1 Samueli 18 - U TIENU MAAMA TILI 2013

Jonatan danli leni Davidi

¹ Davidi n den maadi leni Sayuli ki gbeni, lanyogunu Jonatan yama den kua Davidi niinni, ke o den bua o nani o yuceli yeni.

² Landaali Sayuli den taa Davidi ki nagini o baa, ke waa go ye o baa diegu nni.

³ Jonatan mo den kuani o ŋantaado leni Davidi, kelima o den bua o nani o yuceli yeni.

⁴ Jonatan den goliti o kpalibu ki puni Davidi, ki go puni o o minteelitiadi. O den puni o ba o jugisiega, o dabanli leni o gbanñagidigu.

⁵ Sayuli yaa den soani Davidi naankani kuli, o yen gedi ki paadi. Lani, Sayuli den teni ke o diedi bi toatieba. Bi niba kuli pala den mani Davidi po. Ba Sayuli koanbala moko yaa pala den mani o po.

Sayuli poni leni Davidi

⁶ Davidi n den kpa Goliati ke bikuli lebidi ki kuni, bi puoba den ñani Isidayeli dogi nni kuli ki tuogi o bado Sayuli, ki pua a gangaana leni baantiatoadi. Bi den pua ki yiini ki jeli, ki yigini leni li pamanli.

⁷ Yaa puoba n den jeli ki yiini yeni, bine den yiini ke bine gaani ki tua: «Sayuli den kpa tudili tudili, Davidi mo n kpa tudipiiga piiga.»

⁸ Sayuli pali den fii boncianla, kelima laa maama po. O den yedi: «Bi teni Davidi tuda piiga (10 000), ki teni nmo tudili. Be go sieni o po, li yàá tie li bali yaa ka?»

⁹ Ki cili landaali, Sayuli den nua Davidi leni li nunponli.

¹⁰ Li fiifaama, U Tienu n den soani yaa cicibiadiga go den cuo Sayuli o diegu nni. Davidi den pua ku gogidigu nani wan yen maani ki pua maama. Sayuli den muubi o kpaanli.

¹¹ O den yugidi o kpaanli ki tua o pali nni: «N baa muu ki tabini o li goanli.» Ama taalimilie kuli Davidi den lia ke waa baa o.

¹² Sayuli den jie Davidi, kelima o Diedo den ŋaa wani Sayuli ki ye leni Davidi.

¹³ Lanwani, Sayuli den ñani o o kani, ki teni ke o tua toatieba tudili yudaano. Davidi den tugi bi yuli bi ñama leni bi guanma kuli.

¹⁴ Wan den tuogi leni yaaba kuli, o den paadi ba kelima o Diedo den ye leni o.

¹⁵ Sayuli n den laa ke Davidi paadi wan togidi leni yaaba kuli, o den jie o.

¹⁶ Ama Isidayeli leni Juda yaaba kuli den bua Davidi, kelima wani n den tie bi yudaano, ki yegi leni ba, bi ñama leni bi kuama kuli.

Davidi taa Sayuli bisalo Mikali

¹⁷ Lanwani, Sayuli den yedi Davidi: «A yaa tuuni n po leni li papaali ki tiendi o Diedo toabu, n baa pa ŋa n bisakpelo Melabi, wan tua a pua.» Ama Sayuli den bungi o pali nni ki yedi: «Mii bua ki maani o po n nuu, ama Filisiti yaabe n maani o po bi nii.»

¹⁸ Davidi den guani ki yedi Sayuli: «Mii tie puu kuli, n baadiegu leni n buolu mo ki tie liba kuli Isidayeli yaaba siiga. N baa gaa lede ki tua o bado cuado?»

¹⁹ Lan den pundi ban taa Sayuli bisalo Melabi ki teni Davidi yaa yogunu, bi den taa o ki teni Meola yua Adrieli.

²⁰ Ama Sayuli bisalo Mikali den bua Davidi. Bi den waani Sayuli, ke laa bonla den dagidi o po.

²¹ O den bungi ki yedi: «N baa taa o ki teni o wan tua o po diagu ke Filisiti yaaba n maani o po bi nii.» Lanwani, Sayuli den yedi Davidi miliema: «A baa tua n cuado dinla.»

²² Sayuli den puogi o badibaanba ki yedi: «Yin juogi mani leni Davidi ŋasiili nni, ki yedi o: ‹O bado pali mani leni a, o koanbala kuli mo bua ŋa. Lanwani, moala ŋan tua o bado cuado.› »

²³ Sayuli koanbala den togidi Davidi laa maama kuli. Davidi mo den guani ki yedi ba: «Yi tama ki tua o bado cuado tie yaala n dingi bi? Mini, n tie luodo ki go tie taliga.»

²⁴ Sayuli koanbala den guani ki togidi o Davidi n yedi yaala.

²⁵ Sayuli den yedi: «Yin go yedi Davidi: ‹O bado naa bua cuadili. Wan bua yaala bebe tie Filisiti yaaba punjuodi bondi kobiga, ke wan fidi ki guani bani o yibalinba bi panpaani.› » Sayuli n den jagi yaala den tie ke o bua Davidi n baa Filisiti yaaba nuu nni ban kpa o.

²⁶ Sayuli koanbala n den togidi Davidi laa maama, o den tuo ke o baa tieni yeni ki tua o bado cuado. Hali ke li yogunu daa pundi,

²⁷ Davidi den fii leni o toatieba ki gedi ki kpa Filisiti yaaba kobilie, ki jia bi punjuodi ki cuani ki teni o bado, ke wan tua o cuado. Lanwani, Sayuli den teni o o bisalo Mikali ke o tua o pua.

²⁸ Sayuli n den laa ki bandi ke o Diedo ye leni Davidi, ke o bisalo Mikali mo bua o,

²⁹ o den jie Davidi ki pugidi. Sayuli den tua Davidi yibali hali o miali banlu.

³⁰ Filisiti yaaba yudanba den ña ki togidi leni Isidayeli yaaba bu toabu. Bi yaa ñani yaama kuli, Davidi yen paadi ba ki cie Sayuli toatieba yaaba n sieni kuli. O yeli den ñani boncianla.