1 Pieri 5 - U TIENU MAAMA TILI 2013

O gobidika tuonli 5 U Tienu yankulu

¹ Lanwani, mini yua n tie o nikpelo, ki tie siedi Kilisiti falaciamo po, ki go baa taani ki baa U Tienu n baa doagidi yaa kpiagidi, mia ki go tundi yi siiga yaaba n tie a nikpela line:

² Yin yaa kpaa U Tienu yankulu, yuu n ye yi kani. Yin da tiendi la nani li tie tiladi ka, ama lan yaa tie yi yama po, nani U Tienu n bua maama. Yin da tiendi yeni kelima yi bua ki baa i ligi ka, ama yaa tiendi mani la, ke yi yama ye lienni moamoani.

³ Yin da gobidi ban piani yi yaaba leni u paalu, ama yin yaa tie li bontogidikaala u yankulu po.

⁴ Lanwani, o yankpaaciamo yaa doagidi o yuli yaa yogunu, yi baa baa yaa kpiagidi n kan yindi yaa badifogiliga.

⁵ Yinba bi jawaaba mo, yin yaa miindi yi yula a nikpela kani. Yikuli n yaa miindi yi yula yiyaba kani, ki yaa la li yumiinli, ki yaa todi yiyaba kelima li diani: «U Tienu yiedi bi japaadanba, Ama o puuni bi yumiindanba o ŋanbili.»

⁶ Lanwani, yin yaa miindi yi yula U Tienu nuu yuu n pia u paalu kani, ke u yogunu yaa pundi, wan kpiagi yi.

⁷ Yin tuni wani U Tienu yi yanyagidi kuli, kelima wani o ba n kubi yi.

⁸ Yin yaa kubi mani yi yula ki yaa faami, kelima yi yibali Sutaani, goadi nani yaa yangbanlo n duni ki lingi wan baa cuo yua ki ŋmani yeni.

⁹ Yin yaa se ke li pa yi dandanli nni ki yie o po, kelima yi bani ke yi kpiiba yaaba n ye ŋanduna nni kuli moko laadi laa fala buolu.

¹⁰ U Tienu yua n die li ŋanbili kuli, yini yi Kilisiti nni, ke yin taani leni o ki baa yaa kpiagidi n kan gbeni, yi yaa tuo ki laa fala u yogunu waamu po. Wani o ba n baa ŋanbi yi cain, ki teni yin yaa se bonŋanla, ki paagi yi pala, ke liba kuli kan fidi ki lengi yi.

¹¹ Wani U Tienu n yaa die u paalu hali yaa yogunu kuli. Amina!

I fuondijuodike

¹² Silasi, o nidugika, min nua yua ke o tie ti kpiilo, wani n todi nni ke n diani yi po yaa tijenjenga n tie ne. N bua ki paagi yi pala, ki tieni yi po siedi ke yi se bonŋanla U Tienu ŋanbili yaali n tie i moamoani nni.

¹³ U Tienu n gandi yaa nitaanli yaali n ye Babilonni nani wan gandi yinba maama fuondi yi. N bijua Marki moko fuondi yi.

¹⁴ Yin fuondi yiyaba, ki gobini yiyaba leni mi buamoanma. Mi yanduanma n yaa ye leni yinba yaaba n ye Kilisiti nni kuli.