1 Samueli 15 - U TIENU MAAMA TILI 2013

Sayuli tuogi bu toabu leni Amaleki yaaba

¹ Samueli den yedi Sayuli: «O Diedo den soani mine ke n wuli a yuli po li bali kpama ke a tua o niba Isidayeli yaaba bado. Lanwani, ŋan cengi o Diedo n yedi yaala.

² Li Miali Diedo, U Paaciamu Kuli Daano yedi ke daa: ‹N tiadi Amaleki yaaba n den tieni Isidayeli yaaba yaala: bi den pigini bi sanu ban den ñani Ejipiti nni yaa yogunu.

³ Lanwani, ŋan gedi moala, ki ban baa Amaleki yaaba bu toabu ki bolini ba ki go bolini bi bonpiakaala kuli cain. Ŋan da gbadi bi po ninñima, ŋan kpa ba, bi jaba leni bi puoba, a bila leni a biŋaanda, i ne leni i pe, ti yuoyuodi leni i ŋunbi kuli.› »

⁴ Lani, Sayuli den soani ke bi yini bi toatieba ke o coadi ba Telem dogu nni. A taacenda den pundi tuda kobilie (200 000), Juda yaaba den pundi tuda piiga (10 000).

⁵ Lanwani, Sayuli den fii leni o toatieba kuli ki gedi Amaleki yaaba dociamu po, ki wuoni ku joaloangu nni ki guudi.

⁶ Ama o den yedi Kena yaaba: «Yin fii mani ki ña Amaleki yaaba siiga ke min da ti taani ki bolini yi leni ba, kelima yi den ŋanbi Isidayeli yaaba kuli po ban den ñani Ejipiti nni yaa yogunu.» Lani, Kena yaaba den ñani Amaleki yaaba siiga.

⁷ Sayuli den paadi Amaleki yaaba, ki cili Afila dogu ki pundi hali Suri dogu yuu n tiegi leni Ejipiti.

⁸ O den cuo Amaleki yaaba bado Agagi ke o fo, ki bolini Amaleki niba kuli cain leni mu jugisiemu.

⁹ Ama Sayuli leni o toatieba ki den kpa Agagi. Bi den cedi i peŋami, i naaŋami, ti yanŋandi, i pewubidi leni yaala n ŋani kuli, ke li fo. Baa den bua ki bolini yaala n ŋani. Die yaala n gundi leni yaala n tadi kuli, bi den bolini la cain.

U Tienu ŋaa Sayuli

¹⁰ O Diedo den maadi leni Samueli ki yedi o:

¹¹ «N pali biidi leni min dini Sayuli li bali, kelima o buli nni o nunga, kaa tiendi min yedi o yaala kuli.» Samueli pali den biidi. Laa ñiagu kuli, o den mua ki miadi o Diedo.

¹² Ku tiŋaapanpangu, o den gedi ke o baa n le Sayuli. Bi den waani o ke Sayuli den gedi Karimeli dogu ki dogini a tana ke lan yaa tie o po bontiadikaala, ki lebidi ki guani Giligali.

¹³ Lanwani, Samueli den ŋoadi Sayuli. Sayuli den yedi o: «O Diedo n seligi a, n tieni o Diedo n yedi nni yaala.»

¹⁴ Samueli den yedi: «Min gba i pe leni i ne bubula ya yeni nan ña le yo?»

¹⁵ Sayuli den guani ki yedi o: «Bi ñani ba Amaleki yaaba kani ki cuani, kelima bi toatieba cedi i peŋami leni i naaŋami ki bua ki padi ba o Diedo a Tienu po. Yaala n sieni wani kuli, ti bolini la.»

¹⁶ Samueli den yedi Sayuli: «Suo yeni ke n baa togidi a o Diedo n den yedi nni yaala ku ñiagu.» Sayuli den yedi o: «Maadi!»

¹⁷ Samueli den yedi: «Ŋan den nua a yuli ke a tie biga yaa yogunu, ŋaa den tua Isidayeli buolu yudaano te? O Diedo ki den gagidi a ki dini a li bali ke a tua Isidayeli bado te?

¹⁸ O Diedo den soani a ke ŋan gedi ki bolini bi nibiadiba, bani Amaleki yaaba, ke ŋan tuogi leni ba bu toabu hali ki bolini bikuli cain.

¹⁹ Be yaa po ke ŋaa tuo o Diedo yedima? Be yaa po ke a boagili ti fagidi ki tudi o Diedo po?»

²⁰ Sayuli den guani ki yedi Samueli: «N tuo o Diedo yedima, ki tagini ki gedi wan den soani nni yaa tondu. N bolini Amaleki yaaba kuli, ki cuani bi bado Agagi.

²¹ Ama bi toatieba den taa ti fagidi siiga i pe leni i ne, yaaba n ŋani ki cie yaala n baa bodi yeni siiga, ki bua ki padi o Diedo a Tienu po Giligali dogu nni.»

²² Samueli den yedi: «Naani ki tuo ki tieni o Diedo n bua yaala, Ki cie a padijuukaana leni a pada? Mi tuoma pia mayuli ki cie a pada, O ñoamabonli tienma pia mayuli ki cie a petona kpama.

²³ Mi yiema bia nani u bayuadiidu yeni, U tupaalu mo bia nani i buli ŋoadima yeni. Nani ŋan yie o Diedo yedima yeni, omoko yie ŋa. A kan go yaa tie o niba bado.»

²⁴ Lanwani, Sayuli den yedi Samueli: «N tudi, kelima n miidi U Tienu ñoamabonli ki yie amo yaa maama. N den jie bi toatiebe ki tieni ban n yedi yaala.

²⁵ Ama moala n mia ŋa, ŋan tieni n po sugili n tuonbiadi po ki guani ki yegi leni nni min ban gbaani ki kpiagi o Diedo.»

²⁶ Samueli den yedi Sayuli: «N kan lebidi ki yegi leni a, kelima a yie o Diedo yedima. O Diedo mo yie ŋa ke a kan go yaa tie Isidayeli bado.»

²⁷ Samueli n den lebidi ki baa gedi yaa yogunu, Sayuli den cuo o kpalibu tiipo ke bu cie.

²⁸ Lani, Samueli den yedi o: «Dinla o Diedo moko dadi ki cie Isidayeli diema bali a kani, ki baa teni li nitoa yua n ŋani ki cie ŋa.

²⁹ U Tienu yua n tie Isidayeli kpiagidi, kan pua faama, o kan lebidi o yama, kelima waa tie nisaalo ka ki baa lebidi o yama.»

³⁰ Sayuli go den yedi: «N tudi, ama ŋan miini nni n niba nikpela nintuali leni Isidayeli yaaba kuli nintuali. Lebidi ki yegi leni nni min ban gbaani o Diedo a Tienu nintuali ki kpiagi o.»

³¹ Lanwani, Samueli den lebidi ki yegi leni Sayuli ke o den gbaani o Diedo nintuali ki kpiagi o.

³² Samueli den yedi: «Cuani mani Amaleki bado Agagi ne.» Agagi den kpendi o kani leni li pamanli ki tia o yama nni: «Moala wani, kuuma ki go ye n po.»

³³ Samueli den yedi: «Nani a jugisiega n den kpa pomaditoaba bila ke baa go pia bila maama, a yaa naa moko kan go yaa pia biga yene.» Lane Samueli den pedi ki kpa Agagi o Diedo nintuali Giligali dogu nni.

³⁴ Li yaa puoli, Samueli den fii ki gedi Rama, Sayuli mo den kuni o denpo yaa dogu n yi Sayuli Gibeya po.

³⁵ Hali Samueli n ban kpe, waa go gedi ki ban laa Sayuli. O yen mua Sayuli po kelima o Diedo den mua ke o yàá bi dini Sayuli li bali ke o tua Isidayeli bado.