1 Samueli 12 - U TIENU MAAMA TILI 2013

Samueli soani o tuonli leni mi teginma

¹ Samueli den yedi Isidayeli yaaba kuli: «Diidi mani, n den tuo yin yedi nni yaala kuli ki dini yi po o bado.

² Moala diidi mani, o bado yua n baa yaa gobidi yi nno. Mini wani ji kpeligi ke n yudi mo pendi, n bijaba mo fandi nani yinba. N den gobidi yi hali n panma yogunu ki pundi hali dinla.

³ To, mini nna. Yin doagidi mani ki waani o Diedo leni wan gandi yaa bado nintuali min tieni yaa tagili. N fie ŋme yaa naatonle? N fie ŋme yaa ŋunbo yo? N boandi ŋme? N mabini ŋme? N gaa ŋme yaa kane li suuli ki pii n nuni ke min da le o tagili? Waani nni mani, n baa guani yi la.»

⁴ Bi den guani ki yedi: «Ŋaa boandi ti, ŋaa mabini ti, ŋaa gaa oba kuli nuu nni liba mo.»

⁵ Samueli go den yedi ba: «O Diedo leni wan dini yua li bali tie siedinba ke yii laa n kani tagiliba kuli.» Bi den guani ki yedi: «Bi tie siedinba li kuli po.»

U Tienu ŋanbidi yaaba n fangi o po

⁶ Lanwani, Samueli den yedi bi niba kuli: «O Diedo tie n siedo, wani yua n den puogi Musa leni Alono ke bi ñani yi yaajanba Ejipiti nni.

⁷ Lanwani, moala yin nagini mani o Diedo nintuali min bu leni yi. N baa tiadi yi wan tieni yinba leni yi yaajanba kuli po yaa ŋanbili.

⁸ Jakob leni o niba n den kua Ejipiti nni ke bi den ti faligi ba, bi den mua ki mia o Diedo. O den soani Musa leni Alono ke bi ñani bani yi yaajanba Ejipiti nni ki cuani ba nekanba.

⁹ Ama bi den yuandi ki sundi o Diedo bi Tienu po. Lanwani, o den teni ke Hatisori dogu toagoli yudaano Sisera, Filisiti yaaba leni Moabi bado tuogi leni ba bu toabu ki paadi ba.

¹⁰ Lanwani, bi didi den mua ki mia o Diedo ki yedi: ‹Ti tieni ti tuonbiadi kelima ti ŋaa fini Li Miali Diedo, ki ŋoadi i buli Baali leni Asitate. Moala ŋan go gaa ti ti yibalinba nuu nni, lani ti baa yaa ŋua ŋa.›

¹¹ Lanwani, o Diedo den soani Yerubaali, Bedani, Jefite leni Samueli, ki faabi yi yi yibalinba yaaba n den gaani ki lindi yi nuu nni. Lani, yi den ye mi diema nni leni mi yanduanma.

¹² Ama yin den laa ke Anmoni yaaba bado Nahasi tuogi leni yi bu toabu, yi den yedi nni: ‹Aa-a, ti bua ki baa o bado wan yaa die ti.› Yi den yedi yeni ba ke o Diedo yi Tienu den tie yi bado.

¹³ Moala, yi bado nne, yin den gandi yua. Yi den mia o bado ke o Diedo puni yi o.

¹⁴ Yi yaa fangi o Diedo ki ŋua o, yi yaa tuo wan yedi yaala ki naa yie o bali maama, yi yaa taabi o, yinba leni yi bado yua n die yi, li bonla kuli baa yaa cuoni yi po bonŋanla.

¹⁵ Ama yi yàá tuo ki ŋua o Diedo yedima, yi yaa yie o bali maama, wani o Diedo nuu baa mabini yi nani wan den mabini yi yaajanba maama yeni.

U Tienu doagidi Isidayeli yaaba tudima

¹⁶ Moala yin sedi mani ne ki le o Diedo n baa tieni yaa bancianma yi nintuali.

¹⁷ Tii ye ŋalikama ceyogunu ka? Ki taaga n ki go mi yaa yogunu. N baa jaandi ki mia o Diedo, o baa soani ki taaga leni i tatantani. Lani, yi baa bandi ke yi tudi boncianla o Diedo nintuali leni yin mia ban dini yi po o bado.»

¹⁸ Lanwani, Samueli den jaandi ki mia o Diedo ke o soani ki taaga leni i tatantani landaali. Bi niba kuli den jie o Diedo leni Samueli hali boncianla.

¹⁹ Bi niba kuli den yedi Samueli: «Mia o Diedo a Tienu tinba a naacenba po ke tin da kpe. Tin mia ban dini ti po o bado yeni, ti tieni ti tuonbiadi ki pugini tin tieni yaa tuonbiadi kuli po.»

²⁰ Samueli den yedi bi niba: «Da jie mani. Li tie moamoani ke yi tieni laa biadima kuli. Ama yin da ŋaa o Diedo. Yin yaa ŋua o leni yi pali kuli.

²¹ Yin da ŋuadi o puoli, kelima yi yaa ŋaa o, yi baa ŋoadi yaala n tie fanma fanma, lani yaala n kan todi yi, ki kan faabi yi mo kelima li tie fanma.

²² O Diedo yeli n pia yaa kpiagiciandi po, o kan ŋaa yi, kelima o den jagi o yama nni ke yi baa tua o yaaba.

²³ Mini mo, o Diedo n luoni n po min tieni ti naa yaa tuonbiadi: lani n tie ki cedi ki kan yaa jaandi ki miadi o yi po. N baa yaa bangi yi yaa sanu n ŋani ki go tiegi.

²⁴ Bonyenla bebe n ye, lani n tie yin fangi o Diedo ki yaa ŋua o moamoani nni leni yi pali kuli. Yin go yaa tiani wan den tieni yi po yaa bancianma po.

²⁵ Ama yi yaa tiendi mi biadima, yinba leni yi bado kuli baa bodi.»