1 Samueli 11 - U TIENU MAAMA TILI 2013

Sayuli paadi Anmoni yaaba

¹ Anmoni yaaba bado Nahasi den cua Isidayeli dogu Yabesi yuu n ye Galaadi nni, ki kpaa bi toanagili ki lindi u ki bua ki cuo u. Yabesi yaaba kuli den yedi Nahasi: «Cedi ti, ti baa tuo ki yaa tuuni a po.»

² Lanwani, Anmoni yua Nahasi den guani ki yedi ba: «N baa tuo ki cedi yi, ama se min fiadi yi jiennuni, ki teni Isidayeli yaaba kuli n le i fe.»

³ Yabesi nikpela den yedi o: «Pa ti danalele tin soani a tonda Isidayeli diema nni kuli. Li yaa puoli, oba kuli yàá cua ki baa todi ti, ti baa tuo ŋan diedi ti.»

⁴ A tonda den gedi ki ban pundi Sayuli dogu Gibeya, ki togidi laa maama bi niba kuli kani, ke bi niba kuli den buudi boncianla.

⁵ Li sua ke Sayuli da ñani u kuanu ki ŋua o ne puoli. O den yedi: «Be n pia bi niba ke bi buudi?» Bi den togidi o Yabesi yaaba n yedi yaala.

⁶ Sayuli n den gbadi laa bonla, U Tienu Fuoma den diedi o ke o pali fii boncianla.

⁷ O den taa naakpakpaadilie ki jia ba bonjena jena ki teni a tonda ke bi gedini Isidayeli diema nni kuli, ki yedi: «Yua n kaa ŋoadi Sayuli leni Samueli puoli, bi baa tieni o nani ban tieni i naa ne maama.» O Diedo den teni ke ti jawaanciandi cuo bi niba, ke bikuli den taani ki fii bu toabu po nani niyendo yeni.

⁸ Sayuli den coadi ba Beseki dogu nni. Isidayeli yaaba den pundi tuda kobitaa (300 000), Juda yaaba mo tuda piitaa (30 000).

⁹ Bi den yedi yaa tonda n den cuani u tondu yeni: «Yin ban waani Galaadi dogu Yabesi yaaba ke saala u yensiicocolu, bi baa baa mi faabima.» A tonda n den gedini laa laabaalo, Yabesi yaaba pala den mangi.

¹⁰ Yabesi yaaba den yedi Anmoni yaaba: «Saala ti baa ña ki cua yi po yin tieni ti yin bua maama.»

¹¹ Li dalieli Sayuli den boagidi o toatieba cagataa. Lan den nagidi mi faama, bi den kua Anmoni yaaba toanagili nni ki kpaani ba hali ki pundi u yensiicocolu. Yaaba n den sani ki cia den yadi yadi hali ke oba kuli ki go den yegi leni o lielo.

¹² Isidayeli yaaba den yedi Samueli: «Ŋmenba n den yedi ke Sayuli kan diedi ti yeni? Ban teni ti laa niba tin kpa ba.»

¹³ Sayuli den yedi: «Bi kan ñani oba kuli miali yaa daali n tie ne, kelima dinla o Diedo cuani mi faabima Isidayeli yaaba po.»

¹⁴ Samueli den yedi bi toatieba: «Cua mani tin gedi Giligali ki doagidi ki waani cain ke Sayuli n tie yudaano.»

¹⁵ Bi niba kuli den gedi Giligali ki ban dini Sayuli li bali o Diedo nintuali. Giligali yeni, bi den padi i tuondi pada o Diedo nintuali. Sayuli leni Isidayeli jaba kuli den mangi bi pala hali boncianla likani.