1 Samueli 1 - U TIENU MAAMA TILI 2013

Samueli tua Isidayeli yaaba gobidika 1—7 Elikana pua Anna maama fuuli

¹ O joa den ye ki tie Ramatayim-Tisofim yua. Laa dogu den ye Efrayimi juana nni. O joa yeni den yi Elikana ki tie Efrayimi buolu yua. O den tie Yerohami bijua, Yerohami mo den tie Elihu bijua. Elihu mo den tie Tohu bijua, Tohu mo n yaa tie Tisufi bijua.

² Elikana yeni den pia puobilie. O yendo den yi Anna, o lielo mo Penina. Penina den pia a bila, ama Anna wani ki den pia biga.

³ Binli kuli, Elikana yen fii o dogu nni ki gedi Silo ki ban kpiagi Li Miali Diedo, U Paaciamu Kuli Daano, ki padi o po a pada. Eli bijaliediba Ofini leni Finea den ye likani ki tie o Diedo kopadicianba.

⁴ Elikana yaa den padi o padili yaa daali kuli, o yen teni o pua Penina leni wan pia o po yaa bonjala leni yaa bonpola kuli bi biinu.

⁵ Ama o yen teni Anna wani biyaba n gaa maama taalimilie, kelima o den bua o boncianla ba ke o Diedo den teni ke o tie ŋoaliga.

⁶ Anna puolielo Penina yen ñuadi o ke fiindi o pali, kelima o Diedo n teni ke o tie ŋoaliga yeni po.

⁷ Binli kuli Elikana yen caa ki padi yene. Ama Anna yaa den gedi o Diedo diegu po yaama kuli, Penina yen ñuadi o yene. Lanwani, binyenli, Anna den buudi ki yie ke o kan je.

⁸ O calo Elikana den buali o: «Anna, be yaa po ke a buudi, kaa go bua ki je mo? Be yaa po ke a pali biidi? Naani mii cie a po bonjala piiga?»

⁹ Ban den dini ki go ñuni Silo dogu nni, Anna den fii ki gedi o Diedo diegu buliñoabu kani. O kopadiciamo Eli den kaa li bonkalikaala po ki kuu o Diedo diegu buliñoakpianu daadi dayengu kani.

¹⁰ Anna paboanli nni, o den jaandi ki mia o Diedo ki buudi leni ti nunsiidi.

¹¹ O den niani li nianli ki yedi: «Li Miali Diedo U Paaciamu Kuli Daano, a yaa tuo ki diidi mini a yonbo fala, ki tiadi kaa sundi mini a yonbo po, ki puni mini a yonbo bonjaga, n baa guani ki pa o fini o Diedo hali o miali dana nni kuli. Pengu kan maani o yuli po.»

¹² Wan den waagi ki jaandi o Diedo nintuali, Eli den diidi o ñoabu.

¹³ O den sua ke Anna ñoacuuna yegibi, ama waa den gba o nialu kelima o den jaandi o pali nne. Lani yaa po, Eli den tama ke o ñuni ki gaadi.

¹⁴ Lane ke o yedi o: «A daama baa kagidi a po beyogunu yo? Gedi ki ban kagidi a daama kaanto!»

¹⁵ Anna den guani ki yedi: «Aa-a, n yonbidaano, mii ñuni ka. N tie ti yanyagidi n kubi yaa pua. N cua ki doagidi ki waani o Diedo n payianu yo.

¹⁶ Ŋan da nuali mini a bisalo nani ku niyuogu yeni ka. Li tie n yanyagikandikaadi leni n paboankandikaali po yo, ke n baa ki maadi hali moala.»

¹⁷ Eli den guani ki yedi o: «Fii ki yaa kuni leni mi yanduanma. Isidayeli Tienu n pa ŋa ŋan mia o yaala.»

¹⁸ Anna den yedi: «Ŋanbi mini a bisalo po.» Li yaa puoli, o den fii ki ñani likani ki ban dini. O nunga den guani ki mangi.

¹⁹ Elikana leni o pua Anna den yagidi ki gedi o Diedo diegu po ki gbaani ki kpiagi o, ki lebidi ki guani ki kuni bi denpo Rama. Elikana den taani leni o pua Anna ke o Diedo tiadi o po, ki nuali ki laa o po.

Samueli madi

²⁰ Laa binli Anna den punbi ki mali bonjaga. O den yini o Samueli kelima o den yedi: «N mia o o Diedo.»

²¹ Li yaa puoli, o calo Elikana den guani ki gedi Silo, wani leni o diegu yaaba kuli ki ban padi o Diedo po binli kuli padili, ki go kuani o nianli.

²² Ama Anna wani ki den gedi. O den yedi o calo: «N yaa babidi ki biga, n baa gedini o wan ban sedi o Diedo nintuali, ki ji yaa ye lankani hali yaa yogunu kuli.»

²³ O calo Elikana den yedi o: «Tieni nani ŋan bua maama, guudi ne hali a yaa babidi o. O Diedo n kuani o ñoamabonli be.» Lanwani, Anna den sedi deni ki ŋaandi o biga hali wan ban babidi o.

²⁴ Wan den babidi o, o den taa o ke bi gedi Silo. O den taa naatonataa leni mi yoma baabuogu leni mi daama dayuagu. O den ban kuani o o Diedo diegu nni, ba ke o da tie bonwaaga.

²⁵ Bi den padi naatonli, ki taa ki biga ki gedini Eli kani.

²⁶ Anna den yedi: «N daano, i moamoani, n tie yaa pua n den sedi ne a nintuali ki miadi o Diedo.

²⁷ N den jaandi ki miadi ki naa bige. O Diedo mo tuo ki puni nni min den mia o yaala.

²⁸ Lani yaa po, n bua ki pa o o Diedo. O miali dana nni kuli, o baa yaa ye o Diedo po.» Lani, bi den labini ki kpiagi o Diedo likani.