni mu jugisiemu.

²⁰ Ama Ahitubi bijua Ahimeleki bila siiga yendo den sani ki cia. O den yi Abiatari. O den sani ki ŋoadi Davidi,

²¹ ki waani o ke Sayuli kpa o Diedo kopadicianba.

²² Davidi den yedi Abiatari: «Landaali n den bandi ke Doyegi ye likani. N den bani ke laa pia kuli tama ke o baa waani Sayuli. A baadiegu yaaba kuuma kuli ŋua mine.

²³ Ŋan yaa ye n kani ki da jie liba, kelima yua n moandi ki bua ki ñani n miali, o moandi ki bua ki ñani a yaali mo. A yaa ye n kani liba kuli kan tieni a.»