1 Samueli 17 - U TIENU MAAMA TILI 2013

Goliati mia Isidayeli yaaba o muado

¹ Filisiti yaaba den taani bi toagola ki bua ki tuogi bu toabu leni Isidayeli yaaba. Bi den taani Juda yaaba dogu Soko, ki gedi Efesi-Damim dogu yuu n ye Soko leni Aseka siiga, ki kpaa bi toanagili lankani.

² Sayuli leni Isidayeli yaaba moko den taani. Bi den kpaa bi toanagili yaa joaloangu n pia telebinti tiidi niinni. Bi den caligi ki baa tuogi leni Filisiti yaaba.

³ Filisiti yaaba den se napo yaa joajiidima, Isidayeli yaaba mo napo yaa joajiidima, ke ku joaloangu ye bi siiga.

⁴ O jakoando den ñani Filisiti yaaba toanagili nni. O den tie bi dogu Gati yua, ki yi Goliati. O foaginu den tie nukpanduna luoba leni nubadiyaagu.

⁵ O den ciibi li kumoansanli ki la ti kudi liadili ke li kpiagu pundi kilo piiluoba.

⁶ O den pili yaa kumoandi n mubini o biemi kuli, ki bali u ŋalikuomu.

⁷ O kpando den gbengi ki pundi o lugido dapuadigu. Mi kpanbima kpiagu den pundi kilonbilele. Yua n den kubi o gbankoandigu den ye o liiga.

⁸ O den sedi ki kpaani ki yedi Isidayeli toatieba: «Be yaa po ke yi cua ne, ki caligi ki baa tuogi bu toabu leni ti? Mii tie Filisiti yua ka? Yimo ki tie Sayuli yonbi ka? Lanwani, yin gandi mani yi siiga niyendo wan jiidi ki tuogi leni nni.

⁹ O yaa fidi ki tuogi leni nni ki kpa nni, ti baa tua yi yonbi. Nmo yaa paadi o ki kpa o, yimo baa tua ti yonbi ki yaa tuuni ti po.»

¹⁰ Filisiti yua yeni go den yedi: «N cidi yinba Isidayeli toatieba kuli li koanli. Soani mani niyendo wan cua ne tin moa.»

¹¹ Sayuli leni Isidayeli yaaba kuli n den gbadi Filisiti yua yeni maama, bi den jie ki kandi ke bi tugusoama sani.

Davidi gedi bu toabu po

¹² Davidi den tie Isayi bijua. Isayi yeni den tie Efrati yua, lani n tie Juda diema nni Betelemi yua. O den pia bijabinii. Sayuli yogunu, wani Isayi den kpeligi ki podi.

¹³ Isayi bijaba bonbitaa den ŋoadi Sayuli ki gedi bu toabu. Laa bitaada den tie o bijakpelo Eliabi, o bijalielo Abinadabi leni o bijataalo Sama.

¹⁴ Davidi n den tie ku bijuogu. Bi bijataadiba den ŋoadi Sayuli ki gedi bu toabu.

¹⁵ Davidi den caa ki tuuni Sayuli po ki goa ki kuni Betelemi ki kpaa o baa yandi.

¹⁶ Filisiti yaaba jakoando yeni den caa ku tiŋaagu leni ku juogu kuli ki miadi Isidayeli yaaba o muado. Li den pundi dana piinaa ke o caa.

¹⁷ Isayi den yedi o bijua Davidi: «Taa i disagidi yii n bua ki pundi baabuogu ne leni ki dupenpiiga ne, ki jaligi ki gedi li toanagili po, ki ban teni a kpeliba.

¹⁸ Taa ban ŋanbi yaa jekpaga leni mi naaŋanma ne, bona piiga, ki gedini bi toacagili yudaano po. A baa n le a kpeliba yaa ye leni laafia, ki guani ki pa nni bi laabaalo.

¹⁹ Bi ye leni Sayuli leni Isidayeli toatieba kuli yaa joaloangu n pia telebinti tiidi nni, ki togidi bu toabu leni Filisiti yaaba.»

²⁰ Davidi den fii ku tiŋaapanpangu ki ŋaa ti yandi leni yankpaatoa, ki taa o tugili ki gedi nani Isayi n den puogi o maama. Wan den pundi li toanagili kani yaa yogunu, a toagola den caa ki baa caligi li toatuogili kaanu, ki yiedi i toayiedi.

²¹ Isidayeli yaaba leni Filisiti yaaba den sedi caga caga, toacagili kuli den tiegi liyali.

²² Davidi den teni o tugili o tiaguudo, ki sani ki gedi li toacagili kani ki buali o kpeliba bi yaa pia laafia.

²³ Wan den maadi leni ba yaa yogunu, Filisiti yaaba jakoando Goliati yeni den ñani Filisiti yaaba toacagili nni. O den sedi Isidayeli toatieba leni Filisiti yaa toatieba siiga, ki maadi nani mi kpiama yeni. Davidi den gbadi wan yedi yaala.

²⁴ Isidayeli toatieba n den laa laa joa, bikuli den jie boncianla, ki suli ki guani puoli.

²⁵ Isidayeli toatieba den tua: «Yi nua yaa joa n nagidi ne bi? I moamoani o cidi tinba Isidayeli yaaba li koanli. Yua n kpa o kuli, o bado baa guoni o o ŋalimano, ki pa o o bisalo, ki faabi o baadiegu leni li badituonli mo Isidayeli diema nni.»

²⁶ Davidi den buali yaa jaba n nagi leni o: «Yua n kpa o joa ne ki ñani Isidayeli yaaba po i fe, bi baa tieni o po be? Laa jifolo, Filisiti yua yeni, o tie ŋme ki baa fali U Tienu yua n fo toagoli?»

²⁷ Bi toatieba den togidi o o bado n den niani ke o baa tieni yaala yua n kpa o po.

²⁸ O kpelo Eliabi den gbadi ke o maadi leni bi toatieba ke o pali fii o po, ke o yedi o: «Be yaa po ke a jiidi ki cua ne? A ŋaa ki yankubibiga leni ŋme li fuali nni? N bani a japaadi leni a janda po. A cua ki bua ki le li koanle!»

²⁹ Davidi den guani ki yedi o: «N tieni be? Min da buali moko?»

³⁰ Lanwani, o den jigidi ki maadi leni nitoa ki go buali mi mayenma yeni. Bi go den maadi o nani mi kpiama yeni.

³¹ Ban den gbadi Davidi n yedi yaala, bi den togidi Sayuli ke o den soani ke bi yini o.

³² Davidi den yedi Sayuli: «Oba kuli gbanu n da wudi kelima Filisiti yua yeni po. Mini a naacemo baa gedi ki koani leni o.»

³³ Sayuli den yedi Davidi: «A kan fidi ki gedi ki koani leni Filisiti yua yeni, kelima a tie biga, omo tie jakoando hali o panma nni.»

³⁴ Davidi den yedi Sayuli: «Mini a naacemo, n den kpaa n baa yandi, yangbanlo bi yaa fuayanbiadiga n yi ursi yaa den cua ki cuo pebiga li pegoli kuli nni,

³⁵ n yen sani ki ŋoadi o ki pua ki guli o, ki kpibidi ka o ñoabu nni. O yaa den lebidi ki baa bibi nni, n yen cuo o koda nni ki pua ki kpa o.

³⁶ Mini a naacemo den tieni yene ki kpa i yangbanli leni fuayanbiaditoamu kuli, lanwani laa jifolo, Filisiti yua yeni, n baa soani o yene, kelima o sugi U Tienu yua n fo toagoli.»

³⁷ Davidi go den yedi: «O Diedo yua n den faabi nni leni o yangbanlo taajenbiñadi leni yaa fuayanbiadi n yi ursi yaa taatali nni, go baa gaa nni Filisiti yua ne moko yaa nuu nni.» Sayuli den yedi Davidi: «Gedi. O Diedo n yaa ye leni a.»

³⁸ Lanwani, Sayuli den lani Davidi o toatiadi. O den cibini o li kumoansanli, ki lani o ti kudi liadili.

³⁹ Davidi den yie Sayuli jugisiega ki ñagini o toatiadi ki taa ke o baa cuoni ki gbali, kelima waa den maani laa tiadi. Lane o den yedi Sayuli: «N kan fidi ki cuoni leni yaa toatiadi n tie ne, kelima mii maani ti.» O den yiedi ti.

⁴⁰ Lani, o den taa u gbiamu, ki gandi tanŋaligamuu u ñinsanu nni ki ŋuuni o yankpaaboagili nni, ki taa o tanbuncaangu ki togidi Filisiti yua.

⁴¹ Filisiti yua yeni den nagidi Davidi waamu waamu, ke yua n kubi o gbankoandigu ye o liiga.

⁴² Filisiti yua yeni n den diidi ki laa Davidi, o den fali o kelima o den sua ke o tie biga ki moani ke o nunga ŋani.

⁴³ Lani, Filisiti yua yeni den yedi Davidi: «N tie sangbanle ke a togidi nni leni i gbiami?» Lanwani, o den taagi o tieni yela ki solini Davidi,

⁴⁴ ki yedi o: «Pundi nne! N baa taa a gbanandi ki teni i kaabi leni ti fuayandi.»

⁴⁵ Davidi den yedi Filisiti yua: «A togidi nni leni ki jugisiega, li kpaanli leni u ŋalikuomu. Ama mini wani, n togidi a leni Li Miali Diedo, U Paaciamu Kuli Daano yaa yeli nni yo, wani U Tienu, yua n die Isidayeli yaaba toagoli ŋan sugi yaali.

⁴⁶ Dinla o Diedo baa paadi a ki tieni a n nuu nni. N baa pua ki guli a ki jia a yuli. Dinla n baa taa Filisiti yaaba toagoli nitinkpila ki teni i kaabi leni ti fuayandi. Lani, ŋanduna kuli baa bandi ke U Tienu ye leni Isidayeli yaaba.

⁴⁷ Yaa niligu n ye ne kuli mo baa bandi ke wani o Diedo ki koani leni ki jugisiega leni li kpaanli ka, ki gaani o niba. O Diedo n tie bu toabu daano. Wani n baa taa yi ki tieni ti nuu nni.»

⁴⁸ Filisiti yua yeni n den cili ki cuoni ki togidi Davidi yaa yogunu, Davidi den sani ki baa tuogi o.

⁴⁹ O den tuuni o boagili nni ki ñani li tanli ki lugidi leni o tanbuncaangu, ki pua Goliati yutunli ke li tanli feli o yutunli nni. O den baa ki labini.

⁵⁰ Li den tie yeni ke Davidi den paadi Filisiti yua leni ku tanbuncaangu leni li tanli. O den pua Goliati ki kpa o ki naa kubi jugisiega.

⁵¹ Davidi den sani ki pundi Goliati kani, ki sedi ki yagini o po ki cuo ki dadi ki noadi wani Goliati jugisiega ki jia o yuli. Filisiti yaaba n den laa ke bi jakoando kpe, bi den digi.

⁵² Lanwani, Isidayeli leni Juda toatieba den fii ki yiedi ki ŋoadi ki deli Filisiti yaaba ki pundi hali Gati dogu leni Ekiron yaa buliñoana kani. Filisiti yaaba, yaaba n den poagili den baa ki kpe u sanu nni ki cili Salayim dogu, ki pundi hali Gati leni Ekiron.

⁵³ Li yaa puoli, Isidayeli yaaba den cedi Filisiti yaaba ki lebidi ki kua bi toanagili nni ki fagi.

⁵⁴ Davidi den taa Goliati yuli ki kpeninni li Jerusalemi, ki taa o toatiadi mo ki kuani wani Davidi gbandieli nni.

⁵⁵ Sayuli n den laa Davidi ke o caa ki baa tuogi leni Goliati, o den yedi o guudikaaba yudaano Abineri: «Abineri, o jawaalo ne tie ŋme yaa bijua yo?» Abineri den guani ki yedi: «N daano, hali U Tienu po, mii bani.»

⁵⁶ Lanwani, o bado den yedi: «Ŋan buali ki bandi o jawaalo ne n tie yua yaa bijua.»

⁵⁷ Davidi n den kpa Goliati ki guani ki cua yaa yogunu, Abineri den cuani o Sayuli kani ke o kubi Goliati yuli.

⁵⁸ Sayuli den yedi o: «O jawaalo, a tie ŋme yaa bijua yo?» Davidi den guani ki yedi o: «N tie a naacemo Betelemi yua Isayi bijua yo.»