1 Samueli 16 - U TIENU MAAMA TILI 2013

U Tienu gandi Davidi ki luni Sayuli 16—30 U Tienu gandi Davidi ke o tua bado

¹ O Diedo den yedi Samueli: «A baa yaa yagini a yama Sayuli po ki pundi u laa yogunu? N yie o, o kan go yaa tie Isidayeli bado. Lani, ŋan gbieni a yinli mi kpama ki fii. N baa soani a Betelemi yua Isayi kani, kelima n laa o bila siiga yua n dagidi n po, ke n baa dini o li bali.»

² Samueli den yedi: «N baa tieni lede ki gedi? Kelima Sayuli yaa gbadi, o baa kpa nni.» O Diedo den yedi o: «A yaa caa ŋan taa o naasalo ki dadi o ki ban yedi: ‹N cua ki baa padi li padili o Diedo po.›

³ Ŋan yini Isayi wan cua u padikaanu kani. N baa waani a ŋan baa tieni yaala. Min baa waani a yua, ŋan wuli o yuli po li bali kpama ki gagidi o n po wan tua bado.»

⁴ Samueli den tieni o Diedo n den yedi o yaala, ki gedi Betelemi. U dogu nikpela den cua o kani leni i jeje ki yedi o: «A cua laafia?»

⁵ O den guani ki yedi ba: «Laafia lige. N cua ki bua ki padi li padili o Diedo po yo. Yin gagidi ki ŋanbi mani yi baa, ki yegi leni nni u padikaanu kani.» O den waani Isayi leni o bijaba mo n gagidi ki ŋanbi bi baa, ki cua u padikaanu kani.

⁶ Ban den pundi ke Samueli laa Eliabi, o den yedi o yama nni: «Laa pia kuli tama, o Diedo n gandi yua n se o nintuali ne.»

⁷ Ama o Diedo den yedi Samueli: «Ŋan da diidi o bugima leni wan foagi maama. Mii gandi wani ka. Mini U Tienu, mii nua ki biigidi nani o nisaalo n nua ki biigidi maama ka. O nisaalo nua i nuni n laa yaale, ama mini o Diedo nua li pali nne.»

⁸ Lane Isayi den yini o bijua Abinadabi ki teni ke o pendi Samueli nintuali. Samueli den yedi: «O Diedo naa gandi one moko.»

⁹ Lanwani, Isayi den teni ke Sama pendi. Samueli den yedi: «O Diedo naa didi gandi one moko.»

¹⁰ Isayi den teni ke o bijaba siiga bonbilele pendi Samueli nintuali. Samueli den yedi Isayi: «O Diedo naa gandi bi niinni oba kuli.»

¹¹ Lanwani, Samueli den yedi Isayi: «A bijaba kuli n yeni bi?» O den guani ki yedi: «N bijuogu n sieni. Ama o kpaa ti yandi.» Samueli den yedi Isayi: «Soani ban ban yini o, kelima ti kan kali ki je ke waa cua.»

¹² Isayi den soani ke bi ban yini o. O den moani, ke o nuni ŋani, ke o nunyiega mo ŋani. O Diedo den yedi Samueli: «Fii ki wuli li bali kpama o yuli po, ki gagidi o wan tua bado, kelima wani n yeni.»

¹³ Lanwani, Samueli den taa li yinli leni li bali kpama ki wuli o yuli po ki gagidi o o kpeliba siiga. O Diedo Fuoma den kua o niinni ki diedi o, ki cili landaali ki yaa caa! Li yaa puoli, Samueli den fii ki kuni Rama.

Davidi kua Sayuli diegu nni

¹⁴ O Diedo Fuoma den ŋaa Sayuli. O Diedo den teni ke ki cicibiadiga kua o niinni ki yagini o yama.

¹⁵ Sayuli badibaanba den yedi o: «Diidi U Tienu soani ki cicibiadiga ke ki yagini a yama.

¹⁶ Lanwani, ti daano, ŋan puogi tinba a naacenba, yaaba n ye a nintuali na, tin lingi yua n bani li gogidipuali, ke ki cicibiadiga yeni yaa fii a po, wan pua a po ku gogidigu lan mangi a po.»

¹⁷ Sayuli den guani ki yedi o naacenba: «Yin lingi mani n po yua n bani li gogidipuali bonŋanla ki cuani o n po ne.»

¹⁸ Bi siiga nni yendo den yedi: «Diidi ki le, n den laa Betelemi yua Isayi bijua ke o bani li gogidipuali, ki go pia u paalu leni li papaali ki tie jakoando, ki bani mi maama, ki pia mi jawaama. O Diedo moko ye leni o.»

¹⁹ Lani, Sayuli den soani a tonda Isayi kani ki yedi o: «Soani n po a bijua Davidi, yua n kpaa a yandi yeni ne.»

²⁰ Isayi den taa o ŋunbo ki tuni o dupen, ki taa ku dayuagu ke ku gbie duven, ki go taa ki ŋuabiga ki teni o biga Davidi wan ban teni li kuli Sayuli.

²¹ Davidi n den pundi Sayuli kani, o den tuuni o po. Sayuli pali den mangi o po boncianla, ke o gandi o wan yaa tugi o po o toatiadi.

²² Sayuli den soani Isayi kani ki yedi o: «Ŋan cedi Davidi n yaa ye n kani ki tuuni n po, kelima n pali mani o po.»

²³ U Tienu n den soani yaa cicibiadiga yeni yaa den cua ki ŋua Sayuli, Davidi yen taa ku gogidigu ki pua. Lani, Sayuli yama yen duani lan yaa tu o po. Ki cicibiadiga mo yen ŋaa o.