1 Samueli 13 - U TIENU MAAMA TILI 2013

Isidayeli yaaba taani ki baa tieni bu toabu

¹ Sayuli den pia bina... Wan den dini li bali yaa yogunu. O den peli ki diedi Isidayeli yaaba ke li pundi binalie.

² Sayuli den gandi Isidayeli yaaba siiga jaba tudataa (3 000). Jaba tudalie (2 000) den ye leni o Mikimasi dogu nni, Beteli juana nni. Tudili mo den ye leni Jonatan Gibeya dogu nni, Benjamen diema nni. Sayuli den cabi yaa toatieba n sieni ke yuakuli kuni o gbandieli po.

³ Filisiti yaaba den gbadi ke Jonatan paadi bi toagoli yaali n den ye Geba. Lane Sayuli den teni ke bi piebi kakacinba mi diema nni kuli ki waani Hebilu yaaba yaala n tieni.

⁴ Isidayeli yaaba den gbadi ke Sayuli paadi Filisiti yaaba toagoli. Lani n den cuani la ke bani Filisiti yaaba pala fiidi Isidayeli yaaba po. Lani yaa po, bi den yini bi toatieba kuli ki taani Sayuli kani Giligali dogu nni.

⁵ Filisiti yaaba den taani ki baa tuogi leni Isidayeli yaaba. Bi den pia toateliti tuda piitaa (30 000) leni tandanba tudaluoba (6 000). A taacenda den yabi nani yaa tanbiima n ye mi ñincianma jaali po yeni. Bi den cua ki kpaa bi toanagili Mikimasi Beti-Afeni dogu puoli.

⁶ Isidayeli yaaba n den laa ke Filisiti yaaba mabini ba ke folu ki ye, bi den wuoni ti joaloandi nni, ti tuudi nni, ti tanlondi nni, ti faliti nni leni ti luakuondi nni.

⁷ Bi tianba mo den sani ki duodi Jurden ki gedi Gadi leni Galaadi diema nni. Sayuli da den baa ki ye Giligali. Yaa toatieba n den ye leni o kuli den jie hali ki digibi.

Sayuli tudi ke U Tienu ŋaa o

⁸ Sayuli den guudi danalele, Samueli n den bili yaa bianu. Ama Samueli naa den cua Giligali. Lane, bi toatieba siiga bi tianba den yadi yadi ki foagidi leni Sayuli.

⁹ Lanwani Sayuli den yedi: «Taa mani li padijuukaali leni i tuondi pada yandi ki cuani mani ne.» Bi den cuani ke o padi li padijuukaali.

¹⁰ Wan li padi ki gbeni yaa yogunu, Samueli den nagini ki pundi ke Sayuli ñani ki tuogi o ki biali o.

¹¹ Samueli den buali o: «A tieni be mo nne?» Sayuli den guani o: «Min laa ke bi toatieba yadi ki foagidi leni nni, ke a mo naa cua ŋan den bili yaa daali, ke Filisiti yaaba mo taani Mikimasi,

¹² n bungi n yama nni ki yedi: ‹Filisiti yaaba baa jiidi ki baa ti Giligali ne moala moala. Li sua ke nmo daa mia o Diedo ŋanbili. Lani yaa po yo ke n paagi n pali ki padi li padijuukaali.› »

¹³ Samueli den yedi Sayuli: «A soani yanluotuonli, kelima ŋaa kubi o Diedo a Tienu n den teni a yaa ñoamabonli. O Diedo bi baa teni a bali n yaa ye Isidayeli yaaba po hali yaa yogunu kuli.

¹⁴ Ama moala a bali kan waagi. O Diedo gandi o baa o pali n bua yua, ki bili ke laa joa n baa tua o niba yudaano kelima ŋaa kubi wani o Diedo n bili a po yaala.»

Bu toabu boginma

¹⁵ Lanwani, Samueli den fii Giligali ki gedi yaa dogu n ye Benjamen diema nni ki yi Gibeya. Sayuli den coadi yaa niba n ye leni o. Bi den pundi nani jaba kobiluoba.

¹⁶ Sayuli leni o bijua Jonatan leni yaa toatieba n den ye leni ba den kali Geba dogu nni, yuu n ye Benjamen diema nni. Filisiti yaaba mo den kpaa bi toanagili Mikimasi dogu nni.

¹⁷ Yaa toatieba n fenli den ñani Filisiti yaaba toanagili nni ki boagidi cagataa. Cagiyenli den tagini yaa dogu n ye Ofiri sanu nni, ki cuubi Suali diema.

¹⁸ Li naa cagili mo den tagini Beti-Horoni dogu yaa sanu, li cagitaali mo den tagini yaa sanu n ŋua Isidayeli diema tinbianu a juana yula po, i naamuuni joaloangu nni ki goa mi fanpienma po.

¹⁹ Li den sua ke ba maayendo ki ye Isidayeli diema nni, kelima Filisiti yaaba den yedi: «Tin da tuo Hebilu yaaba n maa mu jugisiemu bi a kpaana.»

²⁰ Lanwani Isidayeli yaaba siiga, yaa joa n den pia naakuuli, yali, ceceli bi moaciegu kuli ki bua ki toadi, o yen gedi Filisiti yaaba po yo.

²¹ A naakuuna leni a yala toadima dunga den tie kujapienyenli boagidimitaa siiga, boagidimilie. A cecela mo yaa toadima leni ban deli i naakpakpaadi leni yaa fibi kpakpaana naadima mo den tie kujapienyenli boagidimitaa siiga boagidiyenma.

²² Li tie lani yaa po ke bu toabu daali yaa toatieba n den ye leni Sayuli leni Jonatan, oba kuli ki den pia jugisiega bi kpaanli. Sayuli leni o bijua Jonatan bebe n den pia.

²³ Filisiti yaaba toagola siiga toagoyenli den cua ki kpaa bi toanagili Mikimasi juali mabidima kani.