1 Samueli 10 - U TIENU MAAMA TILI 2013

Sayuli tua Isidayeli diema bado

¹ Samueli den taa yaa tiagu n pia mi kpama ki wuli Sayuli yuli po. O den gobini o ki yedi: «O Diedo gagidi ki dini a li bali ŋan tua o niba yudaano.

² A yaa ñani ne ki kuni ki ban pundi Selisa dogu yuu n ye Benjamen tinga bianu, a baa le jabilie Raseli takuli kani. Bi baa yedi a: ‹Ŋan den fii ki gedi ki baa n lingi yaa ŋunbi yeni, bi laa ba. A baa naa go yagini o yama i ŋunbi wani yaa po. O yama ji yagini yi yaa po yo, ke o buali o yuli wan baa tieni maama ki le o bijua.›

³ A yaa ñani lankani ki suagi liiga ki ban pundi Tabori ticianbu, a baa tuogi leni jabitaa ke bi caa Beteli U Tienu diegu po. Bi siiga yendo baa yaa kubi ŋuabila taa, o lielo dupen bonbitaa, o taalo mo duven dayuagu.

⁴ Bi baa fuondi a ki pa ŋa dupen ŋan gaa.

⁵ Li yaa puoli, a baa pundi Gibeya-Eloyim, Filisiti yaaba toanagili n ye naani. A yaa kua laa dogu nni, a baa tuogi bi saawalipuaba goli ke bi ñani ban padi a pada yaa juali po. Yaaba n pua ti gogiditi leni a gangaana, ti gogidiciandi leni yaaba n piebi mu yelimu baa yaa ye bi liiga. Bani U Tienu saawalipuaba yeni baa yaa pua saawali.

⁶ Wani o Diedo Fuoma baa kua a niinni ki diedi a, ŋan taani leni ba ki yaa pua saawali. O baa lebidi a ŋan tua nitoa.

⁷ Laa sinankeeninba kuli yaa tieni ki gbeni, ŋan tieni ŋan sua ke li pundi ŋan tieni yaala, kelima U Tienu ye leni a.

⁸ Li yaa puoli, ŋan kua n liiga ki gedi Giligali. N baa yuandi ki ŋoadi a lipo ki padi a padijuukaana leni i tuondi yaa pada U Tienu po. Ŋan guudi nni danalele hali min baa cua ki waani a ŋan baa tieni yaala.»

⁹ Sayuli leni Samueli n cabi biyaba yaa yogunu, ke o jigidi ki taa o sanu, U Tienu den puni o yantiatoali. Laa sinankeeninba kuli den tieni landaali.

¹⁰ Sayuli leni o naacemo n den pundi Gibeya yaa yogunu, bi saawalipuaba goli den tuogi ba. U Tienu Fuoma den kua o niinni ke omoko pua saawali leni ba.

¹¹ Yaaba n den kpa bani o kuli n laa ke o taani leni bi saawalipuaba ki pua saawali, bi den yedi biyaba: «Be n tieni Kisi bijua? Naani wani Sayuli moko tie bi saawalipuaba siiga yua yo?»

¹² Gibeya yaaba siiga yendo den guani ki yedi: «Ŋme tie bi baa?» Li tie lani yaa po ke bi pua mi kpanjama ki yieni: «Sayuli moko tie bi saawalipuaba siiga yua yo?»

¹³ Sayuli n den pua saawali ki gbeni, o den gedi ban padi naani li juali po.

¹⁴ Sayuli baa naataanjaga den yedi Sayuli leni o naacemo: «Yi den gedi le?» Sayuli den guani ki yedi: «Ti den gedi ki baa n lingi i ŋunbi, ki naa laa ba, lanwani ti den gedi Samueli po.»

¹⁵ Sayuli baa naataanjaga den guani ki yedi: «Togidi nni Samueli n den yedi yi yaala.»

¹⁶ Sayuli den guani ki yedi o: «O den waani ti ke bi laa i ŋunbi.» Ama Sayuli ki den waani o Samueli n yedi o yaala li bali po.

Bi toani tiatia ke o cuo Sayuli wan tua o bado

¹⁷ Samueli den yini Isidayeli yaaba ke bi taani Misipa o Diedo nintuali.

¹⁸ O den yedi Isidayeli yaaba: «O Diedo, Isidayeli Tienu yedi: ‹N den ñani yinba Isidayeli yaaba Ejipiti diema nni. N den faabi yi Ejipiti yaaba leni yaa nibuoli n den faligidi yi kuli yaa nuu nni.

¹⁹ Dinla yi yie ki ŋaa mini yi Tienu, yua n faabi yi leni yi fala leni yi yepaama kuli, ki yedi nni: Dini ti po o bado. Lanwani, yin nagini mani o Diedo nintuali ki sedi ki caligi caligi, buolu buolu leni diegu diegu.› »

²⁰ Samueli den teni ke Isidayeli buoli kuli nagini ke U Tienu den gandi Benjamen yaa buolu.

²¹ O den teni ke Benjamen buolu nagini, yuakuli leni o niba, ke U Tienu gandi Matili yaa diegu. Laa diegu yaaba den nagini ke U Tienu gandi Kisi bijua Sayuli. Bi den lingi o ki naa laa o.

²² Bi go den buali o Diedo ki yedi: «O nilo yeni cua ti siiga bi?» O Diedo den guani ki yedi: «Diidi, o wuo ti tiadi nni.»

²³ Bi den sani ki ban ñani o ti tiadi nni ki cuani o ke o sedi bi niba siiga. O den caadi bikuli li yuli.

²⁴ Samueli den yedi bi niba kuli: «Yi nua o Diedo n gandi yua? Yinba Isidayeli yaaba kuli siiga yua naani leni o kuli ki ye.» Bi niba kuli den pua ti nipodi ki yedi: «U Tienu n pa o bado li miafoagili.»

²⁵ Lanwani, Samueli den waani bi niba kuli o bado n baa yaa die leni yaa bali. O den diani la li tili nni ki bili o Diedo nintuali. Li yaa puoli, o den cabi bi niba kuli ke yuakuli kuni o denpo.

²⁶ Sayuli den kuni o denpo Gibeya. U Tienu n den maadi leni yaaba yaa pala, bi tianba den yegi leni o.

²⁷ Ama ti niyuogidi den yedi: «Joo! One n baa faabi ti?» Bi den fali o kaa cuani o po paabu. Ama Sayuli ki den yedi puu kuli.