1 Samueli 20 - U TIENU MAAMA TILI 2013

Davidi leni o danli juogi o ciadima po

¹ Davidi den fii Nayoti ki kuu leni Rama, ki sani ki guani ki cua Jonatan kani, ki yedi o: «N tieni be? N tagili tie ile? N tudi a baa po be ke o lingi ki bua ki kpa nni?»

² Jonatan den guani ki yedi o: «Li kan tua yeni, a kan kpe. N baa kan tieni bonliba, li yaa yabi leni li yaa wa kuli, ki kan waani nni. Be n baa teni wan wuoni nni laa bonla? Li kan tuo.»

³ Davidi den poli ki yedi: «A baa bani cain ke a pali mani n po, ke o jagi o yama nni ki yedi: ‹Jonatan n da bandi laa bonla ke lan da ti biidi o pali?› Ama i moamoani hali o Diedo po leni a yaa po kuli, mini leni mi kuuma ki foagi.»

⁴ Lani, Jonatan den yedi Davidi: «N baa tieni a po ŋan bua yaala kuli.»

⁵ Davidi den guani ki yedi o: «Saala tie o ŋmapaano jaanma, n bi baa kali ki je leni o bado, ama ŋan cedi min gedi ki wuoni u kuanu nni hali li dataali daali ku yenjuagu.

⁶ A baa yaa tiadi ki buali n po, ŋan yedi o: ‹Davidi den mia nni leni i tigini, ke min cedi wan jaligi ki gedi o dogu Betelemi, kelima o deni yaaba pia ban maani ki padi yaa padili binli kuli likani.›

⁷ A baa yaa yedi: ‹To, li ŋani!› Lanwani mini a naacemo baa yaa ye leni mi yanduanma. Ama o yaa fiini o pali, ŋan bandi ke o jagi n bodima yo.

⁸ Ŋan doagidi mini a naacemo po a buama, kelima a den tieni leni nni o ŋantaado nianli o Diedo nintuali. I tagili yaa ye n kani mo, ŋan kpa nni fini a ba. Be yaa po ke a baa gedini nni a baa po?»

⁹ Jonatan den yedi o: «Ŋan da kuani a yama nni ke n kan waani a. N yaa bandi ke n baa kubi a po mi biadima o pali nni, laa pia kuli mine, n baa waani a.»

¹⁰ Lanwani, Davidi den yedi Jonatan: «A baa yaa guani ki maadi a mi pabiendanmaama, ŋme n baa waani nni?»

¹¹ Jonatan den yedi Davidi: «Cua ne tin gedi i kuani po.» Lani, bani nibilie den yegi ki gedi i kuani po.

¹² Lanwani, Jonatan den yedi Davidi: «O Diedo, Isidayeli Tienu tie n siedo. N baa biigi n baa saala bi saalayua. Li yaa tie ke o pali mani fini Davidi po, n yàá soani nilo a kani wan wani a,

¹³ o Diedo n cuo mini Jonatan o cuonbiadu. Li yaa tie ke n baa bua ki tieni mi biadima, n baa waani a lani moko, ki cedi ŋan fii ki gedi leni laafia. O Diedo n yaa ye leni a nani wan den ye leni n baa maama.

¹⁴ N yaa baa ki ye leni miali, ŋan ŋanbi n po nani o Diedo n bili maama. Lani, n kan kpe.

¹⁵ N yaa kpe mo, ba o Diedo n baa ti bolini fini Davidi yibalinba kuli ki tinga nni yaa yogunu, ŋan da cedi a ŋanbili n diegu po.»

¹⁶ Jonatan go den kuani o ŋantaado leni Davidi diegu, ki yedi: «O Diedo n pa Davidi yibalinba bi panpaani.»

¹⁷ Jonatan den teni ke Davidi go poli hali wan pia o po yaa buama yaa po, kelima wani Jonatan den bua o nani wan bua o yuli maama yeni.

¹⁸ Li yaa puoli, Jonatan den yedi o: «Saala n tie o ŋmapaano jaanma. Bi baa le ke ŋaa ye likani, kelima a kalikaanu baa yaa tie kaankuomu.

¹⁹ Li dataali ŋan jaligi ki gedi ŋan den wuoni naani landaali yeni. Ŋan gedi ki ban wuoni Eseli tanciangu kani.

²⁰ Mini mo, n baa toa piemitaa ki teli lipo nani n jagi ki bua ki cuo bonliba yeni.

²¹ Lanwani, n baa soani ki biga ki yedi o: ‹Gedi ki ban lingi i piemi yeni ne.› N yaa yedi ki biga yeni: ‹I piemi yeni ye a puoli po yo. Lebidi ki taa yi ki cuani ne.› Lanwani ŋan guani ki cua, kelima hali o Diedo po, a yama n yaa dua, ŋan da jie liba kuli.

²² Ama n yaa yedi ki biga: ‹I piemi ye a liiga›, lanwani ŋan fii ki yaa tiini, kelima o Diedo soani a ŋan gedi foagima yo.

²³ Timo n den bili yaa ŋantaado ti siiga yeni, o Diedo ye ti siiga ki tie siedi lipo hali yaa yogunu kuli.»

²⁴ Li yaa puoli, Davidi den gedi ki ban wuoni i kuani po. O ŋmapaano n den ñani yaa daali, o bado den kali ki baa je mi jaanjiema.

²⁵ O den kali o kalikaanu po, yuu n kuu li goanli nani wan yen maani ki kaa maama. Jonatan den kali o nintuali, Abineri mo den kali ki bali o. Ama Davidi kaanu den tie kaankuomu.

²⁶ Sayuli naa den yedi liba landaali. Ama o den bungi o pali nni, ke bonludikaaliba n tieni, ke o joagini U Tienu po. O li joagine, laa pia kuli tama.

²⁷ Ama o ŋmapaano dalieli daali, Davidi kaanu go den tie kaankuomu. Lanwani, Sayuli den yedi o bijua Jonatan: «Be n teni ke wonli leni dinla kuli Isayi bijua naa cua mi jaanjiema po?»

²⁸ Jonatan den guani ki yedi Sayuli: «Davidi den mia nni leni i tigini, ke min cedi wan gedi Betelemi.

²⁹ O den yedi: ‹N mia ŋa, cedi min gedi kelima n deni yaaba pia li padili u dogu nni, n kpelo mo yini nni. Lanwani, a pali yaa mani n po, ŋan cedi min gedi tontoni ki ban le n kpiiba.› Li tie lani yaa po ke waa cua fini o bado saajekaanu kani ne.»

³⁰ Lani, Sayuli pali den fii Jonatan po ke o yedi o: «Puoyenyiedo biga ne! N bani ke a gandi Isayi bijua ki danli leni o, ke li baa tua fini leni a naa kuli po fe.

³¹ Isayi bijua yaa fo ki tinga nni, a kan yaa ye ki buali ŋan je bali. Lani yaa po, moala ŋan soani ban ban lingi o ki cuani o n po, kelima li pundi wan kpe.»

³² Jonatan den guani ki yedi o baa Sayuli: «Be yaa po ke o baa kpe? O tieni be?»

³³ Sayuli den yoagini o kpaanli ke o baa muu o. Lani, Jonatan den bandi ke o baa bili ke o li baa kpa Davide.

³⁴ Lanwani, Jonatan pali den beni ke o den fii ki ñani u saajekaanu kani. Waa go den taani leni ba ki dini liba o ŋmapaano dalieli jaanjiema, kelima o pali den biidi leni o baa n den sugi Davidi.

³⁵ Landaali yaa fiifaama ku tiŋaagu, Jonatan den gedi i kuani po, wani leni Davidi n den bili yaa kaanu, ke ki biga yegi leni o.

³⁶ O den yedi ki biga yeni: «Sani ki ban taa min baa toa yaa piemi.» Ki biga n den tiini yaa yogunu, Jonatan den toani u piemu ke u gedi o liiga.

³⁷ Ki biga n den nagini u piemu yeni kani, Jonatan den tiani o po ki yedi: «Naani u piemu ki ye a liiga ka?

³⁸ O go den tiani ki biga po, ki yedi: ‹Jaligi tontoni, da sedi!› » Lanwani, ki biga den taa u piemu ki guani o canbaa kani.

³⁹ O naa den bani liba kuli lienni. Jonatan leni Davidi bebe n den bani lan tie yaala.

⁴⁰ Lanwani, Jonatan den teni ki biga o luoli leni o dabanli ki yedi o: «Taa ki gedini u dogu po.»

⁴¹ Ki biga n den gedi, Davidi den wuodi ganu po ki cua ki gbaani ki pugi Jonatan taalimitaa. Bi den gobini biyaba leni mi buama, ke bikuli den buudi. Ama Davidi n den buudi ki cie.

⁴² Lanwani Jonatan den yedi Davidi: «Ŋan gedi leni mi yanduanma. Nani tin poli ki niani tiyaba o Diedo yeli nni yeni, wani o Diedo n yaa ye mini leni fini siiga, ki tie siedi. Wan go yaa ye a puoliŋuani leni n yaa puoliŋuani siiga, hali yaa yogunu kuli.»