1 Samueli 2 - U TIENU MAAMA TILI 2013

Anna pagi U Tienu

¹ Anna den jaandi ki yedi: «O Diedo teni ke n pali mangi. O Diedo teni ke n yuli yaadi. N yaadi n ñoabu ki ñuadi n yibalinba. N pali mangi kelima fini o Diedo faabi nni.

² Yua n Gagidi ki ŋani nani fini o Diedo kuli naa ye. Toa kuli ki ye ke laa tie fini. Oba ki guu ti nani fini U Tienu ti Tanciangu.

³ Yinba n yibalinba, da go maadi mani leni japaadi. Japaamaama mo n da go ña yi ñoana nni, Kelima o Diedo tie U Tienu ki bani li bonla kuli. Wani n biigidi bi nisaaliba bontienkaala kuli.

⁴ A jakoanda dabana kua, Ama a tadima ñaagi u fidu nani ku gbanñagidigu yeni.

⁵ Yaaba n den di ki guodi ji kuadi bi yula Ki bua ki baa ki je. Ama mi koma gbeni a konkonba po. Ki ŋoaliga mali taalimilele, Yua n den mali boncianla mo yaa madi sedi.

⁶ O Diedo tendi ke bi niba ku ki go tendi ke bine ye ki fo, O tendi ke bi niba ji ki koa bi tinkpiba diema nni, Ki go tendi ke bine ña lienni.

⁷ O Diedo yen teni bi nitianba n luo, Ki teni bine n yaa pia. O jiindi bi nitianba, Ki fiindi bi nitianba mo.

⁸ O fiindi o ninñinnilo, ki ñandi o ku tangbangu nni. Ki fiindi o luodo, ki ñandi o ti baadi nni, Ki tendi ke bi taagi ki kaa leni a nikpiaga ti kpiagidi kaanu. O Diedo n die ki tinga benjieli kuli, Ki teni ke ki maa yi yaa po.

⁹ O baa yaa kubi o buakaaba ban caa naankani kuli. Ama bi nibiadiba wani baa bodi li biigili nni. O nilo kan paadi liba leni o fidiceli.

¹⁰ O Diedo yibalinba baa midi. O baa teni i tatantani n tiani hali tanpoli ki pundi bi kani. O Diedo baa jia ti buudi leni ki tinga niba kuli. O baa pa o bado u paalu, O baa pugini wan gagidi ki dini yua li bali li bali paalu.»

¹¹ Elikana den guani ki kuni o denpo Rama. Ki biga yeni den ye o kopadiciamo Eli kani, ki tuuni o Diedo po.

Eli bijaba tuonbiada

¹² Eli bijaba den tie fanma, baa den bani o Diedo.

¹³ Diidi ki le laa kopadicianba n den tiendi bi niba maama: O nilo yaa den cuani o yanga ke bi padi o po kuli, o kopadiciamo naacemo yen cua ban ŋaandi ti nandi yaa yogunu. O yen kubi yaa nanjogidi n pia ñinataa,

¹⁴ ki muudi ti nandi n ŋaa yaa tiagu nni, li yaa tie bobili bi sanli bi cianciagu. I nanjogidi n muu ki ñani yaala kuli, o kopadiciamo yen gaa ki yaa kubi o yuli po. Bi den tiendi yaaba n ña Isidayeli diema nni ki kpendi Silo kuli yene.

¹⁵ Hali ke bi daa yen juu mi kpama moko, o kopadiciamo naacemo yen cua ki yedi yua cua ke bi padi o po yeni: «Ŋan cuani yaa nandi n baa sagi o kopadiciamo po. O kan gaa a kani yaa nandi n ŋaani, o bua ti nankaadi bebe.»

¹⁶ O nilo yeni yaa den yedi o: «Bi yaa juu mi kpama, ŋan taa ŋan bua yaala kuli.» O naacemo yen guani ki yedi: «Aa-a, ŋan teni nni moala moala, lani yaa ka n baa gaa leni u paalu.»

¹⁷ Laa jawaaba den kuandi bi yula ti tuonbiaciandi nni o Diedo kani, kelima bi den fali ban padi yaa pada o Diedo po.

¹⁸ Samueli den tuuni o Diedo nintuali. Ki biga yeni den goli yaaba n tuuni U Tienu diegu nni n yen goli yaa kpalibu buolu, ke bu luni leni len gaali.

¹⁹ Binli kuli o naa yen tieni ki liadibiga ki cuani o po, wani leni o calo yaa kpendi ki baa padi binli kuli yaa padili.

²⁰ Eli yen gaaliti Elikana leni o pua ki tua: «O Diedo n teni ŋan baa bitoana o pua ne kani, ban lebidi wan puni yua o Diedo.» Li yaa puoli, Elikana leni o pua yen guani ki kuni bi denpo.

²¹ O Diedo den nuali ki laa Anna po ki puni o ti madi, ke o go mali bonjalataa leni bonpolalie. Ki biga Samueli den fandi ki pugidi ki tuuni o Diedo po.

²² Eli den podi hali boncianla. O den gbadi o bijaba n tiendi Isidayeli yaaba kuli maama. O go den gbadi ke bi conbi leni yaa puoba n den tuuni u kadikaanu gbandieli buliñoabu kani moko.

²³ O den yedi ba: «Be yaa po ke yi tuadi a naa tuada? N gbadi bi niba kuli kani yi tuonbiada maama.

²⁴ Aa-a, n bila, min gba ke o Diedo niba maadi yi po yaala yeni, naa ŋani.

²⁵ O nilo yaa tudi o lielo po, U Tienu n baa tua o koanpaado. Ama o yaa tudi wani o Diedo po, ŋme n baa mia o po sugili?» Baa den cengi bi jakpelo maama, kelima o Diedo den jagi ke o baa kpa ba.

²⁶ O jawaalo Samueli den fandi ki pugidi. O Diedo leni bi niba kuli pala den magidi o po ki pugidi.

Yaa buudi n baa baa Eli leni o diegu

²⁷ U Tienu nilo den cua Eli kani ki yedi o: «O Diedo yedi: Mii den doagidi n yuli a baadiegu yaaba po ban den ye Ejipiti diema nni, ki tie Faraon yonbi te?

²⁸ N den gandi a yaaja Isidayeli nibuoli kuli siiga, ke wan yaa tie n po o kopadiciamo, ki yen do ki pundi n padibinbinli kani ki padi ki juu yaa tulale yaa nuulu n mani, ki yaa la li kopadicianliadili n nintuali. N go den puni o diegu yaaba Isidayeli yaaba n padi yaa padijuukaana kuli.

²⁹ Be yaa po ke yi fali ki ŋmaadi min bili ke bi padi n po yaa pada, min bili ke ban yaa kpendinni yaa paabu kuli n dieli nni? Be yaa po ke a fangi a bila ki cie mini, ki ñandi n niba Isidayeli yaaba n padi n po yaa pada siiga yaala n ŋani ki cie, ki wubi yi yula leni lani?

³⁰ Lani yaa po, mini o Diedo Isidayeli Tienu yedi: ‹N den bili ke a diegu leni a baadiegu baa yaa tuuni li kopadiciantuonli n nintuali hali yaa yogunu kuli. Ama dinla n kadi ki waani ke li kan go tua yeni. N baa kpiagi yua n kpiagi nni, ama yaaba n fali nni, n baa fali ba.

³¹ Diidi ki le u yogunu kpendi ke n baa bolini a diegu gbanmandanba leni a baadiegu yaa gbanmandanba, ke nikpelo kuli kan go yaa ye a diegu nni.

³² A baa le yibalinba n dieli nni. Ba ke n baa pa Isidayeli mi yemanma, a yaa diegu nni wani jakpelo kan go tieni abada.

³³ Die n baa cedi a buolu yua n yaa taabi n padibinbinli kani, lan yaa koani a nuni, ki ñundi a li mutuoli. A diegu niba yaaba n sieni mo baa yaa tuadi ki baali bi panma siiga.

³⁴ Diidi ki le yaala n baa tieni a bijaliediba Ofini leni Finea ki tua a po sinankeeni ke li kuli baa tieni. Bani bonbilie kuli baa taani ki kpe dayenli.

³⁵ Li yaa puoli, n baa dini n kopadiciamo min baa fidi ki yaa dugi yua yaa po, yua n baa yaa tiendi n pali leni n yantiali n bua maama. N baa sieni o diegu, ke o puoliŋuani baa yaa kubi li kopadiciantuonli, min baa gagidi ki dini yua li bali yaa nintuali hali yaa yogunu kuli.

³⁶ Lanwani, yua n baa sieni a buolu kuli nni baa cua ki gbaani o nintuali ki mia tanga leni mi jiema ki yedi: N mia ŋa, ŋan kuani nni bi kopadicianba tuona tuonliba niinni, min yaa baadi ki di.› »