1 Samueli 19 - U TIENU MAAMA TILI 2013

Jonatan maadi ki faabi Davidi

¹ Sayuli den maadi leni o bijua Jonatan leni o koanbala kuli ke o bua ki kpa Davidi. Ama Sayuli bijua Jonatan pali den mani Davidi po hali boncianla.

² Jonatan den waani Davidi ki yedi: «N baa Sayuli bua ki kpa ŋa. Saala ku tiŋaagu ŋan guudi a yuli ki gedi yaa kaanu n duagi ki ban wuoni.

³ N baa yegi leni n baa ŋan baa n wuoni yaa kuanu nni yeni. N baa maadi o a maama ki le wan baa yedi yaala ki nan yuandi ki waani a.»

⁴ Li yaa puoli, Jonatan den maadi Davidi po yaala n ŋani o baa Sayuli kani, ki yedi o: «O bado, n mia ŋa ŋan da tudi a naacemo Davidi po, kelima waa tudi a po liba. O ŋanbi a po yo moko,

⁵ kelima o den luni o miali ki kpa Filisiti joa Goliati. O Diedo den tieni tinba Isidayeli yaaba kuli po mi faabicianma. Amo den laa la ki mangi a pali. Lanwani, be yaa po ke a baa wuli yua n ki pia tagili soama? Be yaa po ke a bua ki kpa Davidi fanma fanma?»

⁶ Sayuli den cengi Jonatan maama, ki poli ki yedi: «Hali o Diedo po, Davidi kan kpe.»

⁷ Lanwani, Jonatan den yini Davidi ki togidi o laa bonla kuli. Li yaa puoli, o den gedini o Sayuli kani ke o tuuni o po nani mi kpiama yeni.

Davidi pua Mikali faabi o

⁸ Bu toabu go den fii. Davidi den fii leni bi toatieba ki gedi ki tuogi leni Filisiti yaaba bu toabu. O den kpa ba boncianla, ke yaaba n sieni mo lebidi ki sani.

⁹ Lanyogunu o Diedo n den soani yaa cicibiadiga den ŋoadi Sayuli ke o kaa o diegu nni, ki muubi o kpaanli. Davidi den pua ku gogidigu.

¹⁰ Sayuli den moandi ki bua ki muu ki tabini o leni li goanli, ama Davidi den lia ke Sayuli kpaanli den cuo li goanli. Laa ñiagu, Davidi den sani ki cia.

¹¹ Sayuli den soani o naacenba Davidi dieli po ke ban guudi ki kpa o ku tiŋaagu. Ama Davidi pua Mikali den waani o ki yedi: «Ku ñiagu ne, a yàá sani ki cia, saala bi baa kpa ŋa.»

¹² O den ñani Davidi li bonli kani ki jiini o ke o sani ki cia.

¹³ Lanwani, Mikali den taa yaa bulo n naani leni o nilo ki maani u duanu po, ki go maani ti ŋuakobidi kpalibu o yuli po, ki pini o bulo yeni leni bu kpalibu.

¹⁴ Sayuli n den soani o naacenba ban ban cuo Davidi, Mikali den yedi ke o yia.

¹⁵ Lanwani, Sayuli go den soani o naacenba ban ban le Davidi. O den yedi ba: «Yin tugi o mani leni u duanu ki cuani o n kani min kpa o.»

¹⁶ O naacenba n den pundi ki kua, bi den laa ke yaa bulo n naani leni o nilo maa u duanu po ke ti ŋuakobidi kpalibu mo ye o yuli po.

¹⁷ Sayuli den yedi Mikali: «Be yaa po ke a janbi nni nanda, ki cedi ke n yibali ñani ki ciadi nni?» Mikali den guani ki yedi Sayuli: «O den yedi nni: ‹Cedi min ña, lani yàá ka n baa kpa ŋa.› »

Davidi leni Sayuli gedi Nayoti

¹⁸ Davidi den sani ki ciadi yene. O den gedi Rama, Samueli po, ki togidi o Sayuli n den tieni o yaala kuli. Lanwani, wani leni Samueli den gedi ki ban ye Nayoti dogu nni.

¹⁹ Bi den togidi Sayuli ki yedi o: «Davidi ye Nayoti ki kuu leni Rama.»

²⁰ Lani, Sayuli den soani a tonda ke ban gedi ki ban cuo Davidi. Ban den laa bi saawalipuaba goli ke bi pua saawali ke Samueli se leni ba ki tie bi yudaano, U Tienu Fuoma den kua ki diedi bani Sayuli tonda ke bimoko den pua saawali.

²¹ Sayuli n den gbadi laa bonla, o go den soani tonditoaba. Bimoko den pua saawali. Lanwani, o go den soani mitaama. Bimoko go den pua saawali.

²² Lanwani, Sayuli den fii wani o ba ki caa Rama. Wan den pundi yaa caacianli n ye Seku dogu, o den buali: «Samueli leni Davidi ye le?» Bi den guani ki yedi o: «Bi ye Nayoti ki kuu leni Rama.»

²³ Lani, o den fii ki caa Nayoti. U Tienu Fuoma den kua omoko yaa niinni ki diedi o ke o den cuoni ki pua saawali hali ki ban pundi Nayoti, ki kuu Rama.

²⁴ O den landi o tiadi ki mo pua saawali Samueli kani. O den laabi tiipo mubima landaali leni li ñiagu kuli. Li tie lani yaa po ke bi tua: «Sayuli moko tie bi saawalipuaba siiga yua yo?»